Langisheni Umucinshi ku Cifulo ca Kupepelako Yehova

¹ Lintu tuli abeni mu ng’anda ya bamo, tulalango mucinshi ku fipe fyabo, tatucita icili conse ku kufyonaula, kabili tatupumfyanya imibombele ya ilya ng’anda. Uyo mucinshi ufwile ukucililako maka maka lintu tuli abeni ba kwa Yehova! Tufwile ukwishiba ifya kwikala mu ng’anda yakwe. (Ilu. 15:1; 1 Tim. 3:15) Nampo nga tulonganina mu Ng’anda ya Bufumu, mu ng’anda ya kwa munyina, nelyo mu cikuulwa ca cintubwingi, icinabwingi ica ifwe tulalangisha umucinshi ku ncende ya kupepelako kwati ni ng’anda ya kwa Yehova, uo “bukatebebe bwakwe bwapula pano isonde na mu muulu.”—Ilu. 148:13.

² Bamunyina bamo tabalangisha umucinshi ku kulongana pa mulandu wa kuti balakafya icongo nelyo ukulacita kwati ifyebo filelandwa tafyacindama. Abakalamba bamo balashimika fye amalyashi pa lukungu, ku cimbusu, nelyo pa nse ya Ng’anda ya Bufumu ilyo ukulongana kuletungululwa. Lintu umwana umukalambapo alekelwa ukulolekesha pa mwaice wakwe, inshita shimo aba babili balatendeka ukwangala na muli fyo ukukanamwenamo sana muli programu. Abacaice bamo balamonwa pa nse ya Ng’anda ya Bufumu pa numa ya kulongana, baleangala, ukucishamo ukukafya icongo, no kwangala fye lubuli lubuli. Mu nshita shimo balipumfyanya abena mupalamano, nelyo ukupumfyanya abaleensha bamotoka umwa kwimikila bamotoka nelyo mu musebo.

³ Ifya Kusengauka Ukubulwa Umucinshi: Ukutesekesha ubucindami no kushila kwa kupepa kwesu, ukwabula ukutwishika te kuti tufwaye ukupumfyanya bambi ukupitila mu kutepeleshanya, ukulya, ukusheta cungamu, ukulalisha amapepala, ukulaya ku cimbusu libili libili ukwabula no mulandu wine wine, nelyo ukubelesha ukucelwa mu kulongana. Abafyashi bakwata umucinshi kabili abatesekesha tabasuminisha abana babo ukusafya, ukulamfya imipando, nelyo ifibumba fya mu Ng’anda ya Bufumu nelyo mu ng’anda umutungulwilwa isambililo lya citabo. Kabili ukwabula ukutwishika ifwe bonse tulasumina ukuti ku kulongana te ku cifulo ca lyashi lya nsoni, ilyashi lya buwelewele, nelyo ilya kwalikana.—Efes. 5:4.

⁴ Nga ca kuti lyonse tuleibukisha imifwaile ya kulongana kwesu ukwa Bwina Kristu, tukashininkisho kuti ifwe na bana besu tulelangisha umucinshi ku kupepa kwa kwa Yehova mu cifulo ‘twasala ukuba.’—Ilu. 84:10.