Ukulunduluka Kwatwalilila Kulekusha Ukukabila kwa Kukuula Amayanda ya Bufumu
1 Ku kale kasesema wa kwa Yehova asobele ukuti ‘ifisuma fya nko shonse fikesa.’ (Hag. 2:7) Ukwabulo kutwishika tulemona ubushininkisho bwa fyo ukusambilisha kwa bulesa kulelenga imintapendwa ya bantu ukusambilila icine no kusanguka bakapepa ba kwa Yehova. Ala ca kucincimusha ukwishiba ukuti abantu 8,012 balibatishiwe mu mwaka wa mulimo uwa 2001 muno Zambia mweka! Pa kutwalilila ukwafwa abapya bonse aba, tulekabila ‘ukubike mitima yesu pa mibele yesu’ ku kushininkisho kuti tuletungilila umulimo wa kwa Lesa apapela amaka yesu. (Linganyeniko Hagai 1:5.) Ulubali lumo ulwacindama ulo twingalangilamo ukuti tulatungilila umulimo wa kwa Lesa kwafwilisha mu makuule ya mayanda ya kulonganinamo bacinkupiti bapya abaleilunda ku kulumbanya Yehova.
2 Icipao ca Sosaite ica Mayanda ya Bufumu muno Zambia calibomba ukucila pa myaka itatu nomba. Mu mwaka wa mulimo uwa 2001, Amayanda ya Bufumu 118 e yakuulilwe. Icacilapo ukuwama, ca kuti bakasabankanya abengi balyankulako bwino ku kutungilila ici cipao ukupitila mu kusangwilako indalama shibomfiwa ku kukuula Amayanda ya Bufumu yambi. Ilyo ifilonganino fyabwesha indalama bafikongwesha, shitwalwa kuli ici cipao pa kuti shonse ishisangulwa shitwalilile ukubomfiwa, umwaka no mwaka, ku kukuula Amayanda ya Bufumu ayapya.
3 Ukwafwilishiwa ne Fitungu fya Bakuula Amayanda ya Bufumu: Ifitungu 16 ifya Bakuula Amayanda ya Bufumu muno Zambia e fileafwilisha mu makuule ya Mayanda ya Bufumu ayapya na mu kuwamya aya kale. Bafwilisha ukuceeceeta ukumona nga Ing’anda ya Bufumu iipya ilekabilwa nelyo ukuwamya fye iyabapo kale no kwafwilishako muli fimbi ifikabilwa ilyo incende ya kukuulapo ishilashitwa ukufika fye na lintu Ing’anda ya Bufumu yakuulwa. Cila cilonganino cibombelwa ne citungu cimo pali ifi.
4 Bakabomba ba kuitemenwa abengi baliipeela ukubombako umulimo wa kuwamya Amayanda ya Bufumu no kukuula ayapya. Aba ni bakabomba ba kuitemenwa ababomfya inshita yabo na maka yabo mu kwafwa ukubombe milimo pamo nga ukushite ncende ya kukuulapo, ukupoke fipepala fya kushitilapo impanga, ukushila bapulani, no kulemba umutande wa fintu fifwile ukushitwa. Balaafwa na mu kushita ifisolobelo fisuma pa mitengo yanaka, ukuwamya icifulo ca kukuulapo, no kwangalila fye ubukuule bwine. Bukapekape bwa musango yo ubwa fikwatwa fyabo ifyo abene bengatemwa ukubomfya lelo bafipeela ku kutungilila ifya Bufumu bulatashiwa nga nshi kabili bulaleta amapaalo ukufuma kuli Yehova.—Amapi. 11:25.
5 Baeluda bafwile ukulembela kangalila wa Citungu ca Bakuula Amayanda ya Bufumu aba mu ncende yabo ilyo icilonganino cabo catendeka fye ukutontonkanya pa kuwamya Ing’anda ya Bufumu iyabapo kale nelyo pa kukuula iipya. Mulandu nshi? Bakangalila ba Fitungu fya Bakuula Amayanda ya Bufumu balipeelwa ifyebo fya kubatungulula ifingaafwa ifilonganino mu mapekanyo yabo aya kubalilapo. Fingi fifwaikwa pa kusala incende apa kukuula ukucila pa kwishiba fye umutengo wa iyo ncende. Kwabe fintu fimbi ifingalenga umutengo wa ncende ya kukuulapo ukukosa, limbi kuti paba umulimo uukalamba uwa kuwamya fye icifulo, ukufumyapo fyonse ifyabapo ifingaba no busanso nelyo sumu, nelyo ifingalenga mwatwalwa ku cilye. Nga ca kuti icilonganino cilekabila ubwafwilisho mu fya ndalama ukufuma ku maofeshi ya Nte sha kwa Yehova, Bakangalila ba Fitungu fya Bakuula Amayanda ya Bufumu balikwata amaformu yetwa Kingdom Hall Loan Survey kabili kuti baafwa baeluda ba mu filonganino ukwisushisha aya maformu.
6 Amaofeshi ya Nte sha kwa Yehova yalipeela Ifitungu fya Bakuula Amayanda ya Bufumu amapulani yashililwa limo aya kupangilamo slabu wa Mayanda ya Bufumu. Ukubomfya aba bapulani bashililwa limo kulacefyako indalama shipooswa pa bukuule kabili ifilonganino filakwata icikuulwa calinga lelo icakuulwa bwino kabili icalingana ne mikuulile yasuminishiwa.
7 Ifyo indalama shilebomfiwa filingile ukulembwa mu kulungika kabili fifwile ukube fyalondoloka. Bamunyina ababomba mu Fitungu fya Bakuula Amayanda ya Bufumu balafwa ifilonganino ukwisushisha baformu betwa Kingdom Hall Financing Request forms. Ilyo umulimo wapwa, Icitungu ca Bakuula Amayanda ya Bufumu cilatuma ku maofeshi ifyebo fyonse ifikumine indalama shapooselwe ne fikumine ukulipila indalama sha loni wapokelwe ukuti fikayepitulukwamo umuku wa kulekelesha.
8 Abapita Nshila Batasha: Ubushininkisho bwa kubomba kwa mupashi wa mushilo uwa kwa Yehova pali bamunyinefwe ababombela pa kukuula Amayanda ya Bufumu bwaba bunte ubulecitwa ku bantu bambi. Ifipe fyalekabilwa ku kukuula Ing’anda ya Bufumu imo fyashitilwe ku kampani kamo, kabili pa numa umukalamba wa ako kampani alembele ati: “Nshileibukisha ukumona ibumba lya bantu abanengele ukumfwa bwino pa mulandu wa mibombele yabo nge fi Inte sha kwa Yehova shanengele ukumfwa ilyo balebomba umulimo wa bukuule. Caliweme nga nshi kuli ine ukumona uko balebomba, kabili nali uwa nsansa ukubombako nangu ca kuti ni panono fye. Tulemutasha imwe na bantu benu, kabili tulemulombela ipaalo mu makuule yenu yambi.”
9 Icacitike cimbi ca kuti umwiminishi wa kampani kashitisha ifipe alipeelwe umulimo wa kulasangwa amaawala yanono pa ncende ya buukule pa nshiku shitatu. Atile: “Ninonkelamo nga nshi ukuba pano na imwe ino mpela ya mulungu. Ifyo nalemona Inte sha kwa Yehova te fyo ndeshimona nomba! Mulacite fyacila pa kuya fye mulekonkonsha pa mayanda. Lishuko ukuti nalibombeleko na ine. Mwikapapa nga mwamona mu kulongana kwenu ukwa ku cintubwingi.”
10 Ilyo ubukuule bumo bwapwile, umulashi umo alembele ati: “Caliweme nga nshi ukumona abantu abengi aba kuitemenwa fye balebombela pamo ku kukuula icikuulwa mu nshita iinono fye. Mwandini cikuulwa capuulama. Abekala muli iyo ncende balelandapo ukuti cakuulilwe bwangu bwangu. Ing’anda ya Bufumu iipya naiyemfya icifulo cesu, kabili tuleisengela pamo pene ne cilonganino cenu.”
11 Bakabomba ba Kuitemenwa na Bambi Balekabilwa: Ifitungu fya Bakuula Amayanda ya Bufumu fifwaya ukubomba na bantu abalamuka mu fya makuule aba mu filonganino ifikalalonganina mu Mayanda ya Bufumu ayapya nelyo ayawamishiwa. Kabili balabomba na ba bwananyina bambi aba mu ncende muli ubukuule, maka maka baeluda na babomfi batumikila, ku kubakansha ukubomba imilimo ilekabilwa. Nga balundulula ukulamuka ukwingabomfiwa mu Makuule ya Mayanda ya Bufumu, aba bwananyina aba abakosoka lwa ku mupashi kuti nomba batendeka ukwafwa ukukuula Amayanda ya Bufumu yambi mu ncende bekala. E co, ababishanya ne cilonganino cilekuula Ing’anda ya Bufumu bafwile ukuba abaitemenwa kabili abafwaya ukubombela pamo, tabafwile ukulaenekela ukuti Icitungu ca Bakuula Amayanda ya Bufumu na balebomba pamo na cene e bafwile ukubombe milimo yonse iikumine Ing’anda yabo iya Bufumu. (Nehe. 4:6b) Pa numa ya kukanshiwa, ukutemwa kufwile ukulenga aba bwananyina ukwafwako ifilonganino fimbi ukukuula Amayanda ya Bufumu ifyo fishikwete ififulo fya kulonganinamo ifipya nelyo ifyawamishiwa.—Nehe. 5:19; Fil. 2:3, 4.
12 Bakasabankanya babatishiwa abaishibisha imilimo imo kabili aba mibele isuma mu cilonganino balekoseleshiwa ukuitemenwa ukwafwa muli uyu mulimo wakulisha. Abalekabilwa ni balya abaishiba ifya makuule e lyo na baishiba fye imilimo imbi. Abalefwaya kuti bapoka amaformu yakabilwa kuli kangalila wa kutangilila nelyo kalemba mu cilonganino baba no kulondolola incito balamukamo ne myaka babomba iyo ncito, pamo nga ukwipika ifya kulya, ifya kucingilila amasanso, ukusakamana ifipe, buakauntanti, ne fya kupoka amapepala ya mwi funde. (Icilonganino nga cilekabila amaformu na yambi aya bakuitemenwa, kuti baorda yene ilyo baletuma orda wabo uwa fitabo uwa cila mweshi ku ofeshi.) Ukwankulako muli iyi nshila ninshi tulelanga ukuti twalitemwa abanensu sana, e kutila bamunyinefwe ba Bwina Kristu.—Mat. 7:12; 22:39; Yoh. 13:35.
13 Tulatasha Nga Nshi Ababomfi ba Kuitemenwa: Abengi tabaishiba imilimo yaba mu Bukuule bwa Ng’anda ya Bufumu ukufikila babombako uyu mulimo. Pa numa ya kupwisha ukukuula Ing’anda ya Bufumu imo, baeluda balembele abati: “Twalitashishe nga nshi ifyo bamunyinefwe ababomba ne Citungu ca Bakuula Amayanda ya Bufumu baletutungulula mu kutekanya. Ilyo twaibukisha ukwafwa uko batwafwile pa kututungulula no kwampanya ababomfi balamuka, twibukisha ne lembo lya 1 Petro 5:2, 3, apo tubelenga pa lwa bacemi abacema ‘te ku kupatikishiwa lelo ku kuitemenwa; te ku kumwenamo ubunonshi bwa nsoni, lelo ku kucincila kwa mutima; te kuumyo lupaka pa baseekeshiwa kuli imwe, kano ukube ca kumwenako ku mukuni.’ Aba bamunyinefwe cine cine baba fya kumwenako ifisuma ifya babomfi baipeelesha kuli Yehova. Mu nshita yonse iya bukuule, kwali imiku iingi sana iyo tushingakumamo ukupenda ilyo aba bwananyina baendele intamfu yalepa, bapoosele amaawala ayengi, bayashimishe ifipe fyabo ne fisolobelo, kabili bamo batupeele fye ne fi fipe, pa kuti fye batwafwe ukukuula Ing’anda yesu iya Bufumu iipya. Bukapekape bwa aba bamunyinefwe cilangililo cikalamba ica kuti ‘balitemwa aba bwananyina bonse,’ kabili mwandini ici calitukoseleshe!—1 Pet. 2:17.”
14 Ukuitemenwa no kupimpa kwa bamunyinefwe filamoneka, nga fintu bamo aba mu Citungu ca Bakuula Amayanda ya Bufumu balembele ati: “Mwandini cali ca nsansa nga nshi ukumona aba ndimi shalekanalekana bonse balebombela capamo abaikatana mu kupepa Yehova!” Ukwabulo kutwishika, amashiwi ya pa Amalumbo 133:1, 3 ya cine ayatila: “Moneni, ifyo kwawama kabili ifyo kwa nsansa ukwikalilila pamo kwa ba bwananyina!” Eluda umo uwabombele pamo ne Citungu ca Bakuula Amayanda ya Bufumu alembele ukuti lyali lishuko nga nshi ukupyungila bamunyina. Atile “ifilonganino filakoseleshiwa apakalamba ku ba bwananyina abenda intamfu ishitali ku kubaafwa ukufishapo ukuipeela kwabo kuli Yehova. . . . Cine cine, twaliba muli bumunyina bwa kutemwa!”
15 Pa kutasha umulimo wabombelwe pa Ng’anda ya Bufumu imo, kangalila wa kutangilila alembele ati: “Uyu mulimo nga tawabombelwe atuba fye fweka pantu mu cilonganino cesu mwaba bamunyinefwe abakoloci abengi. E co tulemutasha nga nshi imwe bamunyinefwe na bambi abapala imwe abatemwa Yehova kabili abafwaya ukulanga uku kutemwa. Tulefwaya ukweba aba bamunyinefwe atuti: ‘E pashili pa kuleka.’ Bamunyinefwe abengi balemwenamo mu kubombesha kwenu kabili ukwabulo kutwishika mulelenga Shifwe, Yehova, ukusekelela.” Ibumba lya baeluda limbi na lyo lyalembele aliti: “Ifwe fwe bene natwishiba ifyo abengi babombeshe ukukuulako.” (File. 21) Abashili Nte muli ino ncende balisosa abati ‘Yehova ali na imwe!’”
16 Imisangulo ya Ndalama Iletwalilila Ukwafwa: Imisangulo ishaifulila ku Cipao ca Sosaite ica Mayanda ya Bufumu kale kale yalyafwa ifilonganino kabili ikatwalilila ukucite fyo ku ntanshi. Bushe Yehova Lesa umwine wine te solwesolwe mu kupeela kwabula akaso? (Yako. 1:17) Ca cine ukuti imibele yesu ne nshita tukwata isha kusangula filapusana, lelo kuti twasanga ukuti nga twacefyanyako ukupoose ndalama pa fintu fimo, kuti tulesangwilako sana ku mulimo wa makuule. Bukapekape bwa musango yo cine cine bulalenga umutima wa kwa Yehova ukusekelela, no kukoselesha sana bamunyinefwe.
17 “Ibumba likalamba” lileya lilelundako fye ukwankula ku bukombe bwa Bufumu pali lelo. “Ifisuma” filekonkomokela kwi tempele lya ku mupashi ilya kwa Yehova, kabili ‘aleisusha mu ng’anda yakwe ubukata.’ (Ukus. 7:9; Hag. 2:7) Shi natube nga baYuda ba busumino aba nshita ya kwa Hagai, ukubika imitima pa mulimo wa kwa Lesa, ukutungilila nga nshi ukukabila kukalamba ukwa Mayanda ya Bufumu na yambi. Nangu ca kutila Amayanda ya Bufumu ayengi nga nshi nayakuulwa mu myaka ya nomba line, ukulunduluka na ko kuletwalilila ukukulilako. Nga twatwalilila ukutungilila Icipao ca Sosaite ica Mayanda ya Bufumu ninshi tulebombako umulimo wa kwa Lesa mu nshila iishaiwamina.