Umwinshi Ukalamba uwa Kubombeshamo Nawisuka
1 Pamo nga kashimikila wa mbila nsuma uwapimpa, Paulo mu kucincila alesokota ififulo umwali ukubulisha kukalamba, cimo ica fyene icali musumba wa Efese. Alitungulwike mu kushimikila ica kuti alembele ku Bena Kristu banankwe ukuti: “Kuli ine nakwisukilo mwinshi ukalamba kabili uwa kubombeshamo.” (1 Kor. 16:9) Paulo atwalilile ukubombela muli ico cifulo kabili aafwile abena Efese abengi ukutetekela.—Imil. 19:1-20, 26.
2 Ilelo, umwinshi ukalamba uwa kubombeshamo walisuka kuli ifwe. Twalilaalikwa ukwafwilisha ifilonganino ifyo fishingapwishishisha ukubombela mu fifulo fyabo cila mwaka. Muli ifyo, ififulo fimo ifyabamo ukubulisha kuti fyabombelwamo pa kuti kwabako ukulinganya mu mibombele.—Linganyeniko 2 Abena Korinti 8:13-15.
3 Bushe Kuti Mwabomba Ukuli Ukubulisha Kukalamba? Bushe mwalipepelapo ukubombela mu fifulo fimbi? Nakalimo kuti mwayafwa icilonganino mu musumba mwikalamo. Mulandu nshi te kuti mulandile na kangalila wa muputule pa lwa uyo mulandu no kumfwa fintu engatubulula? Nelyo limbi kuti caba ifyo mu cifulo ca kubombelamo ica cilonganino cenu cine, mwaliba bankomamatwi abengi nelyo aba ndimi sha mu fyalo fimbi abo takuli nangu umo uwabashimikila. Pa kuti mwingashimikila kuli aba bonse, bushe kuti mwapilikita ukusambilila ululimi lwabo? Lyene na kabili, nakalimo mwaliba ibumba lya lulimi lumbi nelyo icilonganino lwa mupepi ico ‘cilomba bakabomba ba Bufumu ukufuma ku Mwine wa kulobolola.’ (Mat. 9:37, 38) Nga e fyo cili, bushe kuti mwayafwilisha?
4 Mu myaka ya nomba line, amakana ya ndupwa sha Bwina Kristu balikuukila ku fyalo fimbi pa kuti bengabombako umulimo wa kulobolola apakalamba. Umulume no mukashi ababombele muli iyi nshila batile: “Twalefwaya ukubombela Yehova uko twingaafwa abantu abengi.” Nga ca kuti na imwe e fyo mufwaya ukucita kabili mwasanga ifyo kuti mwakuukila kumbi muli cino calo, intanshi lanshanyeni na baeluda ba mu cilonganino cenu ifyo mulepanga ukucita.
5 Nga ca kuti mulefwaya ukwipusha Sosaite pa lwa fifulo filiko ukubulisha, peniko Komiti wa Mulimo uwa Cilonganino kalata uulelondolola ifyo mulefwaisha mu kulungatika. Bakalambatikako kalata wabo no kutuma ku Sosaite. Nangu ni fyo, apo fye umwinshi ukalamba uwa kubombeshamo walisuka, shi ifwe bonse natutwalilile ukuba abapamfiwa mu mulimo wa kwa Yehova.—1 Kor. 15:58.