Ukwaafwa Indupwa Ukusanga Inshita ya ku Ntanshi Iibelelela
1 “Ubufunushi busuma,” e fyo uubomba ne fya ndalama aebele ikalasi lyalepwisha isukulu pa koleji, ukulundapo ukuti: “Kuti waba uwafunuka kabili nalyo line ukutwalilila ukuyumfwa bwino.” Ico cilelangilila bwino nga nshi ifyo icalo cisumbula bukaitemwe pamo nga inshila ya kubelamo uwashininkisha pa lwa nshita ya umo iya ku ntanshi. Mu kupusanako nga nshi, Yesu afundile ukuti Umwina Kristu afwile “aikaanye . . . Pantu umuntu cikamwafwa shani, nga anonke calo conse ca pano isonde, no kupooso mweo wakwe?” (Mat. 16:24-26) Pa kushininkisha ukwisakwata inshita ya ku ntanshi iibelelela, umuntu afwile ukobelwa no kucita ukufwaya kwa kwa Lesa—ubuyo bwacindamisha ku ndupwa ilelo. (Ilu. 143:10; 1 Tim. 4:8) Ubo bukombe bwalilondololwa mu cipandwa ca kusondwelela ica citabo ca Icaba Inkaama ku Nsansa sha Lupwa. Ulu lupapulo lupya lulaafwa abantu ukwishiba icacindama mu cituntulu mu bumi na fintu bengabombela indupwa shabo mu nshila ya kunonsha. Ilyo tuletwalilila ukushimikila imbila nsuma ukuli konse, finshi twingasosa ifyo fikakoselesha abo tukumanya ukuti babelenge icitabo ca Insansa sha Lupwa? Pano palipo imitubululo:
2 Pa mwinshi na mu musebo, nakalimo kuti mwaesha ukubomfya trakiti wa “Ipakishe Ubumi bwa Lupwa” ku kutendeka ukulanshanya. Kuti mwaipusha ukuti:
◼“Mu kuba na masakamika yonse ayo imikalile ya muno nshiku ituletela, bushe muleyumfwa ukuti kuti kwaba ubumi bwa lupwa ubwa nsansa mu cine cine? [Lekeni asuke.] Uyu trakiti mu kushininkisha atulaya ukuti kuti kwaba. Bushe kuti mwatemwa ukuubelenga?” Nga ca kuti apokelelwa, kuti mwatwalilila pa kusosa ukuti: “Apantu ili lyashi mwalitemwa, nalimo kuti mwaipakisha ne ci cine citabo icilondolola ukupanda amano kwashika pa fya kusanga insansa mu lupwa.” Langisheni umutande wa filimo mu citabo ca Ubumi bwa Lupwa. Mulangisheni ifipandwa fimo fimo. Londololeni ifipandwa finono ifya kucebusha. Kupukuleni pe bula 10, kabili belengeni ukufuma pali sentensi wa kulekelesha uwa paragrafu 17 ukufika ku mpela ya paragrafu 18. Tambikeni icitabo. Londololeni ukuti namukwata ifingi ifya kulanda, kabili ipusheni ilyo mwingesalanshanya na kabili.
3 Kuti mwakonkanyapo ifyo mwalanshenye mu kubalilapo pa lwa bumi bwa lupwa ubwa nsansa pa kusosa ukuti:
◼ “Kuti natemwa ukulondololako icintu cimo ico mwalatemwa mu citabo ico mwashele na co. Icipandwa ca kulekelesha citonta pa nkama ya cine cine iya nsansa sha lupwa. [Belengeni paragrafu 2 pe bula 183.] Moneni ukuti ukubombela capamo ku kucita ukufwaya kwa kwa Lesa caba e makii. Tuletubulula ukuti indupwa shisambilile Baibolo capamo ukwishiba icaba ukufwaya kwa kwa Lesa ne fya kubomba na ko mu ŋanda yabo. Tulatambika kosi we sambililo lya Baibolo uwa pa fye uusenda fye imyeshi inono ukupwisha. Nga mwingansuminisha, kuti namulanga fintu atungululwa.” Bweleleniko na broshuwa wa Cinshi Cintu Lesa Afwaya Kuli Ifwe? nelyo icitabo ca Ukwishiba, icili conse icingalinga.
4 Lintu mulelanda kuli abo musambilila na bo pa sukulu nelyo imisepela ikala mu cifulo ca kushimikilamo; nalimo kuti bayankulako bwino lintu mwabepusha ici cipusho:
◼ “Cacindama shani ku bafyashi na bana babo ukutwalilila ukuyumfwa abakakuka ukulanshanya? [Lekeni asuke.] Umfweni fintu ici citabo cinono icilanda pa lwa bumi bwa lupwa cisosa pa lwa lyashi lya ‘Ukulanshanya kwa Bufumacumi Kabili Ukwakakuka.’ [Belengeni paragrafu 4 onse na sentensi wa kubalilapo mu paragrafu 5 pe bula 65 mu citabo ca Insansa sha Lupwa.] Amaparagrafu yakonkelepo yalepayanya imitubululo ya kwaafwa pa fya kuwamyako ukulanshanya mu lupwa. Ici citabo cakwata umutwe wa kuti Icaba Inkaama ku Nsansa sha Lupwa. Nga mwingatemwa ukucibelenga kabili mwalaya ukucita ifyo, kuti mwashala ne ci citabo pa musangulo wa K1,000 epela.” Londololeni ukuti mukabwelelako ku kuyaumfwa ifyo aletontonkanya pa fintu akabelenga.
5 Kuti mwatwalilila no kulanshanya mwalanshenye mu kubalilapo no musepela pa lwa kulanshanya kwa mwana no mufyashi pa kusosa ifi:
◼ “Nalitasha pa fintu wali uwasekelela mu bucindami bwa kumfwana bwino mu lupwa mu mwenu. Lisambililo nshi wingatila e lyacindamisha ilyo abafyashi na bana balingile ukulanshanya?” [Lekeni asuke.] Lyene kupukuleni pe bula 68 mu citabo ca Insansa sha Lupwa, kabili belengeni icasuko icisangwa pa muulu wa paragrafu 11. “Ukusambilila Baibolo cila mulungu yaba ni nshila yawamisha iya kunonkelamo ukwishiba Lesa.” Tambikeni broshuwa wa Cinshi Cintu Lesa Afwaya Kuli Ifwe? Londololeni ukuti amasambililo ya uko 16 yapayanya ukusupula kwa bukombe bwa Baibolo. Belengeni imitendekele pe bula 2, lanshanyeni capamo isambililo lya kubalilapo.
6 Nga ca kuti mwakumanya umufyashi mu mulimo wa ku ŋanda ne ŋanda, nelyo nakalimo mu musebo nelyo pa mushiika, nalimo kuti mwabalamuna ubuseko pa kusosa ukuti:
◼ “Ndeshininkisha ifyo mwalasuminisha ukuti ukukusha abana ilelo calyafwa mu cine cine. Cinshi muletontonkanya cingacingilila ulupwa lwenu ku fya kusonga fyabipa? [Lekeni asuke.] Pano palipo ukupanda amano kwawamisha uko natasha.” Shimikeni icilangililo cili mu paragrafu 1 kabili belengeni paragrafu 2 pe bula 90 mu citabo ca Insansa sha Lupwa. Londololeni fintu cipeela ubutungulushi bwashikatala ubo mu cituntulu bubomba bwino ku kucingilila indupwa ukufuma ku fya kusonga fya konaula. Ipusheni nga kuti mwasha icitabo, kabili ipeelesheni ku kwasuka ifipusho ifili fyonse ifyaisako.
7 Pa kutandala kwenu ukwa cibili ku mufyashi uwapokelele icitabo ca “Insansa sha Lupwa,” kuti mwatwalilila ukulanshanya muli iyi nshila:
◼ “Lintu twakumene mu kubalilapo, nalimwene ukuti mu cine cine mulasakamana abana benu no kuti mulafwaya ukucita ifingi apapela amaka yenu ku kubacingilila ukufuma ku fya kusonga fyalubana. Nakalimo tamulabelenga ici citabo, lelo kuliko icintu cimo namwene icacindama ico mulingile ukwishiba icalandwapo mu citabo ico namushilile. [Belengeni paragrafu 19 pe bula 59.] Ukulundulula ukwampana na Lesa kufwaya ukuti tumwishibe ukupitila mu kusambilila Icebo cakwe icalembwa, Baibolo. Bushe kuti mwatemwa ukuti mulangilile fintu tusambilila Baibolo pamo nga ulupwa?”
8 Impanda mano sha ku calo te kuti shilange indupwa inshila ya nsansa lelo mu kushininkisha shikabalenga insoni. Natwananye icitabo ca Insansa sha Lupwa mu kusaalala pa kuti abantu ukuli konse bengafwiwa ne Cebo ca kwa Lesa ukusanga inshita ya ku ntanshi iibelelela.—1 Tim. 6:19.