Ukwebako Bambi Icaba Inkaama ku Nsansa sha Lupwa

¹ Ulupwa e bumba lya citendekelo mu bantunse, kabili ni mu ndupwa umufuma imishi, imisumba, ifitungu, ne fyalo. Ulupwa talwatala alubapo mu bwafya nga fintu luli ilelo. Kuli amaka yalebomba ayaletiinya no kubapo kwa bumi bwa lupwa. Fintu tuletasha pa kuti Yehova, Kelenganya wa lupwa, alitupeela amakambisho pa kuti twingasanga insansa mu lupwa! Abakonka amakambisho yakwe basange fyo amafya yalacepelako no lupwa lulekatana bwino bwino. Mu September tukwete shuko lya kushalikilako bambi icitabo Icaba Inkaama ku Nsansa sha Lupwa. Itendekeleniko ukutununuka abantu ku kulanda pa lwa bumi bwa lupwa. Muleba aba bucibusa, abaicetekela, kabili abashilimuka. Cinshi mwingasosa?

² Kuti mwaipusha fye icipusho pamo nge ci:

◼ “Bushe mwalimone fyo indupwa ishingi shilafilwa ukukumamo ukwikala na mafya ya mu bumi? [Lekeni asuke.] Amalipoti yalangishe fyo abengi balakwata amafya mu mayanda mu myabo. Bushe mutila cinshi cingaafwa indupwa ukushikatala no kusanga insansa? [Lekeni asuke.] Apantu ni Lesa e watantike ulupwa, bushe teti cibe ica mano ukubebeta amafunde apeela? [Belengeni 2 Timote 3:16, 17.] Ukufunda kwa kunonsha ukwa musango yo kwalilondololwa muli ci citabo, Icaba Inkaama ku Nsansa sha Lupwa.” Lyene mwipusheni ico atontonkanya ukuti e bwafya bwa mu lupwa ubwaseeka, mulangeni icipandwa cilanda pali ubo bwafya, kabili tambikeni icitabo.

³ Ilyo mwabwelelako, kuti mwayafwaisha ukutampa isambililo lya Baibolo ukupitila mu kusosa ati:

◼ “Naletontonkanya pa fintu mwalandile pa lwa bumi bwa lupwa, kabili nimuletelako ico ndetontonkanya muli no kuipakisha. [Mulangeni broshuwa wa Cintu Lesa Afwaya, kabiyeni kwi bula 16, no kubelenga ifipusho 6 ifyaba pa muulu.] Ukwabulo kutwishika, umo umo mu lupwa afwile ukubomba umulimo wakwe pa kuti mu lupwa mube insansa. Nga namukwatako inshita inono, nalamulanga ifyo mwinganonkelamo nga nshi muli fi fyebo.” Lyene tendekeni isambililo 8.

⁴ Inshila na imbi iya kutampilamo ukulanshanya yaba kulanda pa bwafya bumo, napamo ukusosa ati:

◼ “Nangu ca kuti bonse bafwaya ukwikushiwa, cimoneke fyo indupwa ishingi tashaikushiwa. Bushe muleti cinshi cingabaafwa ukusanga insansa sha cine? [Lekeni asuke.] Kale sana, Baibolo yalilandile amafya twali no kumona mu ndupwa ilelo. [Belengeni 2 Timote 3:1-3.] Nangu cibe fyo, Baibolo na kabili ileeba indupwa ifya kucita ku kupwisha aya mafya no kusanga insansa shibelelela. Ifishinte fya Baibolo fyalilondololwa muli ci citabo, Icaba Inkaama ku Nsansa sha Lupwa.” Lyene mulangeni umukululo wa kupitulukamo pa mpela ya cipandwa calinga, belengeni umukululo, kabili tambikeni icitabo.

⁵ Ilyo mwabwelelako, bomfyeni broshuwa wa “Cintu Lesa Afwaya” ku kutampa isambililo. Kuti mwatila:

◼ “Nalitemenwe apantu mwalefwaya ukubebeta ifishinte fya mu Baibolo ifibomba ku bumi bwa lupwa. Ukulingana ne fyamonwa, casangwa ukuti ifintu fiwama sana nga mulekonka ukufunda kubomba ukusangwa muli Baibolo. Pano nabalondolola mu kwanguka umulandu cabele fyo.” Belengeni paragrafu wa kubalilapo mwi sambililo 1 muli broshuwa wa Cintu Lesa Afwaya, ukusanshako Ilumbo 1:1-3 nelyo Esaya 48:17, 18. Nga imibele ilesuminisha, pwishishisheni isambililo 1 lyonse. Mwebeni ifyo kuti mwaitemenwa ukubwelelako ku kusambilila isambililo likonkelepo.

⁶ Kuti mwatambika icitabo ca Insansa sha Lupwa ilyo muli mu bunte bwa mu lyashi pa ncito, pa sukulu, mu paaka, nelyo muli basi, na lintu muletandalila balupwa. Ifyo mukalanda nga mwabwelelako fifwile ukwaafwa uyo muntu ukumona ifyo ukusambilila Baibolo kwingakosha ukwikatana kwa lupwa. Amasambililo yali no kutungululwa muli broshuwa wa Cinshi Cintu Lesa Afwaya Kuli Ifwe?, mu kuba no buyo bwa kwalukila mu citabo ca Ukwishiba, nelyo kuti mwatendeka isambililo mu citabo cine ica Ukwishiba.

⁷ Impanda mano sha ku calo tashingalanga indupwa inshila ya ku nsansa, lelo shibasha fye abafulunganishiwa. Natubombeshe ukwebako bambi inkaama iileta insansa mu lupwa—iyaba kukonka amafunde yaba mu Cebo ca kwa Lesa.—Ilu. 19:7-10.