Ukupepa kwa Cine Kulelunduluka mu Eastern Europe
1 Abena Kristu ba mu mwanda wa myaka uwa kubalilapo bali ni bakashimikila bapimpa aba Bufumu. Balisekelele ilyo inkuta ‘shalesanduluka ubushiku no bushiku.’ (Imil. 16:5) Ukushimikila kwabo ukwashipa kwalengele ukupepa kwa cine ukufika ku Asia, ku Afrika, na ku Bulaya, kabili balilobolwelemo abasumina abengi nga nshi.
2 Muli ino nshita ya ku mpela, ukupepa kwa cine kuletwalilila maka maka ukulunduluka mu fyalo fya ku Eastern Europe. Mu fyalo umo twabindilwe ku buteko mpaka ku kutendeka kwa ba 1990, ndakai kuli ukusanduluka kwa cipesha mano. Icitabo ca 1999 Yearbook cilelondolola ukuti ifyalo fibili ifya kuli iyi ncende, Russia na Ukraine, fyatumine amalipoti ya kuti fyakwata bakasabankanya ukucila 100,000 abalebombako ubutumikishi bwa ku cintubwingi. Mu fifulo fya kubombelamo 15 ifyaba mu calo cali kale Soviet Union, ukufuma mu 1991 abantu ukucila 220,000 baliipeela kuli Yehova kabili balibatishiwa! Uko kukula kwa lubilo lubilo kwalilenga ukukabila kwa kukuula Amayanda ya Bufumu ayengi ne Fiyanda fya Kulongana Kukalamba. Calilenga no kulatanununako ifikuulwa fimo ifya maofeshi ya Sosaite.
3 Indalama shimo isha Mayanda ya Bufumu ku Sosaite shilebomfiwa ku kupeela ifilonganino amaloni mu fyalo umo balekabila Amayanda ya Bufumu mu kampampa, lelo umushaba icuma kabili ubunonshi bwalyafya. Pa kati ka March 1996 na October 1998, Sosaite yapeele amaloni ya Mayanda ya Bufumu ku filonganino 359 ukufuma ku maofeshi yangalila umulimo mu fyalo 11 ifya mu Eastern Europe. Indalama shisangulwa shilabomfiwa ku kushita impanga ne fisolobelo fya kukuulila Amayanda ya Bufumu ayapya na ku kwafwilisha ifilonganino ukuwamya ifikuulwa fya kale. Ifikope fili muno filelangilila ifyo Indalama sha Mayanda ya Bufumu ku Sosaite ishifuma ku United States na ku fyalo fimbi, shileafwilisha bamunyina ku Eastern Europe.
4 Mu 1998, mu calo ca Bulgaria, bakasabankanya balundilweko amapesenti 12, kabili bamunyina balicincimushiwe ilyo Ing’anda ya Bufumu iya kubalilapo yapeelwe mu April uyu wine mwaka. Bakasabankanya mu calo ca Croatia balundilweko amapesenti yane, kabili pali ndakai bamunyina kulya balekuula Amayanda ya Bufumu na yambi ku kulundulula ukupepa kwa cine. Ku Hungary, Amayanda ya Bufumu 80 yalebomfiwa ne filonganino 144. E kutila pa filonganino 235 ifyaba muli ici calo, amapesenti 61 fyaliikwatila umwa kupepela. Ku Macedonia amayanda yabili nayapwishishiwa muli programu wa bukuule bwa Mayanda ya Bufumu, kabili bacili balekuula na yambi. Mu lusuba lwa kuli cilya calo ulwa mu 1999, Ing’anda ya Bufumu iya minkubili yalipwishishiwe mu musumba wakulisha uwa Skopje. Iyi ng’anda kuti yabomfiwa ne filonganino 6.
5 Uyu mwaka wapwile ku Russia, nga kwakanya pa milungu yonse, abantu 260 e balebatishiwa cila mulungu! Ukukonka fintu caba mu fyalo fimbi, amaofeshi ya Sosaite ku Russia nayateyanya baKomiti ba Makuule aba mu Fitungu 12 mu ncende ishaikulila iyo bangalila, ku kwafwilisha amakuule ya ku ntanshi aya Mayanda ya Bufumu. Ku kapinda ka ku kuso aka musumba wa St. Petersburg, balekuula Iciyanda ca Kulongana Kukalamba umwingekala abantu 1,600 icikaba e ca kubalilapo muli cilya calo. Apa pene bakakuulapo na Mayanda ya Bufumu yasano, muli cila ng’anda kuti mwaikala abantu 200. Pa kusakamana bwino ukukabila kwa ku mupashi ukwa bamunyinefwe na balefwaya ukusambilila icine abengi ku Ukraine, Amayanda ya Bufumu 84 yalipwa kale, kabili yambi 80 yalekuulwa.
6 Bushe uku kusanduluka kuli ku Eastern Europe takulelenga imitima yesu ukusekelela? Te mulandu twikala kwi, ukulunduluka kwa kupepa kwa cine kulatucinkulako ukuti Lesa taba na kapaatulula no kuti ukutekanya kwakwe kukalenga “ibumba likalamba” ukwisapusuka. (Ukus. 7:9; 2 Pet. 3:9) Mwandi lishuko tukwete ilya kubaafwako apapelele amaka yesu pa kuti bamunyinefwe bengalunduluka lwa ku mupashi! Amapinda 28:27 yatwebekesha ukuti “uupeela kuli shimakabe, kuli wene takwaba kubulwa.” Ukuitemenwa kwesu ukusangwilako kuli uyu mulimo wa bukuule kulalenga kwaba “ukulingana” mu fya bunonshi, ukulenga bonse ukuba ne nsansa shaba mu kupeela no kusangalala kwisako pa mulandu wa kwafwilishako no kumona ukulunduluka kwa kupepa kwa cine mwi sonde lyonse.—2 Kor. 8:14, 15; Imil. 20:35.
[Icikope pe bula 3]
Ku Săcele, mu Romania
[Icikope pe bula 3]
Ku Maardu, mu Estonia
[Icikope pe bula 3]
Ku Sevnica, mu Slovenia
[Icikope pe bula 3]
Ku Tiszavasvári, mu Hungary
[Ifikope pe bula 4]
Ku Jūrmala, mu Latvia
[Ifikope pe bula 4]
Ku Tallinn, mu Estonia
[Icikope pe bula 4, 5]
Ku Taurage, mu Lithuania
[Ifikope pe bula 4, 5]
Ku Belgrade, mu Yugoslavia
[Ifikope pe bula 5]
Ku Prievidza, mu Slovakia
[Icikope pe bula 5]
Ku Mátészalka, ku Hungary
[Ifikope pe bula 6]
Ku Ruma, mu Yugoslavia
[Icikope pe bula 6]
Ku Vranov nad Topl’ou, mu Slovakia
[Ifikope pe bula 6]
Ku Tornakalns, mu Latvia