Umukululo wa Mepusho

◼ Fitabo nshi fibili ifyo tufwile ukusambilishamo amasambililo yesu aya Baibolo?

Icitabo ico tufwile ukubomfya sana ku kutendeka amasambililo ya Baibolo no kusambilishamo abantu, citabo ca Ico Baibolo Isambilisha. Kwena tatuletila te kuti mutendeke isambililo lya Baibolo mu citabo cimbi, lelo mu kwangufyanya fye mufwile ukutendeka ukubasambilisha mu citabo ca Ico Baibolo Isambilisha.

Nga mwapwisha ukusambilisha umusambi mu citabo ca Ico Baibolo Isambilisha kabili alelunduluka, kuti mwatendeka icitabo ca Pepeni Lesa. (Kol. 2:7) Pe bula 2 mu citabo ca Pepeni Lesa palondolola umulandu tufwile ukubomfesha ici citabo, patila: “Baibolo icincisha bonse abatemwa Lesa ‘ukulingulula . . . ifyalepa ne fyashika’ ifya cine cakwe icaumo mutengo. (Abena Efese. 3:18) Uyu e mulandu balembele cino citabo. Tulesubila ukuti cikamwafwa ukukula lwa ku mupashi kabili ukumupangasha ukwenda mu nshila ya kamfyemfye iitungulula ku bumi bwa mu calo cipya icalungama ica kwa Lesa.”

Nga ca kuti umusambi abatishiwa ilyo mushilapwisha ifi fitabo fyonse fibili, mufwile ukutwalilila ukusambilila mpaka icitabo calenga bubili capwa. Kasabankanya afwile ukupenda inshita, icipempu ca kubwelelamo ne sambililo lya Baibolo nangu ca kutila umusambi alibatishiwa. Kasabankanya uulebombela pamo no uletungulula ilyo sambililo, na o kuti apenda inshita.