Ukutantika Ukulongana kwa Mulimo
Umulungu wa Kutampa March 10
Ulwimbo 131
10 min: Ifya kubilisha fya pa mwenu. Konkeni imitubululo ili pe bula 4 nangu kuti mwabomfya fye inshila imbi iingalinga mu cifulo mubombela, citeni icilangililo pa fyo mwingapeela abantu Ulupungu lwa kwa Kalinda ulwa March 1 e lyo na Loleni! ya January–March pamo na kapepala ka kwitilapo abantu ku cibukisho.
20 min: Tubila Imbila Nsuma iya Fintu Ifisuma. Pa numa ya kulandapo fye panono ukwabula ukucila pali mineti imo, eluda alingile ukulanda ilyashi mu Ulupungu lwa kwa Kalinda ulwa July 1, 2005, amabuula 18-19, amaparagrafu 10-14. Lekeni abantu mwi bumba balande pa fyo ubukombe bwa Bufumu bwabasansamwishe ne fyo bwabalengele ukukwata isubilo ilyo fye babumfwile umuku wa kubalilapo.
15 min: “Twalikwata Ifyo Twingapeela Yehova.”a Inshita nga yashalako, ebeni ibumba ukuti balande pa malembo.
Umulungu wa Kutampa March 17
Ulwimbo 144
10 min: Ifya kubilisha fya pa mwenu. Ibukisheniko abantu mu cilonganino ukuti mu Kulongana kwa Mulimo ukwa uyu mulungu uleisa, balingile ukwisa na Ulupungu lwa kwa Kalinda ulwa April 1 na Loleni! ya January–March e lyo kabili balingile ukuipekanya ukwisa mu kulanshanya imitubululo yalinga iya kubomfya mu cifulo babombela umulimo wa kubila imbila nsuma. Salenimo Ifya Kubilisha mu Ubutumikishi Bwesu Ubwa Bufumu.
15 min: Umukululo wa Mepusho. Lilingile ukulandwa na eluda. Belengeni no kulanshanya icipande conse.
20 min: “Bushe Kuti Twa-afwa Shani Abakasangwa ku Cibukisho?”b Ilyo mulelanshanya paragrafu 5, citeni icilangililo icipi pa fyo mwingatendeka isambililo lya Baibolo ku muntu uwaishile ku cibukisho.
Ulwimbo 214
Umulungu wa Kutampa March 24
Ulwimbo 159
Icishibisho: Tamulingile ukulanshanya ifyebo fya kulongana kwa citungu ilyo umulungu wa March 24 taulafika. Ifilonganino tafifwile ukusesha Ukulongana kwa Mulimo ilyo umulungu wa March 24 taulafika, kano fye nga ca kuti kangalila wa muputule aletandalila icilonganino. Nga ca kuti takwakabe Ukulongana kwa Mulimo pa mulandu wa kuti icilonganino cikaba ku kulongana kwa muputule, bakangalila ba masambililo ya fitabo balingile ukubilisha inshiku sha kulongana kwa citungu e lyo ne cifulo uko bakalonganina pe sambililo lya citabo ilikabako mu mulungu wa March 24.
10 min: Ukubilisha kwa pa mwenu. Belengeni lipoti ya ndalama e lyo na kalata ya kumwishibisha ukuti ubupe mwatumine ku ofeshi bwalifika.
15 min: Ipekanyeni Ukupeela Abantu Bamagazini Abapya. Lanshanyeni ne bumba lyonse ifyebo ififumine mu Ulupungu lwa kwa Kalinda ulwa April 1 na Loleni! iya January–March. Nga mwapwisha fye ukupitulukamo panono mu fili muli aba bamagazini, ipusheni ibumba ukuti balande pa fipande ifyo balemona ukuti abantu kuti bafitemwa mu cifulo mubombela e lyo no mulandu fingabacebushisha. Ebeni ibumba ukuti balande pa fishinka fimo mu fipande ifyo balepanga ukubomfya mu mulimo. Cipusho nshi cingepushiwa pa kuti umo atampe ukulanshanya no muntu? Lyena, lilembo nshi mu cipande ilyo engakonkeshapo ukubelenga? Bomfyeni imitubululo iyo mumwene ukuti nailinga mu cifulo mubombela, mucite icilangililo pa fya kupeela abantu Ulupungu lwa kwa Kalinda ulwa April 1 na Loleni! ya January–March.
20 min: “Ukulongana kwa Citungu Ukwa Nte sha kwa Yehova Ukwa mu 2008 Ukuleti ‘Ukutungululwa no Mupashi wa kwa Lesa.’”c Kalemba wa cilonganino e ukalanda ili lyashi. Ilyo tamulalanshanya ifi fyebo fili mu ca mu kati, mutale mubelenge kalata iilelondolola uko mukalonganina iya CO March 20, 2008. Tasheni bonse pa kutendeka ino ine nshita ukuipekanishisha libela ukuya ku kulongana kwa citungu.
Ulwimbo 29
Umulungu wa Kutampa March 31
Ulwimbo 37
10 min: Ifya kubilisha fya pa mwenu. Ibukisheniko bakasabankanya ukutuma lipoti ya mulimo wa mwi bala iya March.
20 min: “Kalata Ukufuma kwi Bumba Litungulula,” ilyashi no kulanshanya na bali mwi bumba. Lekeni bakasabankanya babili nangu batatu balande pa fyacitike mwi bala ifili muli Yearbook maka maka ifyabakoseleshe. Ebeleni libela kasabankanya umo nangu babili aba kulanda ifyo batantika ukubelenga Yearbook. Pa kusondwelela, koselesheni bonse ukupwisha ukubelenga ici icitabo.
15 min: “Mulekoseleshanya Ilyo Muli mu Mulimo”d
Ulwimbo 122
Umulungu wa Kutampa April 7
Ulwimbo 186
10 min: Ifya kubilisha fya pa mwenu.
20 min: Cinshi Cilekulesha Ukubatishiwa Bwangu? Eluda alingile ukulanda ili ilyashi mu Ulupungu lwa kwa Kalinda ulwa July 1, 2006, amabula 29-30, amaparagrafu 14-17. Mu kwipifya, ipusheniko kasabankanya umo nangu babili ababatishiwe ninshi bali fye abaice sana. Cinshi calengele ukuti bapingulepo ukubatishiwa pa mushinku fye uunono? Bushe ulubatisho lwabacingilile shani pa mulandu wa kuti baali nomba abafikapo pa numa ya kubatishiwa?
15 min: Bushe Mwalyeshapo Ukutendeka Isambililo Apo Pene? Ilyashi e lyo no kulanshanya na bali mwi bumba mu ca mu kati mu Ubutumikishi Bwesu Ubwa Bufumu ubwa January 2002, ibula 6. Landeni pa mitubululo iyaba mu ca mu kati ne fyo mwingayalula ukutampa isambililo lya Baibolo mu citabo ca kuti Ico Baibolo Isambilisha. Lyena citeni icilangililo cimo nangu fibili. Koselesheni abantu mwi bumba ukweshako fye nangu umuku umo mu kati ka mulungu uleisa ukutendeka isambililo lya Baibolo pa muku wa kubalilapo fye mu citabo ca kuti Ico Baibolo Isambilisha.
Ulwimbo 225
[Amafutunoti]
a Mwifika kuli mineti imo ilyo mulelanda amashiwi ya kubalilapo, kabili tendekeni ukulanshanya kwa fipusho ne fyasuko.
b Mwifika kuli mineti imo ilyo mulelanda amashiwi ya kubalilapo, kabili tendekeni ukulanshanya kwa fipusho ne fyasuko.
c Mwifika kuli mineti imo ilyo mulelanda amashiwi ya kubalilapo, kabili tendekeni ukulanshanya kwa fipusho ne fyasuko.
d Mwifika kuli mineti imo ilyo mulelanda amashiwi ya kubalilapo, kabili tendekeni ukulanshanya kwa fipusho ne fyasuko.