Ukulenga Ishina lya kwa Yehova Ukwishibwa mwi Sonde Lyonse
1 Ilyo Yesu atumine abasambi bakwe ku kuba inte ukufika “ku mpela ya pano nse,” ninshi kale kale alibemikile ica kumwenako ca kuti bakonke. (Imil. 1:8) Lyonse lintu asangile abantu na konse uko abasangile, alilandile na bene pa lwa mifwaile ya kwa Lesa ku bantunse. Ukupashanya Yesu, umusha wa cishinka alebomfya inshila shapusanapusana ukulenga ishina lya kwa Yehova ukwishibwa “pano isonde ponse.”—Esa. 12:4, 5.
2 Ifyalecitika Kale: Kale, amalyashi yalesabankanishiwa mu manyunshipepala; ilyashi lya fikope ilyaleitwa “Photo-Drama of Creation” lyalifumine kabili balilitambishe ku bantu abengi nga nshi. Kwali ukubomfya bamotoka bakobekwako ifisoselo; kwali no kubomfya sana ifilimba fya maseleti, kabili na pa kashita kamo balelanda pa mulabasa. Shonse ishi nshila shalebomfiwa ku kushimikila imbila nsuma. Ilelo bonse bakoseleshiwa ukulanda na bantu pa kanwa nkati pa kuti ukufwaisha kwa balefwaya icine kwingalundululwa. Na pali ino nshita, ukuya ku ng’anda ne ng’anda kwaba e nshila yawamisha iya kulenga ishina lya kwa Yehova ukwishibwa apali ponse.—Imil. 5:42.
3 Ifilecitika Pali Ino Nshita: Apo inshita ilealukaaluka, ifintu mu calo na fyo filealuka lubilo lubilo, kabili mu fyalo ifingi abantu ilingi line tabasangwa pa mayanda. Banono abekalako pa nshi ku kubelenga no kwetetula pa fya ku mupashi. Ne fwe bene tufwile ukwalula ifyo tubomba mu butumikishi bwesu. Ukulunda pa kushimikila ku ng’anda ne ng’anda mu cifulo tubombela, twalikoseleshiwa no kuya ukusangwa abantu no kuba “abaiteyanya pe” ku kuisosela kuli onse pa kutetekela ukuli muli ifwe. (1 Pet. 3:15) E kutila tufwile ukutukusha ukushimikila ku bantu tubomba na bo, abana be sukulu banensu, mu misebo, mu maparka, mulya bemika bamotoka, kwi tuuka ne tuuka, no kuli konse kumbi ukwingasangwa abantu. Apo tulatungililwa na Yehova, ukubombesha kwesu kulafumamo ifisuma. Bushe na imwe mulaya uko abantu bengasangwa?
4 Shi na ifwe nga abantu umo umo natubombeshe apapela amaka yesu ukulenga ishina lya kwa Yehova ukwishibwa mu cifulo tubombelamo. Kuti twaikushiwa icine cine nga twafishapo bukapyunga bwesu, ilyo tuleshintilila pali Yehova ukuti akule aba mitima isuma.—Yoh. 6:44.