Mu Kubamo Kutemwa Afwa Abalangisha Ubuseko
1 Lintu atungulwilwe na malaika wa kwa Yehova ku mwina Etiopia uwalangishe ubuseko bwafumaluka mu Cebo ca kwa Lesa ica cine, umusambi Filipi mu kubamo kutemwa atambike ukumwaafwa ukumfwikisha cintu alebelenga. (Imil. 8:26-39) Bushe tulacito kubombesha ku kwaafwa abo abalangisha ubuseko? Tulingile ukucita, apantu ukutumwa kwesu ukwa bulesa kusanshamo ukupanga abasambi. (Mat. 28:19, 20) Cinshi twingacita pa kubaafwa?
2 Paatulako inshita cila mulungu iya kucita ifipempu fya kubwelelamo. Tantika ukutandalila abo balangishe ubuseko, kabili esha ukubukulula ukulanshanya kwa mu Malembo ukwatampilwe pa kutandala kobe ukwa kubalilapo. Kwata mu muntontonkanya ubuyo bwa kutampa isambililo lya Baibolo. Lyonse bwelelako ku kutambika abafuma aba nomba line aba Ulupungu lwa kwa Kalinda na Loleni! Tambika ukulembesha.
3 Nga ca kuti mwalanshenye ubucindami bwa Baibolo pa kutandala kobe ukwa kubalilapo, kuti pambi wabukulula ukulanshanya, ukubomfya imitubululo ukufuma pe bula 69 ilya citabo ca “Ukupelulula” no kusosa icapala ici:
◼ “Bamo bayumfwa ukuti ukupanda amano kwa Baibolo takubomba mu calo cesu ica muno nshiku. Ni shani fintu muyumfwa pa lwa ico? [Suminisha ukwankulako.] Bushe te kuti musuminishe ukuti icitabo icilepayanya ukufunda kwawama ukwingatulenga ukukwata ubumi bwa lupwa ubwa nsansa cilabomba? [Leka alandepo.] Imfundo ne fibelesho fibimbamo ubumi bwa lupwa fyalyaluka, kabili ifya kufumamo fintu tumona ilelo tafyaba ifisuma. Lelo indupwa isho shibomfya cintu Baibolo isosa shaliba mu cinkumbawile ishashikatala kabili isha nsansa.” Belenga Abena Kolose 3:18-21. Tambika trakiti Umulandu Wingacetekela Baibolo, kabili londolola ukuti tulatambika isambililo lya Baibolo ilya pa fye.
4 Kuti watendeka ukulanshanya pa lwa mibele ya bafwa muli iyi nshila:
◼ “Kwalibako ukulanda ukwingi pa lwa mibele ya bafwa. Cinshi cintu muletontonkanya cicitika kuli ifwe lintu twafwa? [Suminisha ukwankulako.] Amabutotelo ayengi yasambilisha ukuti tulatwalilila ukwikalako mu mibele imbi. Abengi balisunguka pa kwishiba cintu Baibolo isosa pa lwa uyu mulandu. [Belenga Lukala Milandu 9:5.] Ilintu abafwa tabaishiba kantu nangu kamo, tabaalabwako. Lesa alilaya ukubabwesesha ku bumi pe samba lya mitekele ya Bufumu bwakwe.” Alukila ku Ulupungu lwa kwa Kalinda ulwa October 15, 1994, nelyo kwi bula 162 mu citabo ca Ikala Kuli Pe na pe, kabili lanshanyeni amalembo ne fikope. Tantika icipempu ca kubwelelamo na cimbi, mu kuba ne cilolwa ca kutambika ukulembesha no kutampa isambililo lya Baibolo.
5 Nga ca kuti ulefwaya ukulondolola mu kulundapo pa lwa mimwene ya Bwina Kristu iya nkondo sha nko, kuti pambi wafwaya ukusosa icapale ci:
◼ “Bamo basumina ukuti ukulwa e nshila fye yeka iya kupwishishamo ukukansana. Ni shani fintu muyumfwa pa lwa ico? [Suminisha ukwankulako.] Baibolo ilangisha ukuti Lesa afwaya abantu ukwikala capamo mu mutende. [Belenga Abena Roma 12:17, 18.] Ico cikaba ca cine cine mu kusaalala kwa calo pe samba lya mitekele ya Bufumu bwa kwa Lesa.” Losha kuli broshuwa wa Bushe Lesa mu Cituntulu Alatusakamana?, amabula 25-6. Tambika ukubwelelako ku kulondolola umulandu Yesu atusambilishishe ukupepela ‘ukufwaya kwa kwa Lesa ukucitwa pano nse nga mu muulu.’—Mat. 6:10.
6 Mutungwi umwina Etiopia alisumine ukupelebela kwakwe ku kumfwikisha ukwabula umo uwa kumutungulula. (Imil. 8:31) Filipi mu kubamo kutemwa amupeele ukwaafwa uko aalekabila. Kuti twalangisha ukutemwa kwesu ukwa cine cine kuli bambi pa kubaafwa mu nshila imo ine.