Ukubomfya Bwino Ifitabo Fyesu Ifya Kale
1 Yehova alitupayanishisha ica kulya ca ku mupashi icapaka. Ubwingi bwa ifi fyebo bwaba mu musango wa fitabo fya mabula 192 ifyo fyasabankanishiwa mu myaka ya nomba line. Mu January tukalatambika icitabo icili conse ica mabula 192 nga fintu ukubilisha kwa ca kutambika mu January kulelangilila. Bushe nukwatako fimo ifya ifi pa ŋanda ifyo ficili mu mibele isuma? Bushe icilonganino nacikwatako fimo mu stoko? Nga ni fyo, kuti caba bwino ukupituluka mu fyabamo no kusoobolamo ifishinka fya kulanshanyapo ifyo wingabomfya mu mipeelele yobe.
2 Nga ca kuti ulebomfya icitabo “Imbila Nsuma—Iya Kukulenga uwa Nsansa,” pa numa ya kuilondolola we mwine kuli mwine ŋanda, kuti pambi watila fye:
◼ “Naisa nati imusansamusheko no bukombe bwe subilo. Ndesubila mulesuminisha ukuti amakamfulumende ya buntunse te kuti yapikulule impika sha muntu. Ico e calandwapo pano pe Ilumbo lya mu Baibolo pa cikomo 3 ica cipandwa 146. [Belenga.] Ukupikulula kubelelela ku mpika sha muntu kuti kwaishila fye ukupitila muli kamfulumende wa Bufumu bwa kwa Lesa muli Kristu. Uyo e mutwe ukalamba uwa Baibolo kabili walilondololwa bwino muli luno lupapulo ndeshalika pali K50.00.” Laya mwine ŋanda ukuti ukabwelelako ku kuyalanshanya ifyalundwapo.
3 Nga ca kuti uleshalika icitabo “Bushe Ubu E Bumi Bweka Bwabako?,” kuti pambi waesha iyi mitununukile:
◼ “Abantu abengi calibafya ukusange nsansa muli cino calo pa mulandu wa kuti kwabako impika ishingi. Bushe muletontonkanya ifyo kuti mwaba aba nsansa pe samba lya mibele ya ndakai? [Leka asuke. Kupukula pe bula 5, paragrafu 2, kabili londolola impika shimo ishaseeka isho shitusakamika.] Baibolo ilanga fintu twingabomba ne shi mpika na mu kupelako ukuipakisha insansa shabulo kupwa mu calo cipya ica mutende. [Belenga Esaya 32:17, 18.] Baibolo ipeela ukufunda kwa kulungatika uko kwingatwaafwa ukusanga insansa shafulilako mu bumi. Ici icitabo cipituluka muli uko kufunda no kulondolola fintu twingabomfya kwene.”
4 Nga ca kuti ulebomfya icitabo “Ukusala Inshila Yawamisha iya Bumi,” kuti pambi watemwa ukwesha iyi nshila:
◼ “Abantu abengi abali abasekelela mu kuwamyako inshila yabo iya bumi balyalukila ku butotelo. Lelo ubwingi bwa aba bacili ababulwa insansa. Bushe mwalimona ici? Mulandu nshi cabele fyo? [Leka asuke.] Nasangile utu utumashiwi ukuba utwa kulengo buseko. [Belenga ibula 8, paragrafu 8 ukufika pali Mateo 7:23.] Ici cicilenga ukuba icayafya nga nshi ku bantu bafumaluka abafwaya ukwishiba abasambi ba kwa Kristu, bushe te ifyo? Moneni ici ciputulwa ca paragrafu 9. [Belenga amasentensi ya kubalilapo yatatu.] Bushe ico tacileumfwika ica kusansamusha? Ici e co Yesu alaile pali Marko 10:29, 30. [Belenga.] Inshita ya musango yu iya bumunyina bwa pa kati ka nko ikaba mu kusaalala kwe sonde. Ici citabo, Ukusala Inshila Yawamisha iya Bumi, cikamwaafwa ukusambilila ifyafulilako pa lwa malayo ya kwa Lesa. Ndemukoselesha ukukwatako cimo. Kuti mwashala na cene pali K50.00.”
5 Kuti pambi wasalapo ukubomfya broshuwa wa “Bushe Lesa mu Cituntulu Alatusakamana?” Nga ni fyo, kuti wasosa ati:
◼ “Abantu abengi balapapa umulandu Lesa asuminishisha ukucula kwafule fi mu calo. Apantu wa maka yonse, mulandu nshi ashacitilapo cimo ku kupwisha ukumanama kwesu? Ni shani fintu muleyumfwa? [Leka asuke.] Baibolo itwebekesha ukuti Lesa tatulekelesha.” Alukila kwi bula 27, paragrafu 22, no kubelenga Ilumbo 37:11, 29. Londolola icikope ca kucebusha icilangisha cintu twingaloleshako ku ntanshi. Nga ca kuti broshuwa apokwa, mwebe ukuti ukabwelelako ku kumulanga fintu ingabomfiwa kwi sambililo lya Baibolo.
6 Ifitabo fyesu fyalikunta amakana ya bantu ukubebeta Baibolo mu kupalamisha. Cintu basambilila calibaletela isubilo lya nshita ya ku ntanshi iya nsansa. (Ilu. 146:5) Lyaba lishuko lyesu ukubaafwa.