Landa mu Kushipa
1 Mu myaka ya nomba line bakasabankanya mu ncende shimo balecisanga ukuba icakosa nga nshi ukulanda na bantu pa mayanda yabo. Abengi balondolola ukuti mu fifulo fyabo ifya kubombelamo ukucila pa maperesenti 50 aya bantu tababa pa mayanda lintu batandala ukufuma ku ŋanda ne ŋanda. Pali uyu mulandu, inshita ikalamba iipooswa taikwata ifya kufumamo.
2 Imyaka ya ku numa abantu abengi balesangwa pa mayanda pa bushiku bwa pa Mulungu, ubwalemonwa mu cinkumbawile ngo bushiku bwa kutuusha. Ifintu nafyaluka. Cintu caseeka ilelo abantu ukubomba incito sha ku mubili, ukusakamana ukukabila kwa lupwa pamo ngo kushita ifya kushitashita, nelyo ukuya ku kukokoloka, ifibafumya pa ŋanda. E co nangu fye ni pa nshiku sha Mulungu, ukusanga abantu ku ŋanda ne ŋanda kusangwike ukwayafya nga nshi.
3 Nga ca kuti abantu tabali pa ŋanda, ninshi kwena nangu cibe shani bafwile ukubako kumo. Apantu ubuyo bwesu bwaba kulanda ku bantu, mulandu nshi te kulandila kuli abo tukumanya—mu musebo, pa mushiika, nelyo ku ncito. Cali mwata wa kwa Paulo ukulatununuka “abalipo,” ku kucitilo bunte. (Imil. 17:17) Ici caishileshinina ukuba umusango wa kusandulula uwa kucitilo bunte pali ilya nshita, kabili waliba musango wa kucitilo bunte uwa kusandulula mu kasuba kesu.
4 Lintu twafumina ku ŋanda ne ŋanda, ilingi line tulamona abantu baleenda panono panono nelyo pambi balepembelelako bamo. Pa bushiku bwacelebuka, kuti pambi baikala pa benci mu parka nelyo balelungisha nelyo ukusamfya motoka wabo. Ukumwentula kwa bwina mupalamano kabili ukuposha kwa bucibusa kuti kwaba fye e cintu tulekabila pa kutampa ukulanshanya. Nga ca kuti bekala lwa mupepi, kuti twalumbula fye no kuti pambi twacipusana fye panono pa ŋanda pa mwabo kabili nomba tuli aba nsansa ukuti twakwata ili ishuko lya kulanda kuli bene. Pa kuitendekelako ukulangisha ukushipa kwalundwapo, abengi baliipakisha ifya kukumanya fya kulambula.
5 Ukushipa Kwalobolola Ifya Kufumamo: Munyina umo ashimike ukuti alatununuka abantu abekeleko, abalepembelela basi, abaleendauka fye, nelyo abekele muli bamotoka babo. Mu kuba no kumwentula kwa cikabilila ne shiwi lya nsansa, amoneka ukuba umwina mupalamano wa bucibusa uuletandala fye. Muli iyi nshila alishalika impapulo ishingi ukulunda pa kutampa amasambililo ya Baibolo ayafulilako.
6 Munyina umbi no mukashi wakwe baletandala ukufuma ku mwinshi no mwinshi lintu bakumenye umwanakashi uwaleenda nasenda icola cikalamba umwali ifyo ashitile. Batendeke ukulanshanya nankwe, ukumutasha pa kubombesha kwakwe mu kusakamana ukukabila kwa lupwa lwakwe. Baipwishe ukuti: “Lelo nani engapayanishisha ukukabila kwa mutundu wa muntu?” Ico cabalamwine ubuseko bwa mwanakashi. Ukulanshanya ukwipi kwatungulwile ku kulaalikwa ku ŋanda ku mwakwe, uko bailetampa isambililo lya Baibolo.
7 E co inshita ikonkelepo ukalacitilo bunte ku mwinshi no mwinshi, nampo nga ni pa bushiku bwa Mulungu nelyo ubushiku bumbi ubwa mu mulungu, kabili wasanga ukuti abantu tabali pa mayanda, mulandu nshi te kubela fye uwashipa no kulanda ku bantu abo wakumanya—mu musebo nelyo kumbi? (1 Tes. 2:2) Napamo ubutumikishi bobe kuti bwasanduluka nga nshi, kabili uli no kusanga ubuseko bwakulilako mu mulimo obe.