Langisha Ukuti Ulasakamana Ukupitila mu Kucite Fipempu fya Kubwelelamo
1 Ukufwaya abalesekelela ku mwinshi no mwinshi kulangisha ukufwaisha kobe ukwa kupeela bambi ishuko lya mu nshita ilya kumfwa ubukombe bwa Bufumu. E co shininkisha ukubwelela kuntu washalika impapulo mu mweshi wa January, apantu iyi e nshila yawamisha iya kulangishamo kuti ulasakamana bambi.
2 Nga ca kuti washalike icitabo “Imbila Nsuma—Iya Kukulenga uwa Nsansa” kuti waesha ukubukulula ukulanshanya kwenu muli iyi nshila:
◼ “Ilyo nali pano twalandile pa lwa Bufumu bwa kwa Lesa na cintu bukatucitila. Bulya Bufumu mu kwangufyanya bukalenga lino isonde ukuba paradise. Apantu tatwabala atumonapo paradise, kuti caba icakosa ukwelenganya yene. Nangu cibe fyo, paradise wa musango yo alilaiwa muli Baibolo. [Belenga Ilumbo 72:7.] Cinshi cintu muletontonkanya cifwaikwa kuli ifwe pa kuba ulubali lwa cilya calo cipya ica mutende?” Leka mwine ŋanda asuke, kabili lanshanyeni Ilumbo 37:9, 11, 29.
3 Pano paliko imitubululo pa fya kubwelela kuntu washalike icitabo ca “Bushe Ubu E Bumi Bweka Bwabako?”:
◼ “Ifwe bonse kuti twatemwa ukuba aba nsansa. Abengi bayumfwa ukuti insansa shine shine te kuti shibeko muli cino calo. Ni shani fintu muyumfwa pa lwa ico? [Leka asuke.] Calisoswa ukuti insansa mibele ya muntontonkanya. Nga ca kuti imintontonkanya yesu yaisushiwamo ukutemwa bambi, ukucindika Lesa, ne subilo lyashininkishiwa ilya ku nshita ya ku ntanshi, kuti twakwata insansa shine shine te mulandu ne mpika shesu.” Belenga Ilumbo 119:1, 2. Londolola ukuti ukusambilila Baibolo kutusambilisha ifya kutemwa bambi, ukucindika Lesa, no kusanga isubilo lya cisansamushi ilya ku nshita ya ku ntanshi.
4 Kuti wabwelela kuntu washalike icitabo “Ukusala Inshila Yawamisha iya Bumi,” pa kubomfya imipeelele iipi iyapale yi:
◼ “Umuku walekelesheko lintu naishile, twalanshenye fintu uuli onse engatemwa ukwikala mu calo umo mwaba umutende no mutelelwe. Muletontonkanyo kuti mulandu nshi Lesa apembelelela apaleepe fi pa ntanshi ya kucitapo cimo ku kuwamyako imibele ya muntu? [Belenga 2 Petro 3:13, kabili losha mwine ŋanda kwi bula 186, paragrafu 22, ilya ici citabo.] Bushe tacili ca cine ukuti ukutekanya kuti kwalundululwa mu kuba no kwaafwa kwa Cebo ca kwa Lesa? Kuti natemwa ukumulanga fintu ici citabo cingamwaafwa.”
5 Kuti wabwelela apo washalike broshuwa wa “Bushe Lesa mu Cituntulu Alatusakamana?” ukubomfya iyi mitubululo:
◼ “Ilyo nali pano namushilile uyu broshuwa, uwimya icipusho cakatama ica kuti: ‘Bushe Lesa mu cituntulu alatusakamana?’ Pa numa ya kupituluka muli uyu broshuwa, ni nsondwelelo nshi mwafikileko? [Leka asuke.] Mu kupalishako mwalikoseleshiwe pa kubelenga amalembo ayo yalaya icalo cipya ica paradise, umo twingekala mu mutende. [Langisha ifikope pa mabula 2 na 3, kabili londolola shimo isha mbali sha kucebusha isha calo cipya.] Ndi uwashininkisha ukuti imwe na batemwikwa benu kuti mwatemwa ukwikala mu calo ca musango yu. Moneni cintu paragrafu 16 pe bula 31 isosa pa lwa ici.” Belenga paragrafu, kabili londolola ukuti ukusapika Yehova kupilibula ukusambilila ifyafulilako pa lwa wene ne mifwaile yakwe ukupitila mu kusambilila Icebo cakwe, Baibolo.
6 Yehova alimika ica kumwenako capwililika pamo nga Kacema wa kutemwa uusakamana impaanga shakwe. (Esek. 34:11-14) Ukubombesha kwesu ukwafumaluka ku kupashanya ukusakamana kwakwe ukwabamo kutemwa kulamutemuna, kulangisha ukutemwa kwesu, kabili kuletako amapaalo kuli bambi.