Ukukuula Amayanda ya Bufumu—Umulimo wa Mushilo Uwacindama
1. Bushe finshi fyacitika mu kukuula Amayanda ya Bufumu, lelo cinshi icicili cilekabilwa?
1 Mu myaka fye isano, umusambo wa Zambia wakuulile Amayanda ya Bufumu 1,248, e lyo ayo umusambo wawemye yali 8. Mukwai tuletasha nga nshi ababa mu Mabumba ya Bakakuula ba Mayanda ya Bufumu na bonse abaafwilisheko ukukuula pa kubombesha kwabo. Kwena umulimo ubombelwe ukalamba, lelo kucili imilimo na imbi iingi iilefwaikwa ukubombwa mu kukuula Amayanda ya Bufumu. Bushe ifwe bonse kuti twacita shani pa kuti twafwilishe uyu mulimo wa mushilo uwa kwa Yehova?—Ukus. 7:15.
2. Bushe kuti twaafwilisha shani umulimo wa kukuula Amayanda ya Bufumu?
2 Ipeelesheni: Nga ca kutila mwalibatishiwa no kubomba mulebomba fye bwino mu cilonganino, tulemukoselesha ukuipeelesha ukubombela pamo na Mabumba ya Bakakuula ba Mayanda ya Bufumu ababeela ku ncende ya ku mwenu. (Amalu. 110:3) Bonse abalefwaya ukubombako umulimo bafwile ukubomba ukwabula ukupatikishiwa kabili bafwile ukuba aba cumfwila. (Amalu. 133:1; Efes. 4:16) Nangu tamwaishiba kukuula, kuti mwabombako fimo pa bukuule. Kabili kuti mwasambilila imilimo iingalenga mwaisabomfiwa sana ku ntanshi.
3. Finshi fimbi twingacita pa kuti twafwilishe ubukuule?
3 Nga ca kutila icilonganino cabela ku ncende ya ku mwenu cilekuula Ing’anda ya Bufumu e lyo mwamona ukutila kwena te kuti mubombeko uyu mulimo wa kukuula, kuti mwakoselesha bambi abengabombako uyu mulimo. Baeluda nga bateyanishisha libela, icilonganino kuti casakamanwa bwino ilyo bamo baya ku kukuula Ing’anda ya Bufumu. Cine cine Yehova alatemwa nga tulebombela pamo ukulundulula ifya Bufumu.—Heb. 13:16.
4. Bushe kuti twakoselesha shani abalekuulako Amayanda ya Bufumu?
4 Mulekoselesha: Inshita ikalamba no kubombesha filakabilwa pa kuti ifikuulwa fya kupepelamo ne milimo imbi iya Bufumu ibombwe. E ico kanshi, limo limo abaitwa ku kuyakuulako, bakulafumapo pa ng’anda na pa filonganino. Mukwai kanshi tuletasha abaipeelesha ukubombako iyi milimo no kubakoselesha, pantu aba bantu balaipusula pa kuti babombeko “uyu mulimo uulekabilwa.”—Imil. 6:3; Rom. 14:19.
5. Bushe ababomfi abaipeela ukukuula kuti babomba shani ukwabula ukulekelesha imilimo imbi?
5 Mulebomba Bwino Imilimo Yonse: Ukubila imbila ya Bufumu bwa kwa Lesa e mulimo wesu uukalamba. (Marko 13:10) E ico, Amabumba ya Bakakuula ba Mayanda ya Bufumu abangalila amakuule, balesha na maka ukutantika ukukuula mu musango wa kuti abaipeele ukubombako uyu mulimo tabalepuswa ku kulongana nelyo ukufilwa ukubombako umulimo wa mwi bala. Na babomfi abaipeela ukukuula na bo balesha na maka ukubomba bwino imilimo yabo yonse ukwabula ukulekelesha imo. Kabili balapekanishisha na libela uwa kubomba imilimo yabo iya pa cilonganino nga bafumapo.
6. Cinshi cicitika nga ca kuti bonse mu cilonganino balebombela pamo ukulundulula ukupepa kwa cine?
6 Umutumwa Paulo alondolwele aba mu cilonganino nga balebombela pamo pa kuti balenge “umubili ukukula ku kuikuula uwine mu kutemwa.” (Efes. 4:16) Icitemwiko cesu kuli Yehova na ku kupepa kwa cine kulalenga twabombela pamo na bambi ukwafwilisha umulimo wa kubila imbila nsuma no kukuula Amayanda ya Bufumu.