Icitabo ca Baibolo Isambilisha E co Twakulabomfya ku Masambililo ya Baibolo
1 Kwena caliweme ukupokelela icitabo citila Bushe Cinshi Baibolo Isambilisha?, icafumine pa Kulongana kwa Citungu ukwaleti “Icumfwila ca Bukapepa!” Abasangilwe ku kulongana balyumfwile bwino ilyo bapokeleko icitabo pa mpela ya kulongana pa bushiku bwa cibili. Bushe cikabomfiwa shani ici citabo cipya ica kusambililamo na bantu? E citabo tukalatungulwilamo amasambililo ya Baibolo. Nangu ca kutila intanshi tukashalika ici citabo ku bantu mu March, bakasabankanya balekoseleshiwa ukutendeka ukucibomfya ili line ku kutampa no kulatungulula amasambililo ya Baibolo.
2 Abaletungulula Amasambililo Ino Nshita: Bakasabankanya abaletungulula amasambililo ya Baibolo mu citabo ca Ukwishiba nelyo muli broshuwa wa Cintu Lesa Afwaya, bafwile ukumona abene ifyo bengatendeka ukubomfya ici citabo icipya e lyo na lintu cingalinga ukutendeka. Nga ni nomba line mwatendeke ukusambilila, tampeni fye cipya cipya ukusambilila icitabo icipya. Mutampile pa ntendekelo. Nga ca kutila mwalifika apatali mu citabo ca Ukwishiba, kuti mwatwalilila ukusambilila mu citabo ca Baibolo Isambilisha pa mutwe uulingene no mutwe mulimo. Nga muli mu kupwisha ukusambilila icitabo ca Ukwishiba, ninshi kuti mwatwalilila fye ukusambilila mpaka mwapwisha.
3 Kwena fwe bengi twalishibapo abantu abengafwaya ukusambilila Baibolo mu citabo ca Baibolo Isambilisha. Kanshi nga pali abo mwishibe, bebeni ukuti mulefwaya mulebasambilisha Baibolo ukubomfya ici citabo cakwata amasambililo yakonkana bwino. Ku ca kumwenako, abasambilile broshuwa wa Cintu Lesa Afwaya nelyo icitabo ca Ukwishiba abashalundulwike ukufika ku kuipeela no kubatishiwa kuti batendeka ukusambilila ici citabo icipya. Abafyashi kuti balabomfya ici citabo ilyo balesambilisha abana babo ukwishiba bwino bwino ifyo Lesa afwaya.—Kol. 1:9, 10.
4 Ukusambilila Icitabo ca Bubili: Bushe kukalaba ukusambilila icitabo ca bubili umusambi nga apwisha ukusambilila icitabo citila Bushe Cinshi Baibolo Isambilisha? Ee. Nga ca kutila umusambi alelunduluka, nangu fye ni panono panono, kabili alemoneka ukuti alitemwa ifyo asambilila, kuti mwatwalilila ukusambilila nankwe mu citabo ca Pepeni Lesa Wine Wine Eka. Natwishiba ukuti icitabo ca Baibolo Isambilisha cikatwafwa sana ukubomba umulimo wa kupanga abasambi.—Mat. 28:19, 20.