Ikaleni Imiikalile Iyawamine Mbila Nsuma
1 Pamo nge Nte sha kwa Yehova, tufwaisha ukucindika ishina lya kwa Yehova. Twalishiba ukuti imyendele yesu, imilandile, imisakwile, ne mifwalile kuti fyasonga inshila bambi bamwenamo ukupepa kwa cine. Ici cilacilapo kube fyo lintu tuli pa kulongana kwesu. Tulefwaya ukushininkisha ukuti icili conse icilesoswa no kucitwa pa kulongana cili icawamine mbila nsuma kabili cilecindika Yehova.—Fil. 2:4.
2 Ubwingi bwa fipimo fya mu calo ifya mifwalile ne misakwile tafyasuminishiwa ku Bena Kristu. Uyu uli mulandu uyo abatumikishi ba mbila nsuma balekabila ukupeelako kusakamana nga nshi. Ulupungu lwa kwa Kalinda ulwa June 1, 1989, ibula 20, lwalondolwele ukuti: “Ukufwala kwesu takulekabilwa ukubo kwa mutengo, lelo kulingile ukuba ukwa busaka, ukwapokelelwa, kabili ukwayana. Insapato shesu shilingile ukuba ishalungishiwa bwino kabili mu mimonekele isuma. Mu kupalako, pa kulongana konse, ukusanshako Isambililo lya Citabo pa Cilonganino, imibili yesu ilingile ukuba iya busaka, kabili tulingile ukufwala mu kupempenkana kabili mu kulinga.”
3 Ukufika mu nshita kwaba cishibilo ca kulangulukilako no kutontonkanya kwabamo kutemwa. Mu tushita tumo tumo, imibele ishingasengaukwa kuti yatulenga ukucelwa ku kulongana. Lelo ukucelwa mu cibelesho kuti kwalangisha ukubulisha umucinshi ku mifwaile yashila iya kulongana no kufilwa ukutesekesha icishingamo cesu ica kusengauka ukupumfyanya bambi. Abacelwa ilingi line balapumbula bambi no kubacilikila ukunonkelamo mu kukumanina ukufuma muli programu. Ukufika mu nshita kulangisha umucinshi ku kuyumfwa na mabuseko ya basangilweko bonse.
4 Ukutemwa abena mupalamano besu kulingile ukutulenga ukuba abasakamanishisha ukusengauka ifya kupumbula mu kati ka kulongana. Ukutepeleshanya, ukulya, ukusheta switi wa bulimbo, ukulishalisha amapepala, no kulaya libili libili ku cimbusu kuti fyapumfyanya ukukutikisha kwa bambi no kucefyako umucinshi wawamina icifulo ca kwa Yehova ica kupepelapo. Tacili icalinga ku bali bonse ukulabomba umulimo wa cilonganino nelyo ukulanshanya na bambi kano fye nga kwabako imibele ya mu kampampa iyakabila ukuti bamunyina bafume pa fipuna fyabo. Nga te ifyo, bonse balingile ukwikala no kulakutika kuli programu pa kuti bengainonsha abene no kunonsha indupwa shabo. Imisango yabipa taifwile ukusangwa mu Ŋanda ya Bufumu pa mulandu wa kuti “ukutemwa . . . takucita cishiyene.”—1 Kor. 13:4, 5; Gal. 6:10.
5 Imyendele isuma iya bana besu pa kulongana na yo ilalumbanya no kucindika ishina lya kwa Yehova. Ukwangalila kwasakamanishisha ukwa bafyashi kwalicindama. Abana balingile ukukoseleshiwa ukukutika no kwakanamo. Abafyashi abengi ababa na bana banono basalapo ukwikala pa cifulo apo bengafuma bwangu no kusakamana ukukabila kwa bacaice babo ukwabulo kupumbula bambi mu kucishamo.
6 Paulo akonkomeshe ukuti: “Ikaleni imiikalile iyawamine mbila nsuma.” (Fil. 1:27) Lekeni, kanshi, tutukushe ukuba ne misango isuma no kulangulukilako bambi lintu tulesangwa ku kulongana. Ukubombela pamo ukwa bonse kukashininkisha ukuti kwabako ‘ukusansamushanya mu citetekelo ca umo no munankwe.’—Rom. 1:12.