Cinkupiti wa Bantu Alelundwako
1 Nga fintu cali mu mwanda wa myaka uwa kubalilapo, icilonganino ca Bwina Kristu ilelo cilelunduluka mu nshila ya kusungusha. (Imil. 2:41; 4:4) Umwaka wapwile, abasambi bapya 366,579 balibatishiwe, e kutila bacilile pali 1,000 ukulabatishiwa cila bushiku! Ukucila pali milioni umo balibatishiwe mu myaka itatu iyalekelesheko. Mu cine cine, Yehova alitwalilila ukulundako cinkupiti wa basumina.—Imil. 5:14.
2 Abo abakosa mu citetekelo balakabila ukwafwilisha no kukansha abapya abengi abashabelesha mu mikalile ya Bwina Kristu. (Rom. 15:1) Mu Bena Kristu ba mu kubangilila mwali bamo abo, nangu cingati papitile imyaka yafulilako apo babatishiwilwe, balifililwe “ukulola ku bukalamba.” (Heb. 5:12; 6:1) E mulandu wine muli kalata wakwe ku baHebere, Paulo akomaile pa mbali isho Abena Kristu bakabila ukulundulukamo lwa ku mupashi. Ni mbali nshi ishi, kabili ni shani fintu bengafwiwa umulekabilwa?
3 Ukuba ne Fibelesho fya Kusambilila Ifisuma: Ukulingana na makambisho ya kwa Paulo, ukuba umusambi musuma kusanshamo ukusambilila mu kucincila, ukubwekeshapo, no kubomfya “ifilyo fyakosa” ifyapayanishiwa no kuteyanya kwa kwa Yehova. (Heb. 5:13, 14; moneni Ulupungu lwa kwa Kalinda ulwa August 15, 1993, amabula 12-17.) Nga mulesansha abasumina bapya mu kulanshanya kwa ku mupashi no kubalondolwela ifyuma fyaumo mutengo ifya cine ifyo mwashula mu kusapika kwa pa lwenu, kuti mwabacincimusha ku kuba ne fibelesho fya kusambilila ifisuma. Nakalimo limo limo kuti mwaita umupya ukuba pamo na imwe mwi sambililo lya pa lwenu nelyo ilya lupwa.
4 Ukusangwa ku Kulongana Lyonse: Ica kumwenako cenu ica cishinka na mashiwi ya kukoselesha aya kutemwa fikaafwa abapya abali mu cilonganino ukusengauka ica kusakamika na cimbi ico Paulo alumbwile, e kutila—“umusango” uyo bamo bakwata uwa kushala ku kulongana kwa pa cilonganino. (Heb. 10:24, 25) Bafwilisheni ukutesekesha ukuti ukulongana e mwando wabo uwa ku mupashi uwe pusukilo uwa mu cilonganino. Itendekeleniko ukubalenga ukuba abayangukililwa pamo nga ulubali lwa bamunyinefwe.
5 Ukupalamina Kuli Yehova mu Kucetekela: Pa kuti twingacimfya amabunake ya ku mubili ne filubo fya buntunse, tufwile ukupepa kuli Yehova, ukulumbulula amatontonkanyo yesu ayashika kuli wene ne fintu filetusakamika nga nshi. Abapya bafwile ukwishiba ukuti nga balepaapaata Yehova ukuti abaafwe, nga fintu Paulo acincishe, tabalekabila ukushimunuka. (Heb. 4:15, 16; 10:22) Nga mwashimikila umupya ifya kukumanya fyenu ifikumine amapepo, akakoshiwa ukucetekela ukuti Yehova alomfwa amapepo ya kufuma ku mutima.
6 Ukutantika Inshita ya Butumikishi: Paulo na kabili alangilile ukuti tulakoshiwa lwa ku mupashi lintu ‘twatuula ilambo lya malumbo kuli Lesa [lyonse].’ (Heb. 13:15) Bushe kuti mwaitako kasabankanya mupya ukubomba na imwe mu mulimo wa mwi bala uyo mwatantika cila mulungu? Nakalimo imwe babili kuti mwapekanya inshila isho mukalandilamo nelyo ukulanda pa lubali lwa butumikishi ulo umupya ashaeshapo.
7 Cinkupiti wa bantu uulelundwako aletulenga ukusekelela apakalamba. Ilyo twabombesha mu kukansha no kukonkomesha abapya abali mu cilonganino, tukabaafwa ukulundulula icitetekelo cakosa icikabilwa ku ‘kubaka imyeo yesu.’—Heb. 3:12, 13; 10:39, NW.