‘Kuuleni Aba mu Ŋanda Yenu’
1 Ukwabula ukutwishika, mu lutambi lonse ukushinguluka isonde ubumi bwa lupwa bulebongoloka. Icalo ca kwa Satana cayobeka mu bucenjeshi na bucisenene. (1 Yoh. 5:19) Ici cilekomaila pe pamfya lya ‘kukuula aba mu ŋanda yesu’ (NW) no kusambilisha bambi na bo ifya kucita cimo cine.—Amapi. 24:3, 27.
2 Ifishinte fya Baibolo Fyaba Bucingo: Icaba inkaama ku nsansa sha cine isha lupwa cisangwa mu kubomfya ifishinte fya Baibolo. Ici cine ca maka cilanonsha uwa mu lupwa onse mu mbali shonse isha bumi. Ulupwa ulufibomfya lukaba ulwa nsansa kabili lukaipakisha umutende wa bukapepa.—Linganyeniko Esaya 32:17, 18.
3 Ifishinte ifyo fingatwaafwa ukukuula aba mu ŋanda yesu fyalilondololwa mu musango wakamununwa mu citabo cipya, Icaba Inkaama ku nsansa sha Lupwa. Icipandwa cimo cimo cisondwelela no mukululo wa kwaafwo kusambilisha uyo ukomaila pa fishinte ifyo aba mu lupwa bakabila ukwibukisha. Iyi mikululo iingi itendekela ne cipusho ca kuti, “Ni shani fintu ifi fishinte fya mu Baibolo fingaafwa . . . ?” Ici cipusho citutwala ku matontonkanyo ya kwa Lesa pa kuti twingeshiba ifyo aletontonkanya pa mulandu ulelandwapo.—Esa. 48:17.
4 Belengesheni ici citabo. Ishibeni ifya kusanga ifishinte ifyo fingafwilisha lintu amafya yalekanalekana yaisako. Ici citabo cilanda pa milandu pamo nga iyi: cintu umo alingile ukufwaya mu muntu alelanguluka ukuupana nankwe (icipandwa 2), amakii yakatama ayesula ku mwinshi wa nsansa sha mu cupo (icipandwa 3), fintu abafyashi bengakusha abapungwe babo ukwisaba abakalamba bashingamwa, abatiina Lesa (icipandwa 6), ifya kucingilila ulupwa ku fya kusonga fya konaula (icipandwa 8), ifishinte fya kwaafwa indupwa sha mufyashi umushimbe ukutunguluka (icipandwa 9), ukwaafwa kwa ku mupashi ku ndupwa shacushiwa ku ba mu lupwa abakunkuma ku bwalwa no lukaakala (icipandwa 12), ifya kucita lintu ifikakilo fya cupo fili mupepi no kutobeka (icipandwa 13), icingacitwa pa kucindika abafyashi abakoloci (icipandwa 15), ne fya kusangila ulupwa lwa umo inshita ya ku ntanshi iibelelela (icipandwa 16).
5 Bomfyeni Icitabo Cipya mu Kufikapo: Nga ca kuti tamwacita ifyo kale kale, mulandu nshi te kusambilila icitabo ca Insansa sha Lupwa capamo ngo lupwa? Na kabili, lyonse lintu ulupwa lwenu lwalolenkana na mafya yapya nelyo imibele yayafya, pitulukeni mu fipandwa ifyo filelanda pali aya mafya muli ici citabo, kabili mu kubamo ipepo tontonkanyeni pa fya kubomfya ukufunda. Mu kulundapo, mu March, beni abape ukupitila mu kutantikako inshita ikalamba iya butumikishi bwa mwi bala pa kuti mwingatukusha ukushalika icitabo ca Icaba Inkaama ku Nsansa sha Lupwa ku bantu abengi ukufika apo mwingapesha.
6 Indupwa isho shibelesha bukapepa shikakoshiwa lwa ku mupashi no kwikatana kabili shikaba ishaipekanya ukubomba no kusansa kwa kwa Satana. (1 Tim. 4:7, 8; 1 Pet. 5:8, 9) Fintu twaba abatootela ukuti twalikwata ukufunda kwa bulesa ukufuma kuli Katendeka wa lupwa!