Programu ya Kukuula Amayanda ya Bufumu Iletwalilila
1 Mu 1983 pe Bungano lya Citungu ilya “Buumo bwa Bufumu” mu United States, kwali ukubilisha kwa kuti icipao caibela cali no kupangwa ku kwaafwilisha ukukuula no kuwamya Amayanda ya Bufumu mu United States monse na mu Canada. Tatwailwike amapaalo yali no kufuma mu kutendeka kunono ukwa musango yo. Twatendeke ukumona sana ico Amalumbo 92:4 yasosa bwino ayati: “Pantu mwanengo kusamwa, mwe Yehova, ku kubomba kwenu; ku milimo ya minwe yenu e ko ndeawila.”
2 Nomba tulesekelela apakalamba pa filecitwa. Ndakai kuli programu wa kukuula Amayanda ya Bufumu mu calo conse. Ifwe bonse twalikwata ishuko lya kubombako uyu mulimo mu nshila imo. Tucite fi pa kusangwilako indalama ishingi atemwa ishinono ku kwafwilisha ukukuula ififulo ifingi ifya kupepelamo mu calo conse. Bamunyinefwe abengi na bo balaitemenwa ukubomfya ifipe fyabo pamo ne nshita, amaka, nelyo ukulamuka kwabo mu milimo ya musango yo. Icilenga uyu mulimo ukubombwa bwino butungulushi bwa kwa Yehova, ukutungilila kwakwe, e lyo ne fyo atupaala apakalamba pa fyo tubombela pamo.—Amalu. 127:1.
3 Ukukonka ukutantika ukwacitiilwe ifilonganino fya mu United States, amaofeshi yanono aya mu Zambia yalikwata icipao pa myaka 4 nomba. Pa Mayanda ya Bufumu mu fyalo ifingi, kwaliba akabokoshi umo bakasabankanya babika imisangulo iiya kuli ici Cipao ca kwafwilisha ukukuula Amayanda ya Bufumu. Ukutula apo Icipao ca Sosaite ica Mayanda ya Bufumu capangilwe mu 1983 mu United States, bamunyinefwe balasangwilako nga nshi, icalenga ukuti kube ukupeela amaloni ya Mayanda ya Bufumu. Kale kale ifilonganino fimo muli cino calo fyalimwenamo muli uku kutantika. Ukutula apo iyi programu yatendekele mu June 1999 ukufika mu May uno mwaka, Amayanda ya Bufumu 514 yalikuulwa. Ifilonganino ifingi nga tafyakuulile Amayanda ya Bufumu ayapya nelyo ukuwamya ayalekabila ukuwamya. Nomba kuli ukukabila kwa kubomfya ishi ndalama shimo ishasangulwa ku kupeela ifilonganino amaloni. Sosaite ilatasha nga nshi ifyo mutwalilila ukwaafwilisha uku kutantika kabili ne filonganino fimwenamo mu misangulo yenu na fyo filatasha.
4 Kulya kubilisha ukwacitilwe kuli bamunyinefwe mu United States kwali kubalaalika ukubombako muli programu wa kukuula Amayanda ya Bufumu mu kwangufyanya. Icipao ca Mayanda ya Bufumu cali no kukula ku kusakamana ukukabila kwa bamunyinefwe mu fyalo fimbi, pamo ne calo ca Zambia, uku ninshi baletwalilila ukupeela amaloni ya kukuulila Amayanda yabo aya Bufumu. Kuli ukukabila kwa mutatakuya ukwa kukuula Amayanda ya Bufumu mu calo conse. Mu mwaka fye wa mulimo uwapwile, ifilonganino 3,288 fyalipangilwe. Ifilonganino ifingi pali ifi fyaba mu Afrika, Asia, Central na South America, na ku Kabanga ka Bulaya.
5 Bushe cinshi cacitika ukutula ilya nshita? Icitabo ca 2001 Yearbook cashimike ati: “Pa mulandu wa uku kutantika, mu fyalo 30, Amayanda ya Bufumu 453 yalikuulwa, kabili ifikuulwa fimbi 727 filekuulwa. Icikomailwapo kupanga amaplani ya Mayanda ya Bufumu mu calo cimo cimo ayengakuulwa ukubomfya ifisolobelo fya muli ico calo no kukonka inshila bakuulilamo. Mu Kenya, babomfya amabwe; mu Togo ilingi babomfya njelwa; mu Cameroon mwaba sana ayakuulwa na matafwali kabili pa numa ukushingulako. Muli iyi nshila, bamunyinefwe muli ifi fyalo balasambilila bwangu ifikabilwa pa kubomba imilimo ikalamba muli programu wa mu calo cimo cimo.”
6 Ubushininkisho bwa kuti Yehova alepaala iyi programu kuti bwamonwa mu calo ca Afrika. Ilyo mulemona ifikope fya Mayanda ya Bufumu yamo ayakuulwa, elenganyeni ifyo ici cakuma umulimo wa Nte sha kwa Yehova! Ici ca cine mu mbali shitatu ishalekanalekana—ukwikatana kwa bwananyina bwa mwi sonde lyonse, ifyo cikuma abantu, kabili ukufula kwa bantu basangwa pa kulongana kwa cilonganino. Nangu ici ca mu kati cilelanga Amayanda ya Bufumu ayakuulwa mu Afrika, programu wa kukuula Amayanda ya Bufumu iletwalilila mu ncende shimbi sha calo.
[Ifikope pe bula 3]
CENTRAL AFRICAN REPUBLIC
Bimbo, Bangui
Begoua, Bangui
[Ifikope pe bula 4]
Ukonga, Tanzania
[Icikope pe bula 4]
Accra, Ghana
[Icikope pe bula 4]
Salala, Liberia
[Icikope pe bula 4]
Karoi, Zimbabwe
[Ifikope pe bula 4, 5]
Allada, Benin—iyali kale Ing’anda ya Bufumu
Allada, Benin—Ing’anda ya Bufumu iipya
[Icikope pe bula 5]
Kpeme, Togo
[Icikope pe bula 5]
Sokodé, Togo
[Ifikope pe bula 4, 5]
Fidjrosse, Benin
[Icikope pe bula 6]
Lyenga, Zambia—iyali kale Ing’anda ya Bufumu
[Icikope pe bula 6]
Lyenga, Zambia—Ing’anda ya Bufumu iipya
[Icikope pe bula 6]
Kinshasa, Congo
[Icikope pe bula 6]
Musambira, Rwanda