Ukutasha Lesa pa Bupe Bukalamba Atupeela
1. Cinshi sana sana cilenga ukuti tuletasha Yehova?
1 Pa ‘fya bupe fisuma,’ ifingi ifyo Yehova atupeela, icacindamisha, cilubula ico atupeele ukupitila mu Mwana wakwe uo atemwa nga nshi. (Yako. 1:17) Icilubula calileta amapaalo ayengi, ukubikapo fye no kwelelwa kwa membu shesu. (Efes. 1:7) Pali ifi Yehova acita, tulamutasha nga nshi lyonse. Mu nshita ya Cibukisho, tulakwata inshita ya kutontonkanya sana pali ubu bupe bwacindamana nga nshi.
2. Kuti twacita shani nga tulefwaya aba mu ng’anda yesu, e lyo na ifwe fwe bene ukulatasha pa cilubula?
2 Bafweni Ukulatasha Pa Cilubula: Kanshi pa kuti mwafwe aba mu ng’anda yenu ukulatasha pa cilubula, kuti mwabelenga ilyashi lilanda pa cilubula ilyo mwakulakwata Amapepo ya Lupwa mu milungu iitangilile Icibukisho icikabako pa 30 March. Kabili belengeni pamo na ba pa ng’anda amalembo ayalanda pa fyacitikiile Yesu ilyo ashilafwa. Pa lwenu tontonkanyeni sana pa fyo mwanonkelamo mu cilubula ne fyo mumona Yehova, ifyo muimona mwe bene, ifyo mumona bambi, ne fyo ubumi bwenu bukaba ku ntanshi. Kuti cawama nga ca kuti mwapituluka na mu nyimbo shipya shibili isho tukalabomfya pa Cibukisho, e kutila ulwimbo namba 8 na 109.—Amalu. 77:12.
3. Kuti twalanga shani ukuti tulatasha Lesa pa kutulubula?
3 Langeni Ukuti Mulatasha: Ukutasha Lesa pa kutulubula kulenga ukuti tule-ebako bambi pali Yehova na pa kutemwa ukukalamba uko alanga pa kutuma Umwana wakwe. (Amalu. 145:2-7) Mu March, April, na May, indupwa shimo balalanga ukuti balatasha pa cilubula ukupitila mu kupekanya ukuti umo nelyo abengi bakabombeko bupainiya bwa kwafwilisha. Nga ca kutila imwe te kuti mubombeko bupainiya, bushe kuti mwabomfya bwino inshita pa kulundako ama-awala mubomba mu mulimo wa kushimikila? (Efes. 5:16) Ukutasha kukatucincisha ukwafwa bambi ukuti bakasangweko ku Cibukisho. (Ukus. 22:17) Tendekeni ukulemba umutande wa bantu mulefwaya ukwita, ukutampila pali balya mupempula nga mwabashimikila, abo musambilisha Baibolo, balupwa, abo mubomba nabo, na bena mupalamano, lyena mu kabombeshe muli kampeni yaibela iya kwita abantu ku Cibukisho.
4. Kuti twabomfya shani inshita ya Cibukisho mano mano?
4 Inshita ya Cibukisho ilenga twakwata ishuko lya kulanga Yehova ifyo tutasha ubupe apeela abantunse. Kanshi natulebomfya bwino iyi nshita ukupitila mu kutontonkanya sana pa cilubula e lyo no kulacita ifilanga ukuti tulatasha pa cilubula na pa “bukankaala bushingapimwa ubwa kwa Kristu.”—Efes. 3:8.