Konkelela Ubuseko Bonse ku Kunonsha Bambi
1 Ca kusangwilako nshi cikalamba icitwaafwa ukupimununa nampo nga tulingile ukushalika impapulo shesu kuli umo nelyo iyo? Buseko! E fyo caba na ku kucite fipempu fya kubwelelamo. Ukuli konse uko umuntu alanga nangu fye buseko ubunono mu bukombe bwa Bufumu, tulefwaya ukucita apo twingapesha ku kunonsha uyo muntu. E co tulabwelelako mu kuba ne mifwaile ya kulundulula ubuseko bwa uyo muntu no kutampa isambililo lya Baibolo ilya mu ŋanda. Ici ciba e buyo bwesu nangu fye lintu tushishalike impapulo. Ni shani fintu ici cingacitwa?
2 Nga ca kuti ifyo mwalanshenye mu kulekelesha fyali pa lwa kufulisha kwa mpika sha mu cupo ilelo kabili washalike icitabo ca “Ikala Kuli Pe na pe,” kuti watendeka ukulanshanya kobe muli iyi nshila:
◼ “Ilyo namutandalile, twalandile pa lwa cupo no kufunda kubomba ukwa mu Baibolo ukwingatwaafwa ukusange nsansa shikalamba. Bushe tacili ca cine ukuti nangu fye ni mu ndupwa shawamisha, mulema impika mu tushita mu tushita? [Leka asuke.] Baibolo itupeela ukufunda kushaiwamina uko kwingatwaafwa ukupikulula impika mu kwampana kwa mu lupwa. Ulupwa kuti lwapaalwa pa kusambilila Baibolo capamo.” Kupukula pe bula 246, kabili lanshanyeni paragrafu 23. Belenga Yohane 17:3, no kusose fyo kuti wayafwilisha ulo lupwa ukutendeka ukusambilila Baibolo mu ŋanda.
3 Nga ca kuti walandile pa lwa bana na fintu bakabila ukukanshiwa, kuti watwalilila ukulanshanya muli iyi nshila:
◼ “Ilyo nali pano twalandile pa lwa kukansha kwa ku mupashi uko abana bakabila ne fyo abafyashi bengabaafwa. Abafyashi abengi nalanda na bo balatiinishiwa pa lwa myendele yalubana iya bacaice abengi ilelo. Cinshi cintu muletontonkanya pa lwa . . . ? [Lumbula ica kumwenako ica myendele yalubana iya misepela iimoneka ilingi line mu bwikashi bwenu. Leka asukepo.] Lekeni mulange ukupanda amano kumo ukubomba ukwapeelwa muli Baibolo. Alukila kuli paragrafu 22 pe bula 246 mu citabo ca Ikala Kuli Pe na pe, lanshanyeni icishinka cikalamba, kabili belenga Abena Efese 6:4. Londolola ukuti abana abengi mu cishinka balafwaya ukusalapulwa no butungulushi. Lintu abafyashi bali aba mukoosha mu kupayanya fyene, abana balaba aba nsansa kabili balacilapo kuba aba mucinshi mu myendele yabo. Londolola ifyo twingasambilila Baibolo na bana besu.
4 Nga ca kuti ico mwalanshenyepo cali lisonde lya Paradise, lyene kuti pambi wasosa ici ku kubukulula ubuseko:
◼ “Twamwene ifikope fimo muli ici citabo ifyatulangile ico isonde likaba lintu Lesa alenga lyene ukuba paradise. Te kuti lituwamine sana nga ca kuti tatwingaipakisha lyene capamo na batemwikwa besu. Bushe te ifyo?” Leka asuke. Lyene kupukula pe bula 162 mu citabo ca Ikala Kuli Pe na pe. Belenga Ukusokolola 21:3, 4, kabili londolola ifyo abatemwikwa besu lyonse bengaba na ifwe. Nga ca kuti ayankulako bwino, belenga Yohane 5:28, 29 ku kulanga ukuti abafwa bakabwela ku bumi. Sonta ku nkupo ya citabo no kusosa ukuti: “Mu cituntulu ca cine—kuti twaikala kuli pe na pe muli Paradise pe sonde!” Tantika ukutandala na kumbi ku kulanshanya umulandu twaishibila ukuti Paradise naipalama.
5 Imifwaile ikalamba iya cipempu ca kubwelelamo yaba kwaafwa abalesekelela ukunonkelamo mu bukombe bwa Bufumu. Abantu abengi balakabila ica kubacincisha pa kubalamuna insala yabo iya fintu fya ku mupashi. Alwila ukusakamana kwabo ku fishinka fya kulungatika ifya bucindami bubomba mu mpapulo, ukwebekesha ifyo cingabaafwa ukumfwikisha Baibolo mu kuwaminako. Ifipempu fya kubwelelamo ifipwishishisha iyi mifwaile fikaafwa bambi ukuinonsha abene mu nshila yacilishapo kuwama.