Afwa Bambi Ukuinonsha Abene
1 Yehova alayo kutusambilisha ico tukabila ukwishiba. Alitwebekesha pe Ilumbo 32:8 ati “Ndekushilimuna, kabili ndekulange nshila iyo ufwile ukwendamo; ndekupanda amano na ’menso yandi pali iwe.” Uku kwebekesha kulatunonsha nga nshi. Mu kubulwa akaso, tufwaya ukulanga bambi ifyo bengainonsha abene pa kumfwila ukufunda kwa mano ukufuma muli Baibolo. (Esa. 48:17) Mu September kuti twacite ci pa kutambika icitabo ca Ikala Kuli Pe na pe. Mu mashiwi ya kulanda pa kutambika, kwalibako inshila shalekanalekana umo twingalangila ubucindami bubomba ubwa Baibolo.
2 Mu cilolwa ca kufulisha kwa mpika sha mu cupo ilelo, kuti pambi wasalapo ukubomfya ili tontonkanyo ukufuma mu citabo ca “Ikala Kuli Pe na pe”:
◼ “Abantu abengi abo nandileko bali abasakamikwa nga nshi pa lwa kwingilishiwako kukalamba mu kubulwe nsansa kwa mu cupo no kulekana. Ni shani fintu muleyumfwa pa lwa iyi mpika? [Leka asuke.] Abengi balifilwa ukusange cilenga. Nga ca kuti babombesha mu kufumaluka, abaupana te kuti bapusushe fye icupo cabo lelo kuti basanga fye ne nsansa sha cine cine. Amakii ya kutunguluka yaba kubomfya ukufunda ukusangwa muli Baibolo.” Belenga Abena Efese 5:28, 29, 33. Kupukula pe bula 243, lanshanyeni amaparagrafu 16 na 17, kabili lyene tambika icitabo pa musangulo wa ndakai.
3 Abana balakabila inshita yakatama no kukansha ukufuma ku bafyashi babo. Pa kushalika icitabo ca “Ikala Kuli Pe na pe,” kuti watila:
◼ “Ifwe bonse tuli abayangwako pa lwa butuntulu busuma ubwa ku ntanshi ubwa bacaice besu. Ukulingana na fintu muletontonkanya, ni nshila nshi iyawamisha iyo abafyashi bengafwilamo abana babo ukusanga inshita ya ku ntanshi iya mutelelwe? [Leka asuke.] Kutikeni kuli uku kupanda amano ukufuma mwi pinda lya mu Baibolo ukwalembelwe imyaka mupepi na 3,000 iyapitapo. [Belenga Amapinda 22:6.] Ilintu abana besu kuti banonkelamo apakalamba mu fyo basambilila ku sukulu, ukukansha kwabo ukwacilishapo kukatama kupayanishiwa pa ŋanda ukupitila mu bafyashi babo. Cifwaya inshita, ukusakamana, no kutemwa, lelo caliwaminwa uku kubombesha.” Kupukula pe bula 245, lanshanyeni amaparagrafu 20 na 21, kabili lyene londolola ifyo icitabo cingabomfiwa nge ntendekelo ye sambililo lya Baibolo ilya lupwa.
4 Kuti pambi wafwaya ukutambika icitabo ca “Ikala Kuli Pe na pe” pa kulangisha ifyo isonde likasanguka paradise:
◼ “Ndi uwashininkisha ukuti muli abayangwako pa fyo ubumi bwenu buli no kuba ku ntanshi. Mwi Pepo lya kwa Shikulu, Yesu atusambilishe ukupepela ukufwaya kwa kwa Lesa ukucitwa pano nse nga mu muulu. Bushe isonde likaba shani lintu ico cacitika? [Leka asuke.] Moneni fintu pano icalo ca paradise calengwa. [Langisha icikope pa mabula 12 na 13. Lyene belenga Esaya 11:6-9, iisanshiwe mu paragrafu 12.] Bushe te kuti cibe icawamisha ukuba mu calo ca musango yu? Ici citabo cili no kumulanga ifyo imwe no lupwa lwenu mwingekala muli paradise ukupala uyu.”
5 Ukupekanishisha libela ifya kuyalanda kwaba e ca kusangwilako cikalamba mu kupimununa ukutunguluka kobe pa mwinshi. Ilyo ushilakonkonsha, shininkisha ukuti nukwata icintu cimo ica kulungatika ica kusosa pa lwe tontonkanya lya mu Malembo. Na kabili, usunge mu muntontonkanya amashiwi ya kulanda ayepi pa lwa lubali lwa kulengo buseko ulwa magazini nelyo trakiti ifyo ulepanga ukushalika nga ca kuti icitabo tacipokelwe. Shukila ishuko lya mu nshita ilili lyonse ilyo ukwete ku kutande mbuto sha cine ca Bufumu mu September. (Luk. Mil. 11:6) Ukalaafwa bambi ukulobolola ubunonshi ubukabelelela kuli pe na pe.