Angweni Bonse Abalesekelela
1 Umulimo wa kubilisha Ubufumu uwa mwi sonde lyonse mu kwangufyanya ukapwa, na pa numa bonse “abakaano kwishiba Lesa” bakonaulwa. (2 Tes. 1:7-9) Muli ifyo, ukwangwa ubumi bwa bambi kulekunta abantu ba kwa Yehova ukusambilisha abafulilako ubukombe bwa Bufumu ukufika apo bengapesha.—Sefa. 2:3.
2 Cila mweshi, amaawala amamilioni yalabomfiwa ku kufwaya abalefwaya ukumfwa “imbila nsuma.” (Esa. 52:7) Mu kwankula ku lupapulo lwa kutambika ulwa ndakai, bamo balilembesha Ulupungu lwa kwa Kalinda, kabili abengi balipokelela Ulupungu lwa kwa Kalinda na Loleni! nelyo broshuwa wa Cinshi Cintu Lesa Afwaya Kuli Ifwe? Ukwangwa aba bantu kulingile ukutukunta ukubwelelako kuli bonse abalesekelela.—Amapi. 3:27.
3 Sungeni Ifyalembwa Ifyalungama: Tukapwishishisha ifingi nga mwalasunga ifyalembwa fyakumanina kabili ifyalungama umo twalemba abalesekelela ne mpapulo twashalika. Ifyebo pamo nga ishina lya kwa mwine ŋanda na keyala, ubushiku ne nshita mwatandele, impapulo mwashalike, ne lyashi mwalanshenye fikamwaafwa ukubomba bwino ilyo mwabwelelako. Na kabili, nga ca kuti mwalemba ifyebo fimo ifyo mwine ŋanda alandile ilyo mwalanshenye umuku wa kubalilapo, nakalimo kuti mwakumyako kuli fyene ilyo mwakonkanyapo ukulanshanya pa cipempu ca kubwelelamo.
4 Angufyanyeni Ukubwelelako: Ni banga abapokeleko impapulo kuli imwe umweshi wapwile abo mwatandalila na kabili? Bushe napapita imilungu ukwabula ukumonanapo? Ukwangwa ubuseko bwabo ubwa ciyayaya kulingile ukumukunta ukubwelelako mu kwangufyanya nga nshi, ukucilisha mu nshiku fye shinono, pantu ninshi bacili baleibukisha ifyo mwalanshenye. Pa kubwelelako mu kwangufyanya ku kulundulula ubuseko bwabo, nalimo kuti mwaba na maka ya kucilikila ukubombesha kwa kwa Satana ilyo ‘talaisasende cebo icatandwa muli bene.’—Marko 4:15.
5 Ukupekanya Kwalikatama: Ukubomba bwino mu fipempu fya kubwelelamo kwashintilila pa fintu mwapekanya bwino. Tantikeni inshila mukabomfya ilyo mushilayako. Ibula lya kulekelesha mu Ubutumikishi Bwesu Ubwa Bufumu ubwa April 1997 lyapayenye inshila sha kulandilamo ishingi isho mwingatungulukamo nga nshi ilyo mwashibomfya mu kutambika bamagazini nelyo broshuwa wa Cintu Lesa Afwaya. Icikonkapo cili kwishibila libela ifya kuyalanda lintu mwabwelelako. Cinshi mwingasosa lintu mwabwelela ku balesekelela? Ni shani fintu mwingatendeka isambililo lya Baibolo?
6 Lintu mwabwelela ku kukonkanyapo ukulanshanya pa filekabilwa pa kuwamya isonde no kulipanga ukuba icifulo cawaminako umwa kwikala, nakalimo kuti mwatila:
◼ “Ilyo namutandalile umuku wafumako, twalisuminishenye ukuti ukuteulula kukalamba kulekabilwa pa kuti isonde lingapangwa ukuba paradise wa mutende. Bushe muletontonkanya ukuti abantu balikwata ifikabilwa pa kupwishishisha uyu mulimo? [Lekeni asuke.] Moneni umulandu cikabela icakabilwa ukuti Lesa akacilime imicitile ya bantu.” Belengeni Ilumbo 37:38. Lyene kupukuleni pe sambililo 5 muli broshuwa wa Cintu Lesa Afwaya, kabili bomfyeni ifiputulwa musalile mu maparagrafu 4-5 ukulangilila fintu Lesa akafikilisha ubu busesemo. Twalilileni pa kutambika isambililo lya Baibolo ukubomfya broshuwa.
7 Nga ca kuti mwalanshenye pa lwa Bufumu bwa kwa Lesa no kushalika broshuwa wa “Cintu Lesa Afwaya” pa kutandala kwa kubalilapo, lintu mulebwelelako kuti mwasosa icapala ici:
◼ “Lintu twalanshenye umuku wafumako, twaishibe Ubufumu bwa kwa Lesa ukuti buteko bwa cine cine ubo bukateka isonde lyonse. Baibolo ilanga ukuti Kristu Yesu akaba e mfumu ya buko. Bushe kuti mwaelenganya ifisuma ifili fyonse ifikabako pa kutekwa no buteko bwa musango yo ne yo ntungulushi?” Lekeni asuke. Isuleni broshuwa wa Cintu Lesa Afwaya pe bula 6. Pa kubomfya ifishinka fintu musalile mu maparagrafu 6-7 ne cikope cili pe bula 13, langeni cintu Ubufumu bwa kwa Lesa bukacitila abantu ku ntanshi. Belengeni Daniele 2:44, kabili londololeni icitabo ca Ukwishiba no kutambika isambililo lya Baibolo, nga nacilinga.
8 Nga mwasangile umuntu uwasumine ukuti imipepele ya calo yaliletela abantu amafya, nakalimo kuti mwaipusha ici cipusho pa cipempu ca kubwelelamo:
◼ “Bushe mwalibala amutwishikapo fintu twingeshiba ukupepa uko Lesa asuminisha? [Lekeni asuke.] Uyu broshuwa Cinshi Cintu Lesa Afwaya Kuli Ifwe? alondolola ifya kwishibilako ukupepa kwa cine.” Kupukuleni pe sambililo 13, no kukomaila pa fishinka fili mu filembo fipindeme mu maparagrafu 3-7. Nakalimo kuti mwatwalilila pa kusosa ukuti: “Ukusansha pa kusanga ukupepa kwa cine, tufwile ukusanga fintu Lesa afwaya kuli ifwe umo umo.” Belengeni Yohane 4:23, 24. Mwebeni ukwisatwalilila ukulanshanya pa lwa ici. Kupukuleni pe sambililo 1 muli broshuwa, kabili langilileni fintu tusambilila.
9 Lintu mwabwelelako ku kukonkanyapo ukulanshanya pa lwa nsansa sha mu lupwa, kuti mwalanda icapala icakonkapo:
◼ “Lintu twatandele umuku wa kubalilapo, nalanshenye na imwe pa lwa caba inkaama ku nsansa sha mu lupwa, icaba kubomfya ukufunda kwaba mu Cebo ca kwa Lesa, Baibolo. Lintu Baibolo ilelanda pa kubombela pa fintu indupwa sha muno nshiku shilekabila, bushe mwasumina ukuti yalileka ukubomba nelyo icili ilabomba?” Lekeni asuke. Tambikeni icitabo ca Ukwishiba. Kupukuleni pa cipandwa 2, kabili belengeni amashiwi ya mu paragrafu 13. Ukubomfya ifishinka fili mu paragrafu 3, tambikeni isambililo lya Baibolo ilya lupwa.
10 Ilyo twasunga ifyalembwa fyalungama, ilyo twapekanya mu kusakamanisha, no kubwelelako mu kwangufyanya ku kulundulula ubuseko bwabo kuti twalangisha ukutemwa abanensu ukukabacebusha ukuba pa nshila ye pusukilo.—Mat. 22:39; Gal. 6:10.