Amalembo Yonse ya Mulimo ku Kusambilisha
1 Kwabako ukuyumfwo kwingi kabili ukwalekanalekana pa lwa bucindami bwa Baibolo. Nangu cibe fyo, twalishininwa ukuti mu mabula ya iko e mwaba ukupikulula ku mpika sha mutundu wa muntu ishipelenganya pamo pene no butungulushi bwashintililwapo ku mpika sha pa lwesu isha mu bumi. (Amapi. 3:5, 6) Amano yaba mu kufunda kwa iko tayengalinganishiwako. Ifipimo fya mibele fintu yafwilisha fyalipulishamo. Ubukombe bwa iko bwa maka “[bulingulula] amatontonkanyo na ’mapange ya mutima.” (Heb. 4:12) Ni shani fintu twingaafwako bambi ukumona ukukabila kwa kufumya ili buuku pa shelufu no kulibebeta mu kusakamanisha? Kuti pambi wafwaya ukweshako imo imo mu mitubululo ili pano lintu uletambika New World Translation mu kuba ne citabo ca Baibolo—Cebo ca kwa Lesa Nelyo ca Muntu? mu November.
2 Apantu abantu abengi balasakamikwa pa lwa kukumanisha imikalile, nakalimo inshila ingabalenga ukupeelako kusakamana ni yi:
◼ “Abantu abengi abo nandako shino nshiku bali abasakamikwa pa lwa kukumanisha ukukakililwako kwabo ukwa mu fya ndalama. Abengi baliikatwa mu kukonkelela ifintu fya ku mubili, kabili ici cifumamo ukukanshika. Ni kwi twingalukila uko twingasanga ukupanda amano kwawamisha pa milandu ya musango yo? [Leka asuke.] Nalisanga ukuti Baibolo ilatambika ukupanda amano kubomba ukwingatwaafwa ukusengauka impika shishafwaikwa. Lekeni mulange ica kumwenako.” Kupukula pe bula 163 mu citabo Baibolo—Cebo ca kwa Lesa Nelyo ca Muntu? kabili belenga 1 Timote 6:9, 10, ilyambwilwe mu paragrafu 3. Landapo na pali paragrafu 4, kabili lyene tambika icitabo.
3 Mona imitubululo na imbi iyo nakalimo wingalangulukapo:
◼ “Lyonse lintu tubelenga inyunshipepala nelyo ukukutika ku lyashi tulomfwilapo impika na imbi iitulenga ukusakamikwa. [Lumbulapo ica kuponako ca kukalifya icumfwikile pali nomba line mu lyashi.] Ni shani fintu twingabomba ne mpika sha musango yu? [Leka asuke.] Ku numa mu 1983 uwali pali iyo nshita presidenti wa United States [Ronald Reagan] atile Baibolo e yakwata ubukombe bwawamisha ubwalembwa no kuti ‘mu kati na nkati ka mabula ya iko e mwaba ukupikulula ku mpika shonse shintu umuntu akumanyapo.’ Cintu alandile citwibukishako cintu Baibolo iine ilondolola. [Belenga 2 Timote 3:16, 17.] Lekeni mulange umulandu twingacetekela muli Baibolo.” Londolola ifishinka fikalamba fimo fimo ukufuma muli trakiti wa Umulandu Wingacetekela Baibolo. Ipeele ukuti ukabwele pa numa ku kulanshanya ifyo cabe ca kusungusha ukuti amasesemo ya mu Baibolo yalefikilishiwa mu fileponako muno nshiku mu calo.
4 Nga ca kuti mu cifulo cobe ica kubombelamo mwalibamo abantu abengi abashakongamina ku kupepa, kuti pambi waeshako iyi nshila:
◼ “Abantu abengi muli ino ncende bamona amabuuku yamo aya mushilo nga ayaipilika kabili pamo nge nshimi fye. Balimona ifintu fyabipa ifingi ifyacitilwa mwi shina lya mipepele ica kuti tabacetekela fye na Baibolo ine. Na kuba, icinabwingi ca bantu baletwishika nampo nga Baibolo caba Cebo ca kwa Lesa nelyo ca muntu. Imwe muletipo shani?” Leka asuke. Ukushintilila pa fintu mwine ŋanda ayasuka, kupukula ku lubali lwa citabo ca Baibolo—Cebo ca kwa Lesa Nelyo ca Muntu? ululebomba no kuyumfwa nelyo imimwene ya kwa mwine ŋanda, kabili lanshanyenipo ifishinka cimo nelyo fibili. Ku ca kumwenako, kuti washukila apa kubomfesha amaparagrafu 27-9 ukutendekela pe bula 66, pe samba lya kamutwe kanono akaleti “Yesu—Umuntu wa Cine Cine.”
5 Kasambilisha wesu Uwakulisha alishininkisho kuti ukwishiba imifwaile yakwe kulesangwa kuli bonse abafwaya ukusambilila. Ukwaafwa bambi ukutesekesha ubucindami bwine bwine ubwa Baibolo e cintu cawamisha ico twingacita ku kubaafwa; kuti capusushe myeo yabo.—Amapi. 1:32, 33.