Ifyo Mwingalanda

Pa Kutendeka Amasambililo ya Baibolo pa Cibelushi ca Kubalilapo mu September

“Mwapoleni mukwai. Twamutandalila pa kuti tulanshanyeko pa ko twingasanga ifyebo ifingafwa abaupana ukulaikala bwino mu cupo. Batini kuti mwatila cinshi cilenga sana ukuti mu cupo mwiba insansa?” [Lekeni basuke.] Balangeni ifyebo fili ku nkupo ya ku numa iya Ulupungu lwa kwa Kalinda ulwa September 1, kabili lanshanyeni ifyebo fili pa cipusho ca kubalilapo no kubabelengelako ilembo limo. Bapeeleni magazini kabili panganeni ilyo mukabwelelako pa kuti mukayelanshanya icipusho cikonkelepo.

Ulupungu lwa kwa Kalinda September 1

“Natumona ukuti abengi kuno mwesu balatontonkanya sana pa co Lesa asuminishisha abantu ukulacula fino. Bushe mwalitala amutontonkanyapo pa calenga Lesa ukuleka abantu balecula? [Lekeni basuke.] Icawamako fye ca kuti Baibolo yalilaya ukuti kukaba inshita ilyo takwakabe ukuloosha nelyo ukukalipwa. [Belengeni Ukusokolola 21:4.] Iyi magazini ilelanda pa fintu fisano ifyalenga ukuti tulecula ne fyo Baibolo ilanda pa fyo Lesa akafumyapo ukucula.”

Loleni! July–August

“Tuletandalila abena mupalamano pa kuti tulanshanye nabo pa bwafya ubulesakamika sana abantu, buntalamisoka. Abantu bamo batontonkanya ukuti ukufusha bakapokola kuti kwapwisha ubu ubwafya. Inga imwe mutontonkanyapo shani? [Lekeni basuke.] Bushe mwalishiba ukuti Baibolo yalilaya ukuti buntalamisoka bukapwa? [Belengeni Amalumbo 37:10, 11.] Iyi magazini nailondolola bwino ukuti ifyo Baibolo yalaya pali ili lembo fikacitika kabili nailanda na pa fintu fimo ifyo twingacita pa kuti tuicingilile kuli bantalamisoka.”