Bakapepa Bafwile Ukuba ne Misango Isuma

¹ Banono abakwata imisango isuma pali lelo. Cinshi calenga? Abantu baba abapamfiwa ica kuti ilingi line tabebukisha ukulanda amashiwi ya mucinshi wa cifyalilwa ayaba nga “Mukwai,” “Natasha,” nelyo “Munjeleleko.” Icebo ca kwa Lesa casobele ukuti imisango isuma ikacepa mu nshiku sha kulekelesha ilyo calandile ukuti abantu ‘bakaba abaitemwa, aba mataki, aba miiya, abashitootela, abaumalala, ababulo kuiteka, abashatemwa busuma, kabili bacintalika.’ (2 Tim. 3:1-4) Yonse iyi mibele e yalenga abantu ukuba ne misango yabipa. Nga bakapepa, Abena Kristu bafwile ukucenjela pa kuti tabatendeke ukukonkelesha imisango ya muno calo iya kukanacindika bambi.

² Nge Misango E Cinshi? Imisango isuma kuti twatila kupoosa amano ku fyo abantu bambi bengomfwa nga twacita cimo, ukwikala na bantu mutende mutende. Imisango imo iisuma kulangulukilako bambi, umucinshi wa cifyalilwa, icikuuku no kutekanya. Icilenga umuntu ukuba ne yi misango mulandu wa kutemwa Lesa no muntu munankwe. (Luka 10:27) Iyi misango tatushita, lelo yalicindama nga nshi pa kwikala bwino na bantu banensu.

³ Yesu Kristu aimike ica kumwenako capwililika. Lyonse alekonka Ifunde lya Mulinganya: “Ifyo mwatemwa abantu bacite kuli imwe, na imwe baciteni ifyo fine.” (Luka 6:31) Bushe tatusunguka pa misango isuma iya kwa Yesu na pa fyo aali no kutemwa pa kubomba na basambi bakwe? (Mat. 11:28-30) Imisango yakwe iisuma tayafumine mu fitabo fya mafunde ya cifyalilwa. Yafumine ku mutima wa cishinka kabili uwa bukapekape. Tufwile ukwesha ukupashanya ica kumwenako cakwe icisuma.

⁴ Ni lilali Abena Kristu bafwile ukuba ne misango isuma? Bushe ni lintu fye kuli cimo icaibela icilecitika, ilyo balefwaya ukupanga ishina lisuma? Bushe ni lintu fye balefwaya bamo babamone? Iyo! Tufwile ukuba ne misango isuma lyonse. Ni mu nshila shimo umo tufwile ukwangwa ku kuba ne misango isuma pa kubishanya na bamunyinefwe mu cilonganino?

⁵ Pa Ng’anda ya Bufumu: Ing’anda ya Bufumu cifulo cesu ica kupepelamo. Ni Yehova Lesa e utwita ukuyako. E kutila tuba abeni. (Amalu. 15:1) Bushe tuba abeni basuma ilyo twaisa ku Ng’anda ya Bufumu? Bushe tulasakamana imifwalile yesu no kupempenkana? Kwena kuti cawama imifwalile yesu yaba iyayana no kulongana, taifwile ukuba cimbi cimbi fye. Lyonse ilyo balesangwa ku mabungano nelyo ku kulongana kwa pa cilonganino ukwa cila mulungu, abantu ba kwa Yehova baishibikwa ukuti balamoneka bwino ukulingana ne fifwile ukumoneka uuleitunga ukucindika Lesa. (1 Tim. 2:9, 10) Nga twacite co ninshi tuleyangwa ku kucindika bonse babili, Shibweni wesu uwa mu muulu na beni banensu abo etileko.

⁶ Cimbi ico twingacita pa kulanga imisango isuma pa kulongana caba kukanacelwa. Ukulanda fye icishinka ici tacayanguka. Bamo nalimo kuti bekalila ukutali nelyo balikwata ulupwa lukalamba ulwa kupempenkanya. Na lyo line, casangwa ukuti umwata wa bakasabankanya abengiko mu filonganino fimo waba wa kufika pa numa ya lwimbo ne pepo lya kwiswila. Uyu mulandu wena ufwile ukupooswako amano. Cisuma ukulaibukisha ukuti ukuba ne misango isuma kwakuma na ku kupoosa amano ku fyo bambi bengomfwa pa co twacita. Yehova, Shibweni wesu uwa bukapekape, atutebeta iyi mitebeto ya ku mupashi pa kuti tumwenemo. Ukukanacelwa e cilanga ukuti tulatasha kabili twalyangwako ku fyo engatumona. Na kabili, ukucelwa ku kulongana kulapumfyanya bambi kabili takulanga mucinshi ku bantu tusanga nabekala.

⁷ Ilyo tuli pa kulongana, bushe tulapoosa amano ku kumona abapya abeshile? Ukubasengela na ko kwine musango usuma. (Mat. 5:47; Rom. 15:7) Ukubaposha ne nsansa, ukubafunka mu minwe, ukubamwentwila, fyonse ifi fimoneka kwati tuntu utunono, lelo ni fimo pa filenga ukuti twishibikwe nga Bena Kristu ba cine. (Yoh. 13:35) Ilyo aile ku Ng’anda ya Bufumu umuku wa kubalilapo, umwaume umo atile: “Pa bushiku fye bumo, nasangile abantu ababa no kutemwa kwine kwine, abo nshaishiba nangu panono, ukucila abantu bonse abo naishibana na bo ku calici uko nakulila. Ilyo line nalimwene no kumona ukuti nasange cine.” Ne co calengele ayalula imikalile yakwe, kabili ilyo papitile fye imyeshi 7 alibatishiwe. Cine cine, kanshi imisango isuma kuti yalenga ifikulu fikulu fimo fyacitika!

⁸ Nga twaba ne misango isuma ku bantu tushaishibana na bo abo tukumanya fye, bushe tatufwile ukuba ifyo fine “no kucishamo ku ba bwananyina bwa mu citetekelo”? (Gal. 6:10) Ici cishinte ce funde cilabomba: “Ku cinso ca wa mfwi uleima, ulecindika ne cinso ca mukote.” (Lebi 19:32) Tufwile ukwangwa aba musango yo ilyo tuli pa kulongana kwesu.

⁹ Ukukutikisha: Ilyo tuli pa kulongana kwa pa cilonganino, ico bakapyunga ba Bwina Kristu aba kwa Lesa balandila kutupeelako ica bupe ca bumupashi ku kutukuula. (Rom. 1:11) Kwena te kuti tulange imisango isuma nga tuleshipula, tulesheta cungamu, libili libili twalatepeleshanya no muntu twikele nankwe mupepi, ukuya libili libili ku cimbusu, ukubelenga ifyesu, nelyo ukulacita ifintu fimbi ilyo amalyashi yalelandwa. Baeluda bafwile ukuba ifya kumwenako muli ici. Imisango isuma iya Bwina Kristu ikatucincisha ukupeela umucinshi walinga kuli kalanda na ku bukombe alelanda ubwa muli Baibolo pa kukutikisha ifyo alesosa.

¹⁰ Na kabili, pa kucindika kalanda ne bumba, tatufwile ukuleka ifipe fya muno nshiku ifili nga inkoloko na mafoni ya cellular ukuti filepumfyanya ukulongana kwesu.

¹¹ Imisango Isuma na Bana: Abafyashi lyonse bafwile ukwangwa ku mibele ya bana babo. Nga ca kuti umwana atampa ukulila nelyo alepulukuta ilyo amalyashi yalelandwa no kutendeka ukupumfyanya bambi, cilawama ukwangufyanya ukutwala umwana pa nse ku kumusunsuntila. Ukucite co inshita shimo kuti kwayafyako, lelo ibukisheni ukuti ico cilanga ukuti mwalyangwa ku fyo bambi bengomfwa pa cilecitika. Abafyashi ababa na bana banono abalilalila ilingi line balatemwa ukwikalila mupepi na ku mwinshi pa kuti tabalepumfyanya abantu abengi pa kwimaima ilyo amalyashi yalelandwa. Kwena, bambi na bo kuti balangulukilako abafyashi ba musango yo pa kubashiila ifipuna fya ku numa nga balefikabila.

¹² Abafyashi na kabili bafwile ukusopa abana pa ntanshi na pa numa ya kulongana. Abana tabafwile ukulabutauka mu Ng’anda ya Bufumu, pantu kuti baicena. E cimo no kubutauka pa nse no kushinguluka Ing’anda ya Bufumu, kuti kwaleta ubusanso maka maka nga ni pa cungulo bushiku ilyo kwaya kulefiita. Ukupanga icongo ilyo tuli pa nse kuti kwapumfyanya abena mupalamano kabili kuti kwalenga basuula no kupepa kwesu. Abafyashi ababombesha ukusopa abana mu Ng’anda ya Bufumu na panse bafwile ukutashiwa pantu ico cilalundako ubusuma bwa kuba pamo na ba bwananyina.—Amalu. 133:1.

¹³ Pe Sambililo lya Citabo: Tulatasha bamunyinefwe ababa ne cileela ca kusuminisha amayanda yabo ukubomfiwa ku kulongana kwa cilonganino. Ilyo twaya kwi sambililo lya citabo, tufwile ukucindika no kusakamana ifipe fyabo. Tufwile ukukuumuna bwino insapato ilyo tushilaingila pa kuti tatulamfishe mu ng’anda nelyo kapeti. Abafyashi bafwile ukusopa abana, ukushininkisha ukuti bekele mu muputule wa ng’anda umubela isambililo lya citabo. Ca cine ukuti abantu kuti baba banono kabili nalimo te kuti cimoneke sana ukuti tuli pa kulongana, na lyo line tatufwile ukwangasha ifipe fya bene ifya mu ng’anda. Umwana nga alefwaya ukuya ku cimbusu, umufyashi afwile ukumutwala. Na kabili, apo isambililo lya citabo kulongana kwa cilonganino, tufwile ukufwala filya fine tufwala pa kuya ku Ng’anda ya Bufumu.

¹⁴ Imisango Isuma Yalicindama: Ukuba ne misango ya Bwina Kristu kulacindika bukapyunga bwesu kabili kulalenga twalaumfwana na bantu banensu. (2 Kor. 6:3, 4, 6) Nga bakapepa ba kwa Lesa wa nsansa, cifwile ukutwangukila ukumwentula, ukuba abashaifinya, ukucita tumo utumoneka utunono lelo utulanga icikuuku no kulenga bambi ukusekelela. Iyi misango isuma ikalapuulamika imikalile yesu nga bakapepa.