“Mulebila Sana Imbila Nsuma”
1. Finshi twingasambililako kuli Paulo pa lwa kushimikila?
1 Umutumwa Paulo atile: “Bombesha umulimo obe onse.” (2 Tim. 4:5) Pa kweba Timote aya mashiwi, Paulo tapitile na mu mbali. Na kuba, pa kati ka mwaka wa 47 na 56 C.E., Paulo aendele inyendo shitatu isha bumishonari. Ibuuku lya Imilimo libili libili lilanda pali Paulo ukuti ‘alibilile sana’ imbila nsuma. (Imil. 23:11; 28:23) Kuti twapashanya shani Paulo?
2. Kuti twacita shani pa kuti tulebila sana imbila nsuma ku ng’anda ne ng’anda?
2 Ku Ng’anda ne Ng’anda: Pa kuti tulande na bene ba ng’anda abashabala abomfwapo imbila nsuma, nalimo kuti cawama ukubatandalila pa nshita twingabasanga pa ng’anda. Abene ba ng’anda abaume nalimo kuti baba pa ng’anda mu nshita ya cungulo nelyo pa mpela ya mulungu. Pa ng’anda ili yonse, tufwile ukushininkisha ukuti twalandako no muntu, e lyo apo tushisangile abantu, tufwile ukulabwelelapo libili libili pa kuti tukasuke tukabasange. Kuti mwacita shani nga mwafilwa ukusanga abantu pa ng’anda te mulandu no kubwelelapo libili libili? Nalimo kuti cawama ukubalembela kalata nelyo ukubatumina foni.
3. Kuti mwacita shani pa kuti muleshimikila pa cintubwingi na lintu mulelanda fye ilyashi na bantu bambi?
3 Ukushimikila Ilyo Mulelanda fye Ilyashi e lyo na pa Cintubwingi: Ababomfi ba kwa Yehova muno nshiku balabila “amano ya cine” ku balefwaya ukumfwa. Inshita shimo bashimikila “mu musebo” na “mu mansa.” (Amapi. 1:20, 21) Ilyo tulebomba imilimo cila bushiku, bushe tulabika amano ku kushimikila? Bushe ifyo tucita filalanga ukuti ‘twalibika amano yonse ku kushimikila icebo ca kwa Lesa’? (Imil. 18:5) Nga twalibika amano ku kushimikila ninshi tulabomba bwino umulimo twapeelwa uwa ‘kushimikila ubunte.’ (Imil. 10:42; 17:17; 20:20, 21, 24)
4. Bushe ipepo no kutontonkanya sana pa Cebo ca kwa Lesa fikatwafwa shani ukulabila sana imbila nsuma?
4 Inshita shimo kuti kwaba fimo ifingalenga twafwilwa ukushimikila nelyo kuti twafilwa pa mulandu wa nsoni. Yehova alishiba ifyo twingacita ne fyo tushingacita. (Amalu. 103:14) Kanshi nga tuletiina ukushimikila, tulingile ukupepa kuli Yehova pa kuti tube abashipa. (Imil. 4:29, 31) Na kabili ilyo tuleisambilisha Baibolo no kutontonkanyapo sana, tufwile no kulatontonkanya pa fyo imbila nsuma yacindama. (Fil. 3:8) Ici cikalenga tukabe abacincila mu kushimikila!
5. Kuti twacita shani pa kuti tufikilisheko ifyo Yoele aseseme?
5 Yoele aseseme ukuti, ilyo ubushiku bwa kwa Yehova ubukalamba kabili ubwa kutiinya bushilaisa, abantu ba kwa Lesa ‘tabakeminine’ nelyo ukuleka icili conse ukubalesha ukushimikila. (Yoele 2:2, 7-9) Kanshi natulebombesha muli uyu mulimo wa kushimikila ushakatale aubombwa na kabili!