Bekelweni mu Bunte bwa Kushimikisha
1 Bonse ifwe tulaipakisha ukucita ifintu ifyo tubomba bwino. Marko 7:37 asosa ukuti amabumba babilishe ukulosha kuli Yesu ukuti: “Nacita bwino bwino ifintu fyonse!” E mulandu wine Yesu abekelwe mu kucita ukufwaya kwa kwa Yehova! (Linganyeniko Ilumbo 40:8.) Ukupitila mu kubebeta imitubululo ikonkelepo, na ifwe bene tukasanga ubuseko ilyo tuleumfwila ikambisho lya kwa Yesu ilya “kubila ku Bantu, no kushimikisha.” (Imil. 10:42) Mu January tuletambika icitabo icili conse icakwata amabula 192 icasabankanishiwe pa ntanshi ya 1985 ico icilonganino cikwete nelyo ifitabo fya Ukusapika Lesa nelyo ica Umuntu Wakulisha. Ni shani fintu twingabomfya ishi mpapulo ku kucito bunte bwakumanina?
2 Apantu abantu ilingi balasakamikwa pa lwa butuntulu bwa bumi, pambi kuti mwasosa ifi:
◼ “Te mulandu no bwingi bwa fya miti miti ifyo basanga, kuli ukucula sana pa mulandu wa malwele. Ukulingana ne fyo mulemona, mulandu nshi cibelele fi? [Lekeni asuke.] Yesu Kristu asosele ukuti ifikuko fikaba lubali lwa nshiku sha kulekelesha. (Luka 21:11) Nalyo line, Baibolo na kabili ilondolola inshita ilyo kushakabe ukulwala. [Belengeni Esaya 33:24.] Moneni ifyo ici citabo cicincisha isubilo muli ilyo isambilisho lya Baibolo ilya kutendekelako.” Komaileni pa fyebo filingile mu citabo muletambika, kabili shalikeni.
3 Nga mulecita ubunte bwa mu lyashi mupepi na matuuka, kuti mwabaposha no kubepusha ukuti:
◼ “Bushe mumona ukuti ifintu fileluminako umutengo shino nshiku ica kuti nacafya ukukwata indalama ishingi isha kushita fyonse ifyo mulefwaya? [Lekeni asuke.] Bushe mulatontonkanyapo ukuti inshita ikesa lintu takwakabe ubwafya bwa fya bunonshi?” Lekeni asuke. Lyene mulangisheni Ilembo lyambwilwe ilyalinga mu citabo muleshalika. Konkanyenipo ukusosa ukuti: “Ici citabo cilangilila ifyo, ukupitila mu Bufumu bwakwe, Lesa akapikulula amafya ayalenga ubumi ukuba ubwayafya sana ilelo.” Tambikeni icitabo. Kuti mwasosa fintu mwaciipakisha ukulanshanya, lyene no kwipusha ukuti: “Bushe kuti twatwalilila no kulanshanya uku pa nshita imbi?” Muli iyi nshila kuti mwapoka inambala ya lamya nelyo iya ng’anda.
4 Pa numa ya kuishibisha, pambi kuti mwasosa ukuti:
◼ “Pa mulandu wa mipepele iingi ilelo, bushe mwalitalalanguluka ifyo twingeshiba nga ca kuti imipepele yesu yalisuminishiwa na Lesa? [Lekeni asuke, lyene langisheni icikope pe bula 13 ilya citabo ca Ukusapika Lesa Ukwa Mutundu wa Muntu.] Ici cikope cilelangilila ifyo imipepele yaacita mu nkondo ishingi ishaonaula umuntu no kuleta ukucula kushaifulila. [Belengeni Mateo 7:17-20, ukufuma mu paragrafu 19. Lyene belengeni amashiwi ya pa cikope.] Pa mulandu wa fyo tumona mu mipepele na mu cilangililo Yesu apeele, kuti twasondwelela ukuti imibele ya muntu umo na umo ilangisha apakalamba nelyo apanono, pa lwa mipepele yakwe. E co, ukubebeta kwa ici citabo ukwa kusapika Lesa ukwa muntu ukupitila mu mipepele ya calo kukasuka ifipusho fyenu fimo fimo.” Tambikeni icitabo.—Ku kusanga inshila shimbi ishibomba bwino isha kutambikilamo icitabo ca Ukusapika Lesa Ukwa Mutundu wa Muntu, moneni ibula lya ku numa ilya Ubutumikishi Bwesu Ubwa Bufumu ubwa June 1992 mu ciNgeleshi. Ku citabo ca Umuntu Wakulisha, moneni ibula 4 ilya Ubutumikishi Bwesu Ubwa Bufumu ubwa June 1993.
5 Lintu mwabwelela ku kumona abalefwaisha ukwishiba icine, kuti mwaesha ukutendeka isambililo lya Baibolo ukubomfya iyi nshila:
◼ “Umuku wa kulekelesha twalanshenye, mwalandile icintu icisuma. [Lumbuleni ifyebo uyo muntu asosele.] Naletontonkanyapo, kabili kuti natemwa ukumwebako ifyo nasangile mu kusapika kwandi pa lwa lilya lyashi. [Lanshanyeni pe lembo lilingile.] Tulatungulula isambililo lya pa fye ilyalenga amamilioni ukusambilila ifisambilisho fya Baibolo ifya kutendekelako mu kashita fye akanono. Ukubebeta kwa musango yu kuti kwakusha ukucetekela kwenu mu kufikilishiwa kwa malayo ya kwa Lesa ayashakafilwe.” Komaileni pa fipusho ifikasukwa. Nga ca kuti akaana isambililo lya Baibolo, londololeni ukuti na kabili twalikwata isambililo lyaibela ilya mu kwangufyanya ilisenda fye amaminiti 15 cila mulungu pa milungu 16. Mulangisheni broshuwa wa Cintu Lesa Afwaya, kabiyeni kwi sambililo 1, no kwipusha nga ca kuti kuti mwalangilila isambililo lya kubalilapo.
6 Muleibukisha Ukubomfya Batrakiti: Nangu cingati tunono, twakwata ubukombe ubwa maka kabili ubushinina. Ni shani fintu isambililo lingatendekwa muli trakiti? Kupeela fye mwine ng’anda trakiti uo mwishibe ukuti alamutemwa. Lyene, itendekeleniko, no kweba umwine ng’anda ukubelenga na imwe paragrafu wa kubalilapo. Belengeni amalembo yaloshiweko, no kulanshanya pa fyo yampene ne fyo trakiti ilelandapo. Pa muku wa kubalilapo, kuti mwalanshanya fye paragrafu umo nelyo yabili. Ilyo umwine ng’anda atendeka ukutesekesha ukuti alesambilila ifintu ifisuma ukufuma mu Baibolo, kuti mwaingilishako inshita mupoosa mu kulanshanya nankwe.
7 Beni abakampuka mu mulimo wenu, kabili mukaba aba nsansa muli wene. Mulepoosako amano lyonse ku kucito bunte bwakushimikisha, kabili bekelweni mu kubomba bwino imbali shonse isha butumikishi.—1 Tim. 4:16.