Isukulu lya Butumikishi Ilya Bulesa mu 2015 Likatwafwa Ukwishibilako Ifya Kusambilisha

¹ Davidi uwaimbile amalumbo atile: “Lekeni amashiwi ya mu kanwa kandi ne fyo umutima wandi utontonkanyapo fimusekeshe, mwe Yehova, Icilibwe candi icasansuka kabili Umulubushi wandi.” (Amalu. 19:14) Na ifwe tulafwaya amashiwi yesu yalesekesha Yehova, pantu twalicindamika sana ishuko twakwata ilya kulanda icine mu cilonganino na mu butumikishi. Isukulu lya Butumikishi Ilya Bulesa e nshila imo iyo Yehova abomfya pa kutusambilisha ifya kushimikila bwino. Cila mulungu mu filonganino ukucila pali 111,000 mwi sonde lyonse tulakwata ili sukulu. Ili sukulu lyalyafwa bamunyinefwe na bankashi mwi sonde lyonse abakwata inkulilo ishalekanalekana ukuba bakabila ba mbila nsuma abafikapo, abaishiba ifya kunashanasha ilyo balesambilisha, abacenjela, kabili abalanda ukwabula umwenso.—Imil. 19:8; Kol. 4:6.

² Umulefuma amalyashi ya mwi sukulu mu 2015 ni mu katabo katila, Ifyaba mu Cebo ca kwa Lesa e lyo na mu Ulupungu lwa kwa Kalinda. E lyo kabili, inshita ya kulandamo ifishinka fikalamba na Ilyashi Na. 1 nayalulwa. Amaparagrafu yakonkapo yalalanda pa fyalwike e lyo ne fya kukonka pa kulanda amalyashi mwi sukulu.

³ Ifishinka Fikalamba: Bamunyina abakalapeelwa ili lyashi bakalalilanda mu mamineti yabili, bakalalanda pa cinshinka cimo ico batemenwemo mu kubelenga kwa Baibolo ukwa cila mulungu e lyo ne fyo ifyo ifyebo fingabomfiwa. Nga balepekanya bwino bakulalanda ifyebo ifingafwa icilonganino ukwabula ukupula mu nshita. Kanshi, icilonganino cikalandapo mu mamineti 6 kabili cila muntu alingilile ukwasukapo mu masekondi 30 nelyo ukucepako. Balingile ukulanda pa fyo basambilileko mu kubelenga Baibolo ukwa cila mulungu. Tulingile kupekanya bwino no kuilama pa kuti tulepeela amasuko ayasuma mu masekondi 30. Nga tulecita ifi ninshi tuleisambilisha. Kabili nga tatulecila pa masekondi 30, bambi nabo bakulakwata inshita ya kulandapo ifyo babelengele.

⁴ Ilyashi Na. 1: Baibolo ikalabelengwa mu mamineti yatatu nelyo ukucepako kabili ne fyebo fya kubelenga na fyo nabaficefyako. Abakalapelwa ili lyashi balingile ukupitulukamo sana, ukubelenga mu kupongomoka kabili no kubika sana amano ku fya kushimbula amashiwi no kuyabelenga bwino pa kuti icishinka cumfwike. Abantu ba kwa Yehova bonse fye balesha na maka ukubelenga bwino, apo ukubelenga kwalicindama mu kupepa kwesu. Tulomfwa bwino ukumona ifyo abana besu babelenga bwino! Tuletasha mwe bafyashi pa fyo mwafwa abana benu ukuba bakabelenga basuma.

⁵ Ilyashi Na. 2: Ili lyashi likalalandwa mu mamineti 5 kabili bankashi e bakulalanda ili lyashi. Bafwile ukulanda pa mutwe bapeelwe. Nga ca kuti ili lyashi lifumine mu katabo akatila, Ifyaba mu Cebo ca kwa Lesa, bafwile ukulanda ifyebo ukulingana ne fyo mushimikila mu cifulo cenu. Nga ca kuti ilyashi ililelanda pa muntu wa mu Baibolo lifumine mu Ulupungu lwa kwa Kalinda, pa kupekanya, umusambi afwile ukubelenga ifyebo ifilelanda pali uyo muntu wa mu Baibolo, no kusala amalembo ayalingile, kabili alingile ukulanda pa fyo twingasambililako kuli uyo muntu wa mu Baibolo. Kuti afwailapo na malembo na yambi ayalingene no mutwe apeelwe. Kangalila we sukulu e ukalasala kafwa.

⁶ Ilyashi Na. 3: Ili lyashi likalalandwa mu mamineti 5 kabili likalapeelwa kuli nkashi nelyo munyinefwe. Nga ni nkashi bapeela, ninshi alingile ukulanda nga filya engalanda Ilyashi Na. 2. Nga ni munyinefwe apeelwe ukulanda ilyashi ukufuma mu Ulupungu lwa kwa Kalinda, ninshi afwile ukulanda ilyashi kwi bumba. Umusambi alingile ukulanda ilyashi ukulingana no mutwe apeelwe, no kusala amalembo ayalinga, kabili alingile no kulanda ifyo twingasambililako kuli uyo muntu wa mu Baibolo.

⁷ Ifilundilweko ku Lyashi Na. 3 Kuli Bamunyinefwe: Nga ca kuti ili lyashi lifumine mu katabo ka Ifyaba mu Cebo ca kwa Lesa, ninshi lifwile ukulandwa kwati muli pa mapepo ya lupwa nelyo kwati muleshimikila. Kangalila we sukulu e ukalasala kafwa ne mitantikile. Kafwa afwile ukuba ni lupwa wa upeelwe ilyashi nelyo munyinefwe mu cilonganino. Kuti mwabomfyako na malembo yambi ayalingene no mutwe we lyashi. Limo limo baeluda bakulabapeelako ili lyashi. Baeluda kuti baisalila kafwa ne mitantikile. Ukwabula no kutwishika, aba mu cilonganino bakulanonkelamo sana nga bamona ifyo baeluda balepeela ilyashi no lupwa lwabo nelyo na munyinefwe.

⁸ Ukufunda: Kangalila we sukulu akulatasha no kufunda umusambi umo na umo mu mamineti yabili, ukubomfya icitabo ca Nonkelenimo mu Masambililo ya Isukulu lya Butumikishi Ilya Bulesa. Kangalila we sukulu nga aita umusambi pa cisebele, takulalandila limo apo umusambi alebombela. Pa numa ye lyashi limo na limo, kangalila we sukulu afwile ukutasha umusambi, no kulanda apo umusambi acilabombela, kabili afwile ukulanda mu kulungatika umulandu atashisha umusambi, nelyo ukulanda mu nshila ya cikuuku apo umusambi afwile ukuwamyako mwi sambililo apeelwe.

⁹ Formu ya kufundilwapo iya musambi yaba pa mabula 79 ukufika ku 81 mu citabo ca Nonkelenimo. Umusambi nga alanda ilyashi, kangalila we sukulu akaconga mu citabo ca musambi ukulingana ne fyo umusambi acicita kabili akamwipusha nga ca kuti alicita ifyo alingile ukubombelapo pe sambililo balemucongelapo. Pa numa ya kulongana nelyo pa nshita fye imbi, kuti amutasha na kabili no kumweba umo afwile ukuwamyako. Umusambi umo na umo afwile ukumona isukulu ukutila kuti lyamwafwa ukulunduluka mu fya kwa Lesa.—1 Tim. 4:15.

¹⁰ Nga ca kuti umusambi alya inshita, kangalila we sukulu nelyo kafwa wakwe mu mucenjelo afwile ukupeela icishibilo pa kumulanga ukuti inshita yapwa, pamo nga ukulisha belu nelyo iminwe. Umusambi nga aumfwa ifi afwile fye ukupwisha sentensi no kufuma pa cisebele.—Moneni icitabo ca Nonkelenimo, ibu. 282, para. 4.

¹¹ Bonse abafikapo kuti balembeshako mwi Sukulu lya Butumikishi Ilya Bulesa. (Moneni icitabo ca Nonkelenimo, ibu. 282, para. 6.) Ifyo tusambilila muli ili sukulu fyalyafwa abantu ba kwa Yehova ukubila no kusambilisha imbila nsuma ya Bufumu ukwabula umwenso, mu mucinshi, e lyo na mu kutemwa. Ukwabula no kutwishika Yehova alasekelela ilyo bonse abanonkelamo mwi sukulu lya bulesa balemulumbanya!—Amalu. 148:12, 13; Esa. 50:4.