Ulubali 1—Langulukilako Bambi
1 Tulasekelela ukumona ulubanda lwa bantu ba kwa Yehova, ulwafumamo impendwa ilekulilako iya filonganino. Mu ncende shimo, maka maka mu misumba ikalamba, ukutitikisha kwalibikwa pa fikuulwa fya Mayanda ya Bufumu, inshita shimo ukufwaya ifilonganino fyafulilako ukubomfya Iŋanda ya Bufumu imo ine. Iyi mibele ifwaya ukulangulukapo kwaibela pa lubali lwa bonse ababimbilwemo.
2 Icilonganino cimo cimo icilebomfya Iŋanda ya Bufumu cilingile ukusha yene mu mibele ya busaka kabili iyapempenkana kuli bamunyina abakonkapo. Imipando ilingile ukutantikwa mu muyano, impapulo ishili shonse pa ca kushitishishapo shilingile ukubikwa uko shikala, ne fipe fyonse ifya bantu pa lwabo ifishele insansalila pa Ŋanda ya Bufumu filingile ukulonganikwa. Ifimbusu filingile ukushiwa mu mibele ya busaka, ukushininkisho kuti isopo, amataulo, na mapepala nafibikwamo fimbi ne fisooso ukupooswa.
3 Lintu ukulongana na kumbi kutantikilwe ukutendeka mu kwangufyanya, abo abaleshala pa numa ya kulongana kubangilileko tabalingile ukushingashinga mu kukanafwaikwa, ukupumfyanya amapekanyo ya kulongana kwalakonkapo. Ukulanshanya kwa kuposhanya ukwatantalila kuti kwafumamo abantu ukufulisha umwa kufikila abeni no kucelesha bamunyina mu kuteyanye fintu ku kulongana kwalakonkapo. Incende ya kwimikapo bamotoka ukushinguluke Ŋanda ya Bufumu kuti pambi yabe yapeleela, kabili kuti caba cikuuku ukufumapo mu kwangufyanya pa kuti abo abaleisa bengakwata icifulo apa kwimika. Pa lubali lumbi, abo balesangwa ku kulongana kukonkelepo tabalingile ukufika mu kubangilila kwacishamo, ukulenga ukutitikana kushalinga umwa kufikila abeni no mwa kwimika bamotoka.
4 Uko kuntu ifilonganino fyafulilako fibimbilwemo, kuliko ukukabila kwaibela ukwa kubombela pamo ukwapalamisha mu kucita ukutantika kwa kuwamya Iŋanda ya Bufumu ukwa cila mulungu. Ilingi line, ifilonganino filalekanina pa ciputulwa ca nshita icaimikwa. Lintu icilonganino cenu cikwete uko kushingamwa, shininkisheni ukuti ukuwamya kwacitwa mu kukumanina kabili mu kwangufyanya pa kuti ifilonganino fimbi ifilebomfya iŋanda lyene bekakwata umulandu wa kuilishanishishapo.
5 Mu tushita mu tushita kulabako ukukabila ku cilonganino cimo cimo ukwalula inshita yabo iya kulongana, pamo nga lintu kangalila wa muputule atandala. Nga ca kuti icilonganino cimbi nacambukilwako, baeluda balingile ukwishibisha ico cilonganino cimbi mu kubangilila pa kuti bengeba bakasabankanya babo mu kubangilila ukufika pantu bengapesha. Na kabili, nga ca kuti imibombele imo iyasuminishiwa naitantikwa, pamo nga Isukulu lya Mulimo wa Bupainiya, ukukumana kwa baeluda ba mu muputule, nelyo ubwinga, ifilonganino fimbi na bakangalila ba muputule abali bonse bambi abakuminweko balingile ukwipushiwa mu kubangilila kwalinga; muli yo nshila tabakatantike ukubomfya Iŋanda ya Bufumu pa nshita imo ine.
6 Kwalibako ubwingi bwa Mayanda ya Bufumu ayabomfiwa ne filonganino ayapeelwa ku miputule yalekanalekana. Cili icakatama ukuti bakangalila benda abatandalila aya Mayanda ya Bufumu baleishibishanya pa lwa kutandala kuleisa ukuletantikwa. Ukuteulula kwa mu kampampa nelyo amafya yambi e fingesako lintu bakangalila benda babili batantika ukutandala mu kati ka mulungu umo wine.
7 Ukulangulukilako kwabamo kutemwa kuli bambi, ukwendela pamo no kumfwana kusuma, ukutantika kwa mu kubangilila no kubombela pamo kukafwilisha ukusungilila ukwampana kwa cikabilila pa kati ka filonganino kabili kukashininkisha ukuti ‘fyonse fyacitwa busaka busaka kabili mu kukonkana.’—1 Kor. 14:40.