Umukululo wa Fipusho
◼ Bushe mwaliiteyanya ku kundapwa kwa mu kampampa?
Pali lelo, “inshita ne [fya] mankumanya” filalenga twakabila ukundapwa kwa mu kampampa, kabili kuti fyalenga limo batupatikisha no kuti batubikemo umulopa. (Luk. Mil. 9:11) Pa kuti twingaiteyanya kuli ayo mafya, Yehova alipayanya ubwafwilisho mu nshila ishingi mu kuteyanya kwakwe, lelo ne fwe bene tufwile twacitapo fimo. Pano pali ifishinka fya kumucinkulako.
• Sendeni kardi wa cila mwaka uwa Advance Medical Directive/Release konse uko mwaya.
• Shininkisheni ukuti abana benu nabasenda Identity Card wabo uwa cila mwaka.
• Pitulukeni mu ca mu kati ca Ubutumikishi Bwesu Ubwa Bufumu ubwa January 1995, no kulangilila ifyo mwingapelulushanya na badokota na bakapingula pa fya kundapa umwana wenu.
• Pitulukeni mu fipande filanda pa miti yabamo umulopa na pa fya kupyanika pa mulopa. (Impapulo: Ulupungu lwa kwa Kalinda, October 1, 1994, ibula 31; June 1, 1990, amabula 30-31; March 1, 1989, amabula 30-31; Awake!, December 8, 1994, amabula 23-27; August 8, 1993, amabula 22-25; Loleni! wa November 8, 1991, ibula 8; ne fya mu kati ifya Ubutumikishi Bwesu Ubwa Bufumu, ubwa January 1995 na September 1994. Bikeni ishi mpapulo sheka muli faelo waibela pa kuti muleshimona bwangu.)
• Pingulenipo ukulingana na kampingu wenu nga kuti mwasuminisha mashini wensha umulopa ku nse ya mubili nelyo nga kuti bamupa umuti uwabamo mulopa.
• Ilyo tamulaya ku cipatala, nga kuti mwakumanisha, ishibisheni baeluda pa kuti nga cakabilwa bengamwafwa ukwishibisha ba Hospital Liaison Committee (HLC) [Komiti wa Kumfwaninamo ne Fipatala]. Nga mwana munono alekabila ukundapwa, lombeni baeluda ukwishibisha ba HLC mu kwangufyanya.
Londololeni Bwino Ukuti Mulakaana Umulopa: Amalipoti yalanga ukuti bamunyina bamo na bankashi balapembelela ukufikila caafya e lyo balanda kuli badokota abalebondapa ukuti tabafwile ukubabikamo umulopa. Uko kufyenga badokota kabili kuti calenga fye bamubikamo umulopa. Badokota nga baishiba ifyo mwasuminamo ne fyo mulefwaya, kabili nga mwabalanga ne fipepala fyasainwa ifilelangilila ifya kucita, cikabaafwako ukwishiba bwangu umwa kulosha kabili ilingi line cilalenga baishibilapo na fimbi ifyo bengapyanikapo mu kundapa ukwabula umulopa.
Apo ukundapwa kwa mu kampampa ukwingakabila ukuya ku cipatala kuti kwaimako akashita akali konse, ilingi line pa kashita mushikashile, citenipo cimo lelo line pa kuti mwingaicingilila ku kumubikamo umulopa, mwe bene na bana benu.—Amapi. 16:20; 22:3.