Ukushila Akashilwa Ukulubula
1 Ilyo talaputunkanya ubupingushi bwakwe ubwalungama, Yehova lyonse alapeela ukusoka no kupayanishisha abafuuka inshila ya kufyukilamo. Mu kasuba ka kwa Esekiele, kwaliko abo abaleteta no kulila pali fyonse ifya muselu ifyalecitwa. Yehova alengele abayana aba musango yo ukushilwa pa kuti bengapokololwa. (Esek. 9:4-6) Umulimo wesu uwa kushimikila ilelo upwilikisha imifwaile imo ine. Kuti twabombako ulubali lwacindama.
2 Ukusanga abantu bafumaluka lutampulo fye lwa kubalilapo. Tulatantike cipempu ca kubwelelamo. Ukupekanishishe cipempu ca kubwelelamo kucitwa pa kutandala kwa kubalilapo pa kulemba icishalikwe ne lyashi lyalandilwepo. Ukutunguluka kwesu mu kubwelelako kukashintilila apakalamba pa cintu tukaipekanya ukusosa no kucita lintu twabwelelako.
3 Mu kukonkelela uko washalike “Ulupungu lwa kwa Kalinda,” kuti watonta pa mutwe wa luko uukalamba:
◼ “Moneni ukuti pa nkupo ya pa ntanshi iya Ulupungu lwa kwa Kalinda pamoneka amashiwi ya kuti ‘Ulusabankanya Ubufumu bwa kwa Yehova.’ Icalenga uyu magazini ukuba uwaibela caba ca kuti afwilisha Ubufumu bwa kwa Lesa ngo kupikulula kweka fye ku mpika sha calo. Alalondolola cintu Ubufumu bwa kwa Lesa bukapwilikisha lintu ukufwaya kwa kwa Lesa kwacitwa pe sonde. Iyi e mbila nsuma intu Yesu atile ili no kubilwa mwi sonde lyonse.” Belenga Mateo 24:14, kabili londolola fintu Ulupungu lwa kwa Kalinda lwingalapokwa lyonse no kubomfiwa kwi sambililo lya Baibolo ilya pa lwakwe.
4 Kuti pambi wasalapo ukutonta fye pali Baibolo wine no kwebekesha ukukabila kwa kubelenga yene lyonse. Kuti watila:
◼ “Cilemoneke fyo mupepi fye no uli onse uo twaishiba kuti atemwa ukupanda amano kubomba pa fya kubomba ne mpika sha mikalile ya cila bushiku. Ni kwi muletontonkanya twingasanga ukupanda amano uko twingacetekela? [Leka asuke.] Abengi ababika ukucetekela mu kupanda amano ukwa fibusa nelyo abalipilila ukufunda kwa baishibisha balilengwe nsoni icabipisha. Pa lubali lumbi, amakana ya bantu balisanga Baibolo ukuba e ntulo fye yeka iya kupanda amano iyo bengacetekela mu cine cine. Baibolo ipayanya amakambisho pa fya kubomba ne mpika ishili shonse twingalolenkana na sho. [Belenga 2 Timote 3:16, 17.] Nangu cingatila pambi mwalisanga Baibolo ukube yaafya ukumfwikisha, lekeni mulange fintu mwingaibomfya ku kwisula ubutala bwa kufunda kwa mano.” Konkeshapo pa kukupukula pali 1 Yohane 4:8 nelyo ilembo ilili lyonse limbi ililanda pa kutemwa. Pa numa ya kubelenga, langa fintu ukutemwa kwingatwaafwa ukupikulula ukupusana kwesu na bambi.
5 Mu kuba no buyo bwa kutendeka isambililo lya Baibolo, kuti pambi wasalapo ukubomfya icitabo “Kuti Waikala Kuli Pe na pe muli Paradise Pe Sonde,” ukubomfya iyi ntendekelo:
◼ “Twalitemwa indupwa shesu kabili tubafwaila ifyawamisha. Ni shani fintu ulupwa lwenu lwinganonkelamo ukwikala mu calo caba nge ci?” Langisha ifikope pa mabula 156-7. Belenga ilembo limo nelyo yabili ayambwilwe pali aya mabula, no kulondololo kuti aya malayo yalaiwa na Yehova Lesa, uushingabepa. Losha ku mutande wa fipandwa pa mabula 5-6, kabili ipusha mwine ŋanda umutwe we sambililo uulemusekesha ukucishapo; kupukula ku cipandwa cintu asala, no kulanshanyako paragrafu umo nelyo yabili.
6 Bushe kuti watemwa ukwaafwako umuntu umbi ukushilwa akashilwa ka kupokololwa? Ukutunguluka kwashintilila mu ‘kufishapo bukapyunga bobe’ pa kupekanya bwino kabili mu kwangufyanya ukukonkelela ubuseko bonse buntu usanga.—2 Tim. 4:5.