Mwe Bafyashi—Imikeni ica Kumwenako Cisuma ku Bana Benu
1 Icebo ca kwa Lesa citweba ukuti “ukwanga kuti ayanga wishi [na nyina] wa mulungami.” (Amapi. 23:24, 25) Mwandi lipaalo ku bafyashi abaimikila abana babo ica kumwenako cisuma! Uwaba muli Komiti wa Musambo alandile pa lwa bafyashi bakwe ukuti: “Icine cali e mikalile yabo, na ine wine nalefwaya ukucisangula e mikalile yandi.” Finshi abana bafwile ukumona ku bafyashi babo?
2 Beni ne Misango Isuma no Mucinshi Wine Wine: Mulimo wa bafyashi ukusambilisha abana imisango isuma. Abana tabasambilila imisango isuma ukupitila fye mu kubalondolwela. Basambilila ku fyo bamona no kupashanya. E co, misango nshi mulanga? Bushe abana benu balamumfwa mulelanda mucinshi mucinshi, insoselo pamo nga “banjeleleko mukwai,” nelyo “Natootela mukwai”? Bushe mulacindikana mu lupwa lwenu? Bushe mulakutika ilyo bambi balelanda? Bushe mulakutika ilyo abana benu balelanda na imwe? Bushe mulalanga imisango isuma lyonse, ku Ng’anda ya Bufumu e lyo na lintu muli mweka ku ng’anda ku mwenu?
3 Abakosa lwa ku Mupashi Kabili Abapimpa mu Mulimo: Munyina uwabomba imyaka ukucila 50 mu mulimo wa nshita yonse ebukisha ukuti: “Batata na bamayo bali ca kumwenako cishaiwamina mu kucindika ukulongana na mu kupimpa kwabo mu butumikishi.” Kuti mwalanga shani abana benu ukuti mwalipoosako amano ku kulundulula bumupashi bwa baba mu ng’anda yenu? Bushe mulalanshanya ilembo lya bushiku capamo? Bushe mulasambilila Baibolo lyonse ngo lupwa? Bushe abana benu balamumona mulebelenga Baibolo ne mpapulo sha Sosaite? Finshi bomfwa ifyo mulumbula mwi pepo lyenu ilya lupwa? Bushe mulalanshanya na bana benu pa fintu ifikuulilila lwa ku mupashi, ukulanda ifisuma pa lwa cine na pa lwa cilonganino cenu? Bushe mwalicincila ukusangwa ku kulongana konse no kuya mu butumikishi capamo ngo lupwa?
4 Mwe bafyashi, tontonkanyenipo pa ca kumwenako muleimikila abana benu. Imikeni ica kumwenako icawamisha, kabili bakamupashanya mu bumi bwabo bonse. Umukashi wa kwa kangalila wenda, uuli nomba mu myaka ya ba 70 atile: “Na nomba ncili ndamwenamo mu ca kumwenako cisuma ica bafyashi bandi Abena Kristu abasuma. Ndafwaisha nga nshi ukulanga lyonse ukuti ndatasha icine cine pali ubu bupyani, ukupitila mu kutwalilila ukububomfya bwino ku ciyayaya conse.”