Ukushimikila Imbila Nsuma ne Pamfya
1 Tulalanga ukuti twalitesekesha mu kushika amalayo ya Bufumu bwa kwa Lesa ukupitila mu kubombako mu butumikishi bwa Bwina Kristu no mutima onse. Tukabila ukubombako uyu mulimo ne pamfya. Mulandu nshi? Pantu ababomfi nabacepa, impela ya ino micitile ibifi iya fintu ilepalamina, kabili ubumi bwa baba mu cifulo cesu ica kubombelamo buli mu busanso. (Esek. 3:19; Mat. 9:37, 38) Ico cishingamo cafina cifwaya ukuti tubombeshe mu butumikishi. Ni shani fintu twingalanga ifyo natwiluka ukuti umulimo wesu uwa mwi bala uli we pamfya? Ukupitila mu kupekanishisha libela inshila sha kulandilamo ishisuma, ukuba aba mukoosha mu kusapika abantu ukuli konse uko bengasangwa, ukusungilila icalembwa calungama ica bonse abalangisha ubuseko, no kubwelelako mu kwangufyanya ku kukonkelela ubo buseko, no kupitila mu kwibukisha ukuti apantu ubumi nabubimbwamo, tulingile ukumona ubutumikishi bwesu mu kukatama. Imitubululo yakonkapo nakalimo kuti yaba iya kwaafwa ilyo tulepekanya ukushimikila imbila nsuma ne pamfya mu February. Ica kutambika cikaba citabo ca Ukusokolola—Akalume ka Kuko Kakalamba Nakapalama!
2 Nakalimo kuti mwatendeka ukulanshanya pa kulumbula mu kwipifya amafya yamo ayo mulolenkana na yo mu bwikashi, kabili lyene kuti mwatila:
◼ “Abantu abengi balisumina ukuti kwaliba Lesa, lelo bepusha ukuti: ‘Bushe inshita yesu iya ku ntanshi afwaya ikabe shani?’ Kuti mwayasuka shani ico cipusho? [Lekeni asuke.] Bushe mwalishiba ukuti Baibolo mu kumfwika ilondolola ukufwaya kwa kwa Lesa pa lwa mutundu wa muntu na fintu alecita pa kuti uko kufwaya kukacitwe?” Kupukuleni pe bula 301 mu citabo Akalume ka Ukusokolola. Belengeni Ukusokolola 21:1 mu paragrafu 1, kabili lyene belengeni ifyebo fyalondolola ilyo ilembo muli citika wa kulekelesha uwa paragrafu 2. Kupukuleni pa cikope pe bula 302 ku kulangilila fintu ici cipilibula ku nshita yesu iya ku ntanshi. Belengeni Ukusokolola 21:4 mu paragrafu 6. Tambikeni icitabo. Tantikeni inshita isuma iya kubwelelako ku kutwalilila ukulanshanya.
3 Kuti mwakonkanyapo apo mwashilile ukulanshanya Ukusokolola 21:1, 4 ukubomfya iyi nshila ya kulandilamo iipi:
◼ “Ilyo namutandalile umuku wafumako, twalandile pa lwa malayo ya kwa Lesa aya kupekanishisha umutundu wa muntu ubwikashi bupya ubwa pe sonde. [Landeni na kabili pa cikope cili pe bula 302 mu citabo ca Akalume ka Ukusokolola.] Bushe kuti mwatemwa ulupwa lwenu ukuipakisha imibele ya musango uyu? [Lekeni asuke.] Icipusho cili ca kuti, Bushe amalayo ya kwa Lesa kuti yashintililwapo? Shi moneni cintu umwine asosa.” Belengeni Ukusokolola 21:5, 6a mu paragrafu 8 pe bula 303. Ipusheni icipusho calembwa ica paragrafu 9 pe bula 303, kabili belengeni icasuko, ukusanshako na sentensi wa kulekelesha uwa paragrafu. Mwebeni fyo kuti mwasambilila nankwe isambililo lya Baibolo ilya pa fye. Tantikeni ukwisamulangilila ku ntanshi.
4 Apantu abengi nabasakamikwa pa lwa mafya yaleingilishiwako ayalolenkene no mutundu wa muntu, nakalimo kuti mwasosa icapala ici pa kutandala kwa kubalilapo:
◼ “Mupepi na onse uo nakumanya ali uwasakamikwa pa lwa mafya ayo tulolenkana na yo mu bwikashi bwesu. [Lumbulenipo ayanono.] Pa makumi ya myaka ayengi bapolitishani balilaya ukupikulula amafya mu kubelelela, kabili bamo balyesha ukucita ifyo. Cinshi muletontonkanya cilenga imibele ukutwalilila ukubipilako? [Lekeni asuke.] Baibolo alondolola ifyebo ifyo abantu abengi bashabala abatontonkanyapo. Ibuuku lya Ukusokolola lilondolola inkondo iyo yacitike mu muulu. Moneni icafuminemo, nga fintu calondololwa pa Ukusokolola 12:9.” Belengeni icikomo, lyene kupukuleni pe bula 182 mu citabo ca Akalume ka Ukusokolola. Bomfyeni icikope ku kulondolola fintu Satana abimbwamo mu milandu ye sonde. Tambikeni icitabo. Pekanyeni ukubwelelako no kulanshanya fintu Lesa akapikulula amafya ya mutundu wa muntu.
5 Nga mwalaile ukubwelelako ku kulondolola fintu Lesa akapikulula amafya ya lelo, nalimo kuti mwaesha iyi nshila:
◼ “Nacitila nangu cibe shani ndebwelelako pa kuti twingatwalilila ukulanshanya kwesu pa lwa kupikulula kwine kwine ukwa mafya yalolenkene no mutundu wa muntu. Lintu namutandalile umuku wafumako, twalimwene ukuti Baibolo ishibisha Satana Kaseebanya nga umo uulufya bonse abaikala mu calo conse. Apantu aba cibumbwa ca mupashi cacila pa buntunse, bushe muletontonkanya kuti kwabako inshila ya kufumishapo ukusonga kwakwe? [Lekeni asuke.] Shi moneni cintu Baibolo isosa.” Belengeni no kulondolola Ukusokolola 20:1-3. Pa kubomfya icikope pa mabula 4-5 mu citabo ca Ukwishiba, langeni fintu imibele ikaba ukwabula ukusonga kwa kwa Satana. Tambikeni isambililo lya Baibolo kabili tukusheni ukutendeka ukusambilila apo pene fye.
6 Apantu kuliko abantu bafulisha ifi abali abasekelela mu bubumbo, kuti mwalanda icapala ici pa kutendeka ukulanshanya:
◼ “Natusanga ukuti mupepi na onse nasakamikwa pa lwa kukowela kwa mwela, amenshi, ne fya kulya. Ifyo ububumbo buli mu fyalo fimo kale kale ciletiinya ubumi. Apantu Lesa e Kabumba we sonde, cinshi muletontonkanya akacita pa lwa ici? [Lekeni asuke.] Baibolo itila Lesa akatulubulwisha pa nshila tubomfeshamo planeti. [Belengeni Ukusokolola 11:18b.] Elenganyeni ukwikala pe sonde ilishabamo ukukowela konse!” Londololeni ubulayo bwa kwa Lesa ubwa paradise, nga fintu bwalondololwa pa Ukusokolola 21:3, 4. Langeni icikope pe bula 302 mu citabo ca Akalume ka Ukusokolola. Tambikeni icitabo kabili tantikeni ukubwelelako.
7 Lintu mulebwelela kuli umo uwasekelele muli Paradise wa pe sonde, kuti mwatila:
◼ “Ilyo namutandalile umuku wafumako, twasuminishenye ifyo pa kuti ubwafya bwa kukowela kwe sonde bwingapikululwa, Lesa akanyantukilamo mu milandu ya bantu. Lelo icipusho cili ca kuti, Cinshi cintu tulingile ukucita pa kupusunsuka ukwingila mu calo cipya ica bulungami ica kwa Lesa?” Belengeni Yohane 17:3. Laalikeni mwine ŋanda ukushukila kosi wesu uwe sambililo lya Baibolo ilya pa fye pa kuti enganonka uku kwishiba kwaibela.
8 Mwandi caliba lishuko ukubomfiwa pamo nga bakabomba ba kulobolola aba muno nshiku no kubomba umulimo wa kushimikila uwa kupususha ubumi! Shi ifwe bonse natutwalilile ukuba abapamfiwa ukushimikila imbila nsuma mu kuba ne pamfya, ‘pa kwishibo kuti ukucucutika kwesu te kwa fye.’—1 Kor. 15:58.