Ukusekelela mu Kwingilishako Uko Lesa Alenga
1 Abena Kristu mu mwanda wa myaka uwa kubalilapo baali ni bakabilisha ba Bufumu abapimpa. Balisekelele lintu ‘inkuta shalesanduluka impendwa ubushiku no bushiku.’ (Imil. 16:5) Ukushimikila kwabo ukwashipa kwatanunukile ku Asia, Europe, na Afrika, ukulenga ukulobolola ukwingi ukwa basumina.
2 Yesu asobele ukuti mu nshiku sha kulekelesha, umulimo wa kushimikila wali no kufika ‘ku fyalo fyonse na ku nko shonse’! (Mat. 24:14) Mu mwaka wa mulimo uwa 1996, twatwalilile ukupokelela amalipoti ya kwingilishako kwa kusungusha ne fipimo fya pa muulu ifya bakasabankanya ukufuma mu fyalo ukushinguluka isonde lyonse. Ifilonganino ifingi fyalipangwa. Uku kulunduluka kwa mu kwangufyanya kwalilenga ukukabila kwa kukuula imyanda iingi iya Mayanda ya Bufumu ayapya capamo ne Fiyanda fya Kulonganinamo no kutanununa imisambo yafulilako.
3 Ubutumikishi Bwesu Ubwa Bufumu ubwa August 1996 bwacitile lipoti pa lwa mulimo wa bukuule ukalamba uulebombwa mu Afrika. Imilimo yapalako ilebombwa ukupulinkana Latin America onse. Ku mwaka wa mulimo uwa 1996, Mexico yacita lipoti icipimo ca pa muulu ica kusungusha ica bakasabankanya 470,098 na avareji wa masambililo ya Baibolo 600,751, icapindile ukupangwa kwa filonganino fipya 466! Ukutanununa kwa musambo wabo kwatantikwa ukupwishishiwa ku kupwa kwa 1998. Ukulunduluka kwapalako mu fyalo ifingi kulepinda ukukanaleka ukubomba imilimo yalekanalekana iya makuule ya teokrasi.
4 Imitengo ya makuule naikosa ukuli konse, kabili bamunyinefwe mu fyalo ifingi tabakwete ifikwatwa ifingi ifya kusangwilako. Nangu cibe fyo, pa mulandu wa kupimpa kwabo mu mulimo wa kwa Yehova, mu kushininkisha balelunduluka lwa ku mupashi no kwingilishako mu mpendwa ishikalamba. Amapinda 28:27 yalatwebekesha ukuti “uupeela kuli shimakabe, kuli wene takwaba kubulwa.” Ukuitemenwa kwesu ukwa kwafwilisha ukusangula indalama sha makuule shimbi kufumamo ‘ukulinganya’ ifikwatwa, ukulenga bonse ukuipakisha insansa isho shibako pa mulandu wa kupeela no buseko ubo bubako pa kumona ukwingilishako uko Lesa alenga!—2 Kor. 8:14, 15; Imil. 20:35.
[Icikope pe bula 4, 5]
Umusambo wa mu Paraguay
[Icikope pe bula 4]
Umusambo wa mu Ecuador
[Icikope pe bula 4, 5]
Ubukuule bwa Kutanununa mu Mexico
[Icikope pe bula 4, 5]
Umusambo wa mu Dominican Republic
[Icikope pe bula 4]
Umusambo wa mu Brazil no Kutanununwa
[Icikope pe bula 4, 5]
Ubukuule bwa Musambo wa mu Uruguay
[Ifikope pe bula 5]
Amayanda ya Bufumu ayashakoso mutengo mu Latin America
1. Brazil
2. Nicaragua
3. Chile
4. Colombia
5. Mexico
6. Brazil
7. Peru
8. Venezuela
9. Mexico