Ukukuula Amayanda ya Bufumu mu Fyalo Fimo Ifya ku Bulaya
1 Mu myaka ya nomba line umulimo wa Nte sha kwa Yehova mu fyalo fimo ku Bulaya, na ku Kabanga ka Bulaya, walibindilwe. Ilingi ifibindo fyaleluma sana. Caleyafya ukulonganina pa lwalala, kabili calicililepo no kwafya ukulonganina mu Ng’anda ya Bufumu. Lelo, mu myaka ya nomba, ‘Yehova alitucitile fikalamba; twalisamwa.’—Amalu. 126:3.
2 Ukutula 1983, ukucusha Inte sha kwa Yehova kwaile kulepwa. Mupepi na 1989, ifyalo fya Poland na Hungary fyalisuminishe Inte sha kwa Yehova. Mu 1991, Inte sha kwa Yehova balilembeshiwe mu Russia. Ukutula lilya, umulimo walilunduluka mu Russia na mu fyalo fyaleitwa kale Soviet Union. Pa kati ka March 1996 na October 1998, Ibumba Litungulula lyasuminishe no kupeela loni ku maofeshi yanono ayalolekesha pa fyalo 11 ifya ku Bulaya pa kuti bengakuula Amayanda ya Bufumu 359.
3 Ilyo muletamba ifikope fili pali ici ca mukati, tontonkanyeni pa fintu fikalamba kabili ifishaiwamina ifyo Yehova acitila abantu bakwe. (Amalu. 136:4) Mwalaba ne nsansa ukwishiba ukuti imisangulo ya bamunyina mwi sonde lyonse ilebomfiwa bwino sana, ukulingana na mashiwi Yesu alandile, ayaba pali Yohane 13:35, ayatila: “Muli ici e mo bonse bakeshibilo kuti muli basambi bandi, nga mwaba no kutemwana.”
4 Pa fyalo fya ku Bulaya ifimwenenemo muli programu wa kwaafwa ukukuula Amayanda ya Bufumu mu fyalo ifishakwata sana indalama pali ne calo ca Romania. Muli ici calo Amayanda ya Bufumu 36 yalikuulwa ukutula mu July 2000. Icalo ca Ukraine cakuulile Amayanda ya Bufumu 61 mu mwaka wa 2001 kabili cakuulile na yambi 76 mu 2002. Indalama shisangulwa ku cipao ca Ndalama sha Mayanda ya Bufumu shalenga Amayanda ya Bufumu ayengi ukukuulwa mu Bulgaria, Croatia, Macedonia, Moldova, Russia, na Yugoslavia.
5 Ukukuula Amayanda ya Bufumu mu fyalo fimo takwayanguka, kabili kulaba ukubombesha pa kuti ukukuula kutendeke. Ilingi line cilasenda inshita pa kuteyanya ubukuule. Kabili, pa kukuula Ing’anda ya Bufumu muli iyi ncende ya ku Bulaya palapooswa indalama ishingi ukucila ishipooswa mu ncende ishingi isha mu Afrika nelyo South America. Na lyo line, pa mulandu wa bwingi bwa bakapepa ba kwa Yehova, Amayanda ya Bufumu ayengi yacili yalekabilwa mu fyalo fya ku Bulaya ifishakwata sana indalama!
6 Mwandi cakupapa ukumona ifyo aya Mayanda ya Bufumu yalekuulwa mu kwangufyanya! Ubunte busuma bwalibilwa ku bekala mupepi na kuntu yakuulilwa, nga fintu ifyacitika kale ifingi filelanga. Mu ncende shimo, ubuteko bwa cikaya bwalitemwa pa kumona ukwikatana kwabapo mu kukonka ifipope fya mikuulile.
7 Esaya alilungike pa fyo aseseme ukulosha ku kulunduluka kwa kupepa kwa cine pali lelo. Ukupitila muli kasesema Lesa asobele ati: “Ine Yehova ne wasose ci, mu nshita ya ciko nkacilengo kukalakasha.” (Esa. 60:22) Cine cine, imyaka 10 iyapita yaba ni nshita ya kwa Yehova iya kulundulula umulimo wakwe ku Kabanga ka Bulaya. Shi Yehova natwalilile ukupongolwela amapaalo yakwe pa kubombesha kwesu pa kuti kube ukukwankwanya ukukuula Amayanda ya Bufumu mu fyalo ifingi ilyo tulesangwilako ku cipao ca Ndalama sha Mayanda ya Bufumu! Ici cikalenga Amayanda ya Bufumu na yambi ayengi ukulundwako mu fyalo ifishakwata sana indalama. Cikalenga ukupepa kwa cine ukulunduluka mu fyalo ifingi ifya ku Bulaya no kushimikisha ku “mpela sha pano isonde.”—Imil. 13:47.
[Ifikope pe bula 3]
Ing’anda ya Bufumu Moscow, Russia
[Ifikope pe bula 4-6]
Amayanda ya Bufumu ayapya ku Kabanga ka Bulaya
Strumica, Macedonia
Daruvar, Croatia
Bitola, Macedonia
Sokal, Icitungu ca Lviv, Ukraine
Kurdzhipskoye, Maykop, Russia
Bački Petrovac, Yugoslavia
Plovdiv, Bulgaria
Mladost, Bulgaria
Icitungu ca Tlumach, Ivano-Frankivsk, Ukraine
Rava-Ruska, Icitungu ca Lviv, Ukraine
Stara Pazova, Yugoslavia
Zenica, Bosnia na Herzegovina
Sokal Lviv, Ukraine
Zhydachivl Lviv, Ukraine