Landeni Ifyebo Ifingalenga Abantu Ukufwaya Ukukutika
1. Finshi twingasambilila ku fyo Abena Kristu ba kubalilapo baleshimikila mu nshila shalekanalekana?
1 Abena Kristu ba kubalilapo baleshimikila imbila nsuma ku bantu abafumine ku fifulo ifyalekanalekana ne mipepele. (Kol. 1:23) Nangu ca kuti ico baleshimikilapo cali Bufumu bwa kwa Lesa, pa kushimikila abantu balebomfya inshila shalekanalekana. Ku ca kumwenako, ilyo Petro alelanda ku baYuda abaishibe Amalembo, ayambwile amashiwi ya kwa kasesema Yoele. (Imil. 2:14-17) Nomba nga twabelenga ilembo lya Imilimo 17:22-31 kuti twamona ifyo Paulo ena apelulushenye na baGriki. Pali lelo, abantu mu ncende shimo balicindika Amalembo, kabili kuti twabomfya Baibolo pa kushimikila ku ng’anda ne ng’anda ukwabula no bwafya. Lelo, tulingile ukucenjela sana ilyo tulelanda na bashatemwa ifya mu Baibolo nelyo ifya mapepo, nangu abashili Bena Kristu.
2. Kuti twabomfya shani impapulo tushalika pa kuti twafwe abacetekela na bashacetekela muli Baibolo?
2 Ishibeni Ifya Kubomfya Bwino Impapulo sha Kushalika: Muli uno mwaka wa mulimo, twakula-alula impapulo sha kushalika pa numa ya myeshi ibili, kabili ifyo tukalashalika sana ni magazini, amatrakiti e lyo na mabroshuwa. Nga ca kuti abantu mu cifulo tushimikilamo tabatemwa sana ukumfwa ifya mu Baibolo, kuti twalanda nabo fimo ifili mu lupapulo tuleshalika ifyo bengatemwa. Nangu ca kuti pa muku wa kubalilapo twalanda no muntu tatubelengele nelyo tatulandilepo fimo ifya mu Baibolo, uo twalanda nankwe nga alefwaya ukumfwilapo na fimbi, kuti twabwelelako pa kuti tukamwafwe ukukwata icitetekelo muli Kabumba ne Cebo cakwe. Lelo nga tuleshimikila abantu abaishibako fimo pali Baibolo, kuti twabomfya Baibolo pa kulanda nabo no kubapeela impapulo. Na kuba, kuti twashalika icitabo ca Ico Baibolo Isambilisha nelyo broshuwa itila Mulekutika Kuli Lesa na Mulekutika Kuli Lesa pa Kuti Mukekale Umuyayaya nangu ca kuti te fyo tuleshalika uyo mweshi. Icacindama sana kulanda ifyebo ifingalenga abantu ukufwaya ukukutika.
3. Bushe imitima ya bantu tushimikila yaba shani ngo mushili?
3 Pekanyeni Umushili: Umutima wa muntu kuti twaupalanya ku mushili. (Marko 4:26) Filya fine tupekanya umushili ilyo tushilatanda imbuto, e fyo tulingile ukupekanya ne mitima ya bantu pa kuti cine cilimbe imishila mu mitima yabo. Abena Kristu ba kubalilapo balishibe ifya kushimikila bwino ku bantu ba mitima iyalekanalekana, kabili ici calengele basekelele nga nshi. (Imil. 13:48, 52) Na ifwe bene, tukaba ne nsansa nga twaishiba ifya kushimikila bwino.