Cinshi Yehova Atupeelele Icilubula?

1-2. Ni kuli finshi tukabila ukuti batulubule, kabili mulandu nshi? (Abena Roma 7:​22-24) (Moneni ne cikope.)

ELENGANYENI ukuti icikuulwa cabongoloka kabili mu kati ka cikuulwa muli umuntu. Kwena tafwile lelo te kuti afume pantu ifintu nafimubongolokela. Ico engacita fye kupunda mutuule pa kuti abantu baye bamufumye.

² Na ifwe caba kwati icikuulwa calitubongolokela. Cinshi twalandila ifi? Ilyo Adamu apondokele Kabumba wakwe, aishileba umubembu. Apo tuli bana bakwe, bonse twalipyana ulubembu. Ici calenga abantu bonse pano isonde babe ababembu kabili te kuti tuilubule kuli ulu lubembu nga filya fine umuntu uo icikuulwa cibongolokele ashingaifumya mu cikuulwa. Ilyo umutumwa Paulo alembeele abena Roma kalata, alilondolwele ifyo ulubembu lwalenga twaba. (Belengeni Abena Roma 7:​22-24.) Paulo aipwishe ukuti, “nani akampokololako kuli uno mubili uulentwala ku mfwa?” Paulo aleumfwa ukuti ulubembu lwalimwikete kabili lwali no kulenga afwa. (Rom. 6:23) Ifi fine e fyo caba na kuli ifwe, tulakabila uwa kutulubula ku lubembu ne mfwa.

3. Bushe ifintu fituwamina shani pa mulandu wa cilubula?

³ Paulo talandile fye pa bwafya twakwata pa mulandu no lubembu. Ilyo aipwishe icipusho ca kuti “nani akampokololako kuli uno mubili uulentwala ku mfwa?” alyaswike no kwasuka ici cipusho. Atile: “Ndetootela Lesa pantu akampususha muli Yesu Kristu Shikulwifwe!” (Rom. 7:25) Ico Paulo alelandapo cilubula ca kwa Yesu.a Pa mulandu ne cilubula (1) Yehova kuti atwelela imembu, (2) kuti twaba ne subilo lya kuti ku ntanshi tukaba abapwililika, na (3) kuti twaba ifibusa sana na Kabumba wesu. Muli cino cipande, twalasambilila pali ifi fishinka fitatu, calalenga tutemenweko Yehova, “Lesa uupeela isubilo.” (Rom. 15:13) Na kabili twakulatasha sana Yesu pantu “twalilubuka pa mulandu . . . wa cilubula” cakwe.—Kol. 1:14.

ICILUBULA CILALENGA YEHOVA ALETWELELA IMEMBU

4-5. Cinshi twingalandila ukuti bonse fye tulakabila icilubula? (Lukala Milandu 7:20)

⁴ Pa mulandu ne cilubula, Yehova alatwelela imembu. Bonse fye tulabembuka mu fyo tulanda na mu fyo tucita. (Belengeni Lukala Milandu 7:20.) Imembu shimo isho fwe bantu tucita, shilaba ishikalamba. Ku ca kumwenako, Amafunde ya kwa Mose yalandile ukuti umwina Israele nga acita ubucende nelyo nga aipaya umuntu, balingile ukumwipaya. (Lebi 20:10; Impe. 35:​30, 31) Kwena imembu ishingi tashiba ishikalamba nge shi twalandapo, nomba nasho shine ni membu. Ku ca kumwenako, Davidi uwaimbile amalumbo alandile ati: “Nkalinda intampulo shandi pa kuti nikabembuka ku lulimi lwandi.” (Amalu. 39:1) Kanshi inshita shimo kuti twabembuka na mu fyo twalanda.—Yako. 3:2.

⁵ Bushe mwalitala amwebapo bamo amashiwi aya kuti pa numa mwalalanguluka no kulanguluka ukuti kanshi nga tamwayalandile? Bushe mwalicitilepo fimo ifya kuti mulalanguluka no kulanguluka ukuti kanshi nga tamwaficitile? Ukwabula no kutwishika, bonse fye twalilandapo amashiwi ayo tushalingile ukulanda nelyo twalicitapo ifyo tushalingile ukucita. Baibo ilanda ukuti: “Nga twalanda atuti, ‘Tatuli babembu,’ ninshi tuleibepa fye, kabili ninshi ne cine tamwaba muli ifwe.”—1 Yoh. 1:8.

6-7. Cinshi cilenga Yehova aletwelela imembu? (Moneni ne cikope.)

⁶ Icilubula cilalenga Yehova aletwelela imembu. (Efes. 1:7) Lelo ici tacilepilibula ukuti Yehova alasuulako fye nga tulebembuka. Tatemwa nga tulebembuka. (Esa. 59:2) Pa mulandu wa kuti Yehova aliba no mulinganya, alicitilepo fimo ifilenga aletwelela imembu.

⁷ Amafunde ya kwa Mose yalandile ukuti abena Israele balingile ukulatuula amalambo ya nama pa kuti imembu shabo shile-elelwa. (Lebi 4:​27-31; 17:11) Yalya amalambo baletuula yaleimininako ilambo ilikalamba ilyo Yesu ali no kutuula, e lyo ne fintu ifisuma ifyo Yehova ali no kucitila abantu pa mulandu we lambo lya kwa Yesu. Ilambo lya kwa Yesu lyali no kulenga Yehova aletwelela imembu. Ifyo Paulo alembeele Abena Kristu mu Korinti filanga ukuti alishibe ifyo ilambo lya kwa Yesu lyacindama. Ilyo Paulo apwishishe ukulanda pa fyabipa ifyo balecita kale, abebele ati: “Lelo nomba mwalisambwa, mwalisangululwa kabili mwalilungamikilwa mwi shina lya kwa Shikulwifwe Yesu Kristu na mu mupashi wa kwa Lesa wesu.”—1 Kor. 6:​9-11.

8. Finshi mulingile ukutontonkanyapo ilyo mulepekanya ukuti mukasangwe ku Cibukisho uno mwaka?

⁸ Ilyo mulepekanya ukuti mukasangwe ku Cibukisho ca mfwa ya kwa Yesu uno mwaka, muletontonkanya pa fyo ifintu fyamuwamina pa mulandu wa kuti Yehova alimwelela imembu. Ku ca kumwenako, pa mulandu wa kuti Yesu alitufwilile, tamufwile ukulaumfwa ububi pa membu isho mwacitile kale isha kuti mwalilapila no kulapila. Kuti mwacita shani nga ca kuti calimukosela ukusumina ukuti Yehova alimubelela uluse? Nalimo mulatontonkanya ukuti, ‘Nalishiba ukuti Yehova kuti anjelela lelo nshasumina ukuti alimbelela uluse.’ Nga ca kuti ifi e fyo mumfwa, muleibukisha ukuti ni Yehova fye e utwelela imembu kabili alipeela Umwana wakwe amaka ya kupingula abantu. Yehova tamupeela insambu sha kulanda ukuti uyu alingile ukumwelela, e lyo uyu talingile ukumwelela, kabili tapeela umuntu nangu umo ishi insambu. Baibo itila: “Nga tule-enda mu lubuuto nga filya [Yehova] na o aba mu lubuuto, . . . umulopa wa kwa Yesu Umwana wakwe ulatusangulula ku membu shonse.” (1 Yoh. 1:​6, 7) Kuti twacetekela ukuti ifi fya cine nga filya fine twacetekela fimbi ifyo Baibo isambilisha. Icilubula calenga Yehova aletubelela uluse kabili Icebo cakwe cilanda aciti ‘ali-iteyanya ukwelela.’—Amalu. 86:5.

ICILUBULA CILALENGA TWABA NE SUBILO LYA KUTI KU NTANSHI TUKABA ABAPWILILIKA

9. Bushe ishiwi lya kuti ulubembu lyalola mwi? (Amalumbo 51:5 na futunoti)

⁹ Mu Baibo, ishiwi lya kuti “ulubembu” lipilibula ukuti ifyabipa ifyo tucita e lyo no kukanapwililika uko tufyalwa nako. (Belengeni Amalumbo 51:5 na futunoti.) Ulu ulubembu twapyana lulalenga inshita shimo tuletontonkanya pa fyabipa kabili tulecita ifyabipa. Kabili lulalenga tulelwala, tulekota kabili tulefwa. Ici e calenga ukuti no tunya utwa kuti tatwacitapo ulubembu nangu lumo tulelwala kabili tulefwa. Kabili e cilenga no kuti na bantu abacita ifisuma e lyo na bacita ifyabipa balecula kabili balefwa. Umuntu onse uwatuntuka kuli Adamu alipyana ulubembu.

10. Bushe Adamu na Efa baumfwile shani ilyo babembwike?

¹⁰ Tontonkanyeni pa fyo Adamu na Efa baumfwile ilyo babembwike. Ulubembu lwalengele baumfwa ububi. Ilyo Adamu na Efa babembwike fye, kampingu yabo yatendeke ukubacusha pantu tabakonkele ifunde ilyo Lesa abapeele. (Rom. 2:15) Balilwike ukuti ifintu fyalyalwike, baishileishiba ukuti bali ubwamba. E ico balifweleko fimo mu misana kabili balifiseme pa kuti Kabumba wabo ebamona. (Ukute. 3:​7, 8) Ukutula ilya nshita, Adamu na Efa baleumfwa ububi, balesakamana, baleumfwa ukuti baliseebene kabili balitwalilile ukumfwa ifi fine mpaka no bushiku bafwile.—Ukute. 3:​16-19.

11. Bushe ulubembu twapyana lulenga tuleumfwa shani?

¹¹ Nga filya fine cali kuli Adamu na Efa, na ifwe bene apo tatwapwililika inshita shimo tulomfwa ububi, tulasakamikwa kabili tulomfwa ukuti natuseebana. Pa mulandu wa kuti twalipyana ulubembu, tulakalipwa kabili tulomfwa ububi. Nangu twingesha na maka shani ukucitapo fimo pa kuti tupwishe amafya, te kuti tupwishe amafya yonse. Mulandu nshi? Baibo ilondolola ukuti pa mulandu wa kuti Adamu na Efa balibembwike, abantu bakalakwata amafya. (Rom. 8:20) Ifi fine e fyo caba, fwe bantu bonse fye tulakwata amafya. Ku ca kumwenako, abantu abengi balesha na maka pa kuti balesunga bwino isonde, bapwishe bumpulamafunde, bapwishe ubupiina e lyo ne nkondo. Nangu ca kuti balesha sana ukupwisha aya mafya, balifilwa ukuyapwisha. Nomba pa mulandu wa cilubula, twalikwata isubilo. Lisubilo nshi twakwata?

12. Lisubilo nshi twakwata pa mulandu wa cilubula?

¹² Icilubula cilenga twakwata isubilo lya kuti “ifibumbwa na fyo fikalubuka ku busha bwa kubola.” (Rom. 8:21) Aya amashiwi yalepilibula ukuti ilyo tukaba abapwililika mu Paradaise, tatwakalelwala kabili tatwakaleba no bulanda. Na kabili tatwakaleumfwa ububi, tatwakalesakamikwa kabili tatwakaleumfwa ukuti natuseebana. Kabili apo Yesu “Kateka wa Mutende” uwatufwilile e ukalateka, akala-afwa abantu pa kuti bakalesunga bwino isonde kabili bakaleikala umutende.—Esa. 9:​6, 7.

13. Finshi fimbi mufwile ukutontonkanyapo ilyo muleipekanya ukuti mukasangwe ku Cibukisho uno mwaka?

¹³ Tontonkanyeni pa fyo mukalaumfwa ilyo mukaba abapwililika. Cila bushiku nga mwabuuka mukalaumfwa bwino. Tamwakalesakamikwa ukuti imwe nangu balupwa lwenu nelyo ifibusa tamwakwate ifya kulya, kuti mwalwala nelyo kuti mwafwa. Na pali ino ine nshita te kuti mulesakamikwa sana nga ca kuti ‘mwaikatisha kwi subilo ilyaba nge nanga ya mweo, ilya cine kabili ilyalikosa.’ (Heb. 6:​18, 19) Nga filya fine inanga ilenga ubwato bwilasunkana, e fyo ne subilo lingalenga icitetekelo caba icakosa. Kabili kuti lyalenga mwalashipikisha amafya ayo mwingakwata. Ukwabula no kutwishika, kuti mwacetekela ukuti Yehova ‘akalambula abafwaisha ukumubombela.’ (Heb. 11:6) Icilubula calilenga mulesansamuka pali ino nshita, kabili calilenga mube ne subilo lya kuti ku ntanshi ifintu fikawama.

ICILUBULA CALILENGA TWABA IFIBUSA NA YEHOVA NA KABILI

14. Bushe ulubembu lwalengele bucibusa bwesu na Kabumba wesu bwaba shani, kabili mulandu nshi?

¹⁴ Ilyo Adamu na Efa babembwike, abantunse tabali no kuba ifibusa na Lesa. Baibo ilanda no kuti abantunse balitaluka kuli Kabumba. (Rom. 8:​7, 8; Kol. 1:21) Mulandu nshi? Pantu Yehova alipwililika kabili te kuti atekeleshe abacita imembu. Baibo ilanda pali Yehova ukuti: “Mwalisangulukisha ica kuti amenso yenu te kuti yaloleshe pa fyabipa, kabili te kuti mutekeleshe abacita ifyabipa.” (Haba. 1:13) Ukutula fye apo abantu babelele ababembu, cali kwati pali bena na Yehova paba umupaka. Takwali nangu umo uwali no kuba cibusa wa kwa Yehova na kabili kano uyu mupaka baufumyapo. Icilubula e cafumyapo uyu mupaka, kabili kuti twaba ifibusa na Yehova na kabili.

15. Bushe icilubula calenga shani abantu baba ifibusa na Lesa na kabili?

¹⁵ Baibo ilanda ukuti Yesu “e lambo lya pa membu shesu ililenga tulebwelela kuli Lesa.” (1 Yoh. 2:2) Ishiwi lya ciGriki ilyo bapilibula ukuti “ilambo lya pa membu shesu ililenga tulebwelela kuli Lesa,” kuti lyapilibula ukuti “inshila ya kunashishamo Lesa umutima.” Bushe icilubula canasha shani umutima wa kwa Yehova? Tatufwile ukulatontonkanya ukuti imfwa ya Mwana wakwe yalilengele Yehova asansamuka. Lelo icilubula calinashishe umutima wa kwa Yehova pantu calilengele abantunse baba ifibusa fyakwe na kabili, nga filya fine alefwaya. (Rom. 3:​23-26) Yehova alemona na bantu abalemupepa ninshi na Kristu talafwa ukuti bali abalungama. (Ukute. 15:​1, 6) Cinshi calengele alebamona ifi? Ni co Yehova alicetekele sana ukuti Umwana wakwe Yesu, ali no kupeela ubumi bwakwe ukuba icilubula. (Esa. 46:10) Icilubula calilenga abantu baba ifibusa na Lesa na kabili.

16. Finshi fimbi ifyo mufwile ukutontonkanyapo ilyo mulepekanya ukuti mukasangwe ku Cibukisho uno mwaka? (Moneni ne cikope.)

¹⁶ Tontonkanyeni pa fyo ifintu fyamuwamina pa mulandu wa kuti muli cibusa wa kwa Yehova. Ku ca kumwenako, kuti mwaita Yehova ukuti ‘Shinwe,’ nga fintu Yesu atwebele. (Mat. 6:9) Inshita shimo, kuti mwaita Yehova no kuti “Cibusa” wenu. Nga twaita Yehova ukuti “Shifwe” nelyo “Cibusa” wesu, tufwile ukuba sana no mucinshi kabili tufwile ukuba abaicefya. Cinshi twalandila ifi? Ni co tuli babembu kabili te ifwe twalenga fwe bene ukuti tube ifibusa na Yehova. Cilubula fye e calenga ukuti Yehova abe cibusa wesu. Ukupitila muli Yesu, Yehova alilengele “ifintu fyonse . . . fibwelele kuli ena no kuba no mutende na ena ukupitila mu mulopa uo Yesu asuumishe pa cimuti ca kucushiwilwapo.” (Kol. 1:​19, 20) E calenga tube ifibusa na Yehova nangu ca kuti tatwapwililika.

ICILUBULA CILANGILILA UKUTI YEHOVA ALIKWATISHA ULUSE

17. Bushe icilubula cilanga shani ukuti Yehova alikwatisha uluse? (Abena Efese 2:​4, 5)

¹⁷ Icilubula cilangilila ukuti Yehova “alikwatisha uluse.” “Alengele twaba aba mweo . . . na lintu fye twali abafwa pa mulandu wa filubo fyesu.” (Belengeni Abena Efese 2:​4, 5.) Abantu ababa ne ‘mitima iisuma iifwaya umweo wa muyayaya,’ balafwaya uwa kubapususha pantu balishiba ukuti ulubembu ulo twapyana lwalibekata. (Imil. 13:48) Yehova alafwa aba bantu pantu alalenga baumfwa imbila nsuma ya Bufumu pa kuti bamwishibe, beshibe no Mwana wakwe Yesu. (Yoh. 17:3) Nga ca kuti Satana aletontonkanya ukuti filya Adamu na Efa babembwike fyali no kulenga Lesa afilwa ukufikilisha ifyo alefwaya, aleibepa fye!

18. Ilyo tuletontonkanya pa cilubula, finshi tulingile ukulaibukisha?

¹⁸ Ilyo tuletontonkanya pa fyo tunonkelamo mu cilubula, tufwile no kulatontonkanya pa mulandu uukalamba uo Yehova apeleele icilubula. Tatufwile ukulatontonkanya fye ukuti ico Yehova apeleele icilubula ni pa mulandu wesu. Lelo tufwile no kulaibukisha ukuti filya Yehova apeele icilubula, e nshila iyo asukilamo Satana pa bufi ubo abepele mwi bala lya Edeni. (Ukute. 3:​1-5, 15) Ukupitila mu cilubula, Yehova alalenga ishina lyakwe lyaba ilya mushilo, kabili alalenga caishibikwa ukuti ifyo Satana alandile pali ena fya bufi. Na kabili alitulubula ku lubembu ne mfwa. Ifi acita filangilila fye ukuti ni Lesa uwaba no kutemwa. Kabili pa mulandu wa cikuuku cakwe icaibela, Yehova alilenga ukuti fwe bantunse ababembu na ifwe tuleshininako Satana ukuti ifyo alandile pali ena fya bufi. (Amapi. 27:11) Kuti mwalanga shani ukuti mulatasha pa cilubula? Tukasuka ici cipusho mu cipande cikonkelepo.