Yehova Apeela Ukucishamo kwa Maka
1 Ishuko lyaumisho mutengo ilya mulimo washila lyaliseekeshiwa ku basambi ba kwa Yesu bonse. Ili shuko butumikishi bwa Bwina Kristu. (Mat. 24:14; 28:19, 20) Lelo ukukanapwililika kwa buntu no kutitikisha kwa ino micitile ya fintu pambi inshita shimo kuti fyatulenga ukuyumfwa ukuti tatwafikapo.
2 Lintu ici cacitika kuti twasansamushiwa na kalata wa kwa Paulo uo alembeele Abena Kristu basubwa mu Korinti. Alembele ukuti: “Tuli ne cuma ici mu fipe fye bumba.” (2 Kor. 4:7) Paulo aali uwacetekela ukuti: “Pa kuba na bukapyunga ubu . . . , tatunenuka.” (2 Kor. 4:1) Ca cine, tacayanguka ukutwalilila ukubila imbila nsuma no ‘kukananenuka’ nampo nga twalisubwa nelyo tuli “mpaanga shimbi.” Tukabila amaka ukufuma kuli Lesa, uupeela “ukucishamo kwa maka.”—Yoh. 10:16; 2 Kor. 4:7b.
3 Ica kukoselesha ca kuti, Inte shingi ni bakabila ba mbila nsuma abapimpa te mulandu no kushomboka no kukaanya kwatapata, ukulwalilila sana, nelyo ukubulwa indalama. Bonse ifwe tufwile ukwishiba ukuti Yehova e wafwilisha umulimo wesu uwa kushimikila. Mu cifulo ca kulenga ukufuupulwa nelyo umwenso ukutunenuna mu kushimikila, lekeni ‘[tutwalilile, NW] abakosa muli Shikulu na mu bulamba bwa maka yakwe.’—Efes. 6:10; Amapi. 24:10.
4 Ifya Kukwata Amaka ya kwa Lesa: Beni aba mukoosha mwi pepo, ukulomba ubwafwilisho bwa kwa Lesa na maka. (Rom. 12:12; Fil. 4:6, 7) Lyene, tetekeleni Yehova no mutima wenu onse ukuti akapayanya ukucishamo kwa maka. (Amapi. 3:5) Mulebelenga amalyashi ya bumi bwa bamo aya muno nshiku muli bamagazini besu, pantu yapeela ubushininkisho bwa kuti Yehova aleafwa ababomfi bakwe ukushipikisha ifya kwesha. Mulebishanya mu kupalamisha na bamunyina mu cilonganino, kabili te kwesha ukuleka ukulongana.—Rom. 1:11, 12; Heb. 10:24, 25.
5 Natubombeshe na maka yesu yonse ku kuba abalinga ukupokelela amaka ya kwa Yehova—amaka yacishamo kabili ayakatwaafwa ukukananenuka mu mulimo wacindamisha uwa kushimikila Ubufumu.