Ananyeni Trakiti wa Imbila ya Bufumu Na. 35 Konse Konse
1 Ifwe bonse tukaba abapamfiwa mu October na mu November. Mu nshiku sha kubalilapo 11 isha mu October, tukalatambika ukulembesha atemwa Ulupungu lwa kwa Kalinda nelyo Loleni! nelyo bamagazini bonse babili. Lyene, ukufuma pa Mulungu, October 12, ukufika pa Mulungu, November 16, tukatendekako ukwananya trakiti wa Imbila ya Bufumu Na. 35 ikananishiwa isonde lyonse. Likaba lishuko lyesu ukutwala ubukombe bwacindama ku bantu bonse mu ncende shesu. Trakiti aleasuka icipusho ca kuti, “Bushe Abantu Bonse Bakatala Abatemwana?” Muli uyu lulu waibela, tukalashalika trakiti wa Imbila ya Bufumu Na. 35 mu kati ka mulungu. Pa mpela sha mulungu, ukulunda pa kutambika trakiti wa Imbila ya Bufumu, tukalatambika ukulembesha bamagazini. Mukakwate amaslipi ya kulembesha ayafulilako.
2 Ni Bani Bengabombako? Nga pe, baeluda bakaba basolwesolwe. Bonse tulaipakisha ukwananya trakiti wa Imbila ya Bufumu, kabili ukwabulo kutwishika bakasabankanya abengi bakalembeshako bupainiya bwa kwafwilisha mu mweshi umo nelyo mu myeshi yonse ibili iya kampeni. Bakasabankanya bambi kuti batantika ukupoosa inshita yafulilako mu butumikishi ukucila fintu bacita lyonse.
3 Bushe mulasambililako na umo uutantalile ukusambilila mu citabo ca Ukwishiba kabili uwalaswa afikepo ukufumina mu mulimo wa mwi bala? Napamo kuti aba kasabankanya uushabatishiwa nomba pa kuti akabombeko muli kampeni wa kwananya trakiti wa Imbila ya Bufumu. Ni nshila ya kulanshanya iyayanguka fye iikabilwa pa kulondolola trakiti. Ku ca kumwenako, umo kuti atila: “Uyu trakiti nacindama nga nshi ica kuti aleshalikwa mwi sonde lyonse uno mweshi mu ndimi 169. Kuti natemwa ukuti mukwateko uyu.” Nangu fye bana abanono kuti babombako uyu mulimo wa kucincimusha.
4 Bakatungulula ba masambililo ya citabo balingile ukukoselesha bonse mwi bumba lyabo ukwananyako trakiti wa Imbila ya Bufumu Na. 35 mu kukumanina. Na kabili kuti kwabako bakasabankanya abanaka lelo abengapuupuutulwa na kabili nga bakoseleshiwa. Ilyo kampeni ashilafika, baeluda balingile ukutandalila aba bonse ukumona icingacitwa ku kubaafwa ukuya na bakasabankanya babelesha muli ulu lubali lwa butumikishi.
5 Ni Lilali Tukalakumana Ukuya mwi Bala? Iyi yonse imibombele ikafwaya imitantikile ya kushimikila mu mabumba ayalingile kabili ayengabomba. Nga cingacitika, kulingile ukubako ukukumana kwa mulimo cila bushiku mu mulungu, pa mpela sha mulungu, na mu fyungulo bushiku. Kulingile ukubako pa nshita shili no kulenga bakasabankanya na bapainiya ukushukila iyi nshita ya kushimikila mu kukumanina. Na kabili kuti kwabako ukutantika kwa kukumana mu fyungulo kasuba pa kuti abana be sukulu, ababomba ifipani, na bambi bengamwenamo. Kangalila wa mulimo alingile ukushininkisha ukuti kuliko icifulo ca kubombelamo ku ng’anda ne ng’anda ne ca bukwebo pa kuti bonse bengabombako mu kufishapo. Nga bakasabankanya bengi, cilefwaya ukushilimuka pa kupima abali no kubomba mu cifulo cipeelwe.
6 Nga Abashiba pa Mayanda? Tulefwaya ukulanda ku baba pa mayanda abengi nga nshi ukubalondolwela umulandu balekabila ukubelengela trakiti wa Imbila ya Bufumu Na. 35. E co nga pa ng’anda tapali umuntu, lembeni akeyala no kubwelelako pa nshita imbi iya ako kasuba. Nga cafika mu mulungu wa kupelako uwa kampeni kabili mucili tamulati musangepo abantu pa ng’anda, kuti mwasha trakiti wa Imbila ya Bufumu mu ciibi pa ncende apo abapita nshila bashingamona. Mu mayanda, ibukisheni ukutambika trakiti wa Imbila ya Bufumu ku baleenda mu musebo. Ilyo mulebombela mu ncende sha mu mishi no kwaba icifulo icikulu ico mushingapwisha muli kampeni, kuti mwasha trakiti wa Imbila ya Bufumu pa mayanda ya bashilipo pa muku fye wa kubalilapo.
7 Cinshi Cili E Buyo Bwesu? Ifilonganino filingile ukubombesha ukupwisha ukushalika amatrakiti yonse aya Imbila ya Bufumu mu cifulo cabo conse ilyo kampeni talapwa pa November 16. Nga ca kuti icifulo icilonganino cenu capeelwa cikulu sana kabili nga cili fye bwino ukubomba mweka mu cifulo ca kuba na umbi, kuti mwaeshako ukucite ci. Ici cikamulenga ukufika ku bayana abengi ne mbila nsuma. (Mat. 10:11) Kuti pambi caba bwino ukusendela amatrakiti ku minwe na Baibolo mwi tumba nelyo mu kacola, mu cifulo ca kubomfya icola icikulu. Shininkisheni ukulemba bwino bwino ukwasangwa abalesekelela.
8 Bushe Namuipekanya Ukutampako? Tamulekabila ukuorda trakiti wa Imbila ya Bufumu Na. 35, apantu ifipo filetumwa ku filonganino fyonse. Bapainiya baibela, aba nshita yonse, na ba kwafwilisha umo umo akapeelwa amatrakiti ya kwananya 100, ilintu bakasabankanya bakapeelwa amatrakiti 30 umo umo. Natulangwa umulimo. Bushe mulefwaisha ukubombako uyu mulimo wa kucincimusha? Ukwabulo kutwishika mulefwaisha. Natwananye ubukombe bwacindama ubwashimpwa pali Baibolo ubuli muli trakiti wa Imbila ya Bufumu Na. 35 konse konse.