Bushe Muli Nte pa Nshita Iili Yonse?
1 Bushe kuti mwasumina ilyo mwaipushiwa ici cipusho? Nangu cingati te babomfi ba kwa Yehova bonse abaipeela abengabombako ubutumikishi bwa nshita yonse, bushe tacabamo kupelulula ukwenekela ukuti ifwe bonse tulingile ukuimona ukuti tuli Nte shakwe pa nshita iili yonse? Ukwabulo kutwishika.
2 Takwaba Umwina Kristu uwa nshita lubali. Pa lwa kwa Wishi Yesu atile: “Ine ncita pe ifya kumutemuna.” (Yoh. 8:29) Paulo, uwayumfwile mu nshila yapalako, atucincishe ‘ukucita fyonse ku kucindika Lesa.’ (1 Kor. 10:31) E co kanshi, ifwe bonse tulingile ukuimona ukuti tuli Nte sha kwa Yehova pa nshita iili yonse. Nga twalatontonkanya muli iyi nshila, tuli no kusongwa ukucite cisuma mu mibombele iili yonse iyo twakonkelela.
3 Langulukeniko Ubushininkisho: Imimonekele yesu, imilandile, ne myendele kuti fyalangilila abantu bambi ukuti mu cine cine tuli Nte sha kwa Yehova. Tulaba abapempwila ulwa kulamoneka mu kulinga, ukuba ne milandile isuma, ne myendele isuma lyonse lintu tuli mu mulimo wa mwi bala nelyo ilyo tulesangwa ku kulongana kwa Bwina Kristu. Nangu cibe fyo, nampo nga tuleya ku sukulu, tulebomba incito ya ku mubili, nelyo ukukokolokako, icili conse pa lwa ifwe cilingile ukushinina ukuti tukonka ifipimo fyalungama ifya kwa Yehova.
4 Yesu atile: “Umusumba uwabikwa pa muulu wa lupili tawingafiswa. . . . E fyo ulubuuto lwenu lengeni lubalikile ku cinso ca bantu, ukuti bamone imilimo yenu iisuma, no kucindika Shinwe wa mu muulu.” (Mat. 5:14-16) E fyo cifwile ukuba kuli fyonse ifyo tucita pa nshita iili yonse. Nga ca kuti twasanga ukuti tuleshimunuka ukushimikila pa mulandu na kuntu tuli nelyo ico tulecita, tulekabila ukuipusha atuti, ‘Bushe ndebombela Yehova inshita lubali nelyo inshita yonse?’ Shi twipusumuna ishuko lya kulanda kuli bambi pa lwa mbila nsuma iya Bufumu bwa kwa Lesa.
5 Ibukisheni, tulacindika no kutemuna Yehova lintu twasumina mu kushininkishiwa ilyo twaipusha ukuti, “Bushe muli Nte pa nshita iili yonse?”