Finshi Mwingacita pa Kulanga Ukuti Mulatasha pa Cilubula?

1-2. Bushe ilambo lya cilubula ilya kwa Yesu lifwile ukulatucincisha ukucita cinshi, kabili mulandu nshi? (2 Abena Korinti 5:​14, 15) (Moneni ne cikope.)

NGA CA kuti icikuulwa camubongolokela e lyo umuntu umo amupususha, finshi mwingamucitila? Nangu ca kutila kuti kwaba na bambi abo uyo muntu engapususha, kuti mwamutasha sana pa fyo amupuswishe pa kuti mulange ukuti tamwakalabe ifyo amucitila.

² Nga fintu twasambilile mu cipande cafumineko, te kuti tuilubule fwe bene ku lubembu ne mfwa. Lelo ilambo lya cilubula ilya kwa Yesu lyalilenga (1) Yehova aletwelela imembu tucita, (2) twaba ne subilo lya kuti ku ntanshi tukaba abapwililika na (3) twaba ifibusa na Lesa na kabili. Ici calenga twaba ne subilo lya kuti tukekala umuyayaya mu calo cipya ica kwa Yehova. Ukwabula no kutwishika, Yesu alilangile ukuti alitemwa sana abantu ilyo atuulile ubumi bwakwe pa mulandu wesu. Kabili na lintu ashilaisa pano isonde, Yesu alitemenwe sana abantu. (Amapi. 8:​30, 31) Umutumwa Paulo alembele ati “ukutemwa kwa kwa Kristu e kulenga tuleba abacincila.” (Belengeni 2 Abena Korinti 5:​14, 15.) Aya mashiwi yapilibula ukuti tulingile ukulatasha pa fyo Yesu atutemwa, kabili tatulingile ukulaba ifyo atucitila.

3. Mulandu nshi ifyo mwingacita pa kulanga ukuti mulatasha pa cilubula fingapusanina ne fyo bambi bengacita?

³ Finshi mwingacita pa kuti mulelanga ukuti mulatasha pa cilubula? Ifyo mwingasuka ici cipusho nalimo kuti fyapusanako ne fyo umuntu umbi engasuka. Pa kulangilila ico twalandila ifi, elenganyeni ukuti abantu batatu bali mu kuya cifulo cimo cine. Nomba aba bantu tabekala mu musumba umo wine. Nangu ca kuti bonse baleya ku cifulo cimo cine, inshila balabomfya shalapusana. Ifi fine e fyo caba na kuli ifwe, ifyo mwingacita pa kulanga ukuti mulatasha pa cilubula kuti fyapusanako ne fyo bambi bengacita. Kanshi muli cino cipande, twalalanda pa mabumba ya bantu yatatu: (1) Abasambi ba Baibo, (2) Abena Kristu ababatishiwa, na (3) Abaleka ukubombela Yehova.

ABASAMBI BA BAIBO

4. Bushe Yehova omfwa shani pa bantu abasambilila Baibo?

⁴ Nga ca kuti mulasambilila Baibo tontonkanyeni pali ifi: Ifi mukutika imbila nsuma cilangililo ca kuti mwaba pa bantu abo Yehova afwaya ukuti babe ifibusa fyakwe. (Yoh. 6:44; Imil. 13:48) Baibo itila, “Yehova e ubebeta imitima ya bantu.” Ifi filepilibula ukuti Yehova alamona ifyo muibikilishako pa kuti mulesambilila pali ena, kabili alasekelela nga amona ukuti mulealuka pa kuti mulecita ifyo afwaya. (Amapi. 17:3; 27:11) Icilubula kuti calenga mwaba ifibusa na Yehova. (Rom. 5:​10, 11) Tamufwile ukulaba ici icishinka.

5. Bushe abasambi ba Baibo kuti bacita shani pa kuti balekonka ifyaba pa Abena Filipi 3:16?

⁵ Nga ca kuti mulasambilila Baibo, finshi mufwile ukucita pa kuti mulelanga ukuti mulatasha pa cilubula? Cimo ico mwingacita kukonka ifyo Paulo afundile abena Filipi. Abafundile ati: “Fyonse ifyo twalundulukamo, natutwalilile muli ifi fine.” (Fil. 3:16) Muli Bible wa Mushilo pali ici cikomo patila: “Nomba palindakai naatuleekonkafye munshila iine iitufishishe pano tufikile.” Kanshi tamufwile ukuleka icintu nangu cimo calenga mwaleka ukwenda mu nshila ya ku mweo.—Mat. 7:14; Luka 9:62.

6. Finshi abasambi ba Baibo bengacita nga ca kuti fimo bafyabakosela ukumfwa nelyo cabakosela ukuleka fimo ifyo Baibo yakaanya? (Amalango 30:​11-14) (Moneni ne cikope.)

⁶ Kuti mwacita shani nga camukosela ukusumina fimo ifyo mwasambilila mu Baibo? Mufwile ukufwailapo ifyebo, kabili mufwile ukulomba Yehova pa kuti amwafwe mufyumfwikishe. (Amalu. 86:11) Nga ca kuti na pa numa ya kucita ifi cicili cilemukosela ukusumina ifyo mwasambilila mu Baibo, kuti mwatala mwaleka ukuisambilishako pali ifyo. Lelo tamufwile ukuleka ukuisambilisha Baibo. Kuti mwacita shani nga ca kuti cilemukosela ukuleka ukucita fimo ifyo Baibo yakaanya? Muleibukisha ukuti Yehova te kuti atwebe ukucita ifyo tushingakumanisha. Kuti mwakumanisha ukucita ifyo Yehova afwaya. (Belengeni Amalango 30:​11-14.) Kabili Yehova alilaya ukuti akulamwafwa. (Esa. 41:​10, 13; 1 Kor. 10:13) Kanshi tamufwile ukunenuka. Mu cifulo ca kulatontonkanya pa fimukosele ukusumina nelyo pa fimukosele ukuleka, mufwile ukulatontonkanya sana pa fisuma ifyo Yehova amucitila ukubikako fye ne cilubula. Nga mwatwalilila ukutemwa Yehova, mukaimwena ukuti “amafunde yakwe tayakosa.”—1 Yoh. 5:3.a

7. Finshi abaice aba kuti balekulila mu lupwa lwa ba Nte balingile ukutontonkanyapo?

⁷ Inga imwe mwe baice aba kuti mulekulila mu lupwa lwa ba Nte, finshi mulingile ukucita pa kuti mulelanga ukuti mulatasha pa cilubula? Muleibukisha ukuti na imwe bene muli basambi ba Baibo. Na kuba nimwe basambi ba Baibo abacindamisha abo abafyashi benu bakwata. Baibo itila: “Palameni kuli Lesa, na o akapalama kuli imwe.” (Yako. 4:8; 1 Imila. 28:9) Nga mwacitapo cimo pa kuti mupalame kuli Yehova, na o akapalama kuli imwe. Icilenga Yehova alemubikako amano te pa mulandu wa kuti mwaba mu lupwa lwa ba Nte, lelo ni co afwaya mwaba cibusa wakwe. Cinshi Yehova acita pa kuti mwingaba cibusa wakwe? Alimupeela icilubula, kabili tamufwile ukulaba ubu bupe ubwacindama ubo Yehova amupeela. (Rom. 5:​1, 2) Kanshi ilyo mushilasangwa ku Cibukisho uno mwaka, bushe te kuti ciwame mwatontonkanya sana pa fyo Yehova na Yesu bamucitila? Lyena kuti cawama mwatontonkanya pa fyo mufwaya ukulaikala na pa fyo mwingapanga ukucita pa kuti mulelanga ukuti mulatasha Yehova pa kumupeela icilubula.b

ABENA KRISTU ABABATISHIWA

8. Bushe Abena Kristu ababatishiwa balanga shani ukuti balatasha pa cilubula?

⁸ Nga ca kuti mwalibatishiwa ninshi kale kale mwalilanga ukuti mulatasha pa cilubula mu nshila ishalekanalekana. Ku ca kumwenako, mwalicitilepo fimo pa kuti mube cibusa wa kwa Yehova kabili mulecita ifyo afwaya. Mwalitendeke ukukonka ifunde Yesu atupeela ilya kubila imbila nsuma no kulenga abantu baba abasambi. Mwali-ipeele kuli Yehova kabili mwalibatishiwe. Bushe kwali abalemucusha pa mulandu wa kuti mwalisalilepo ukulabombela Yehova? (2 Tim. 3:12) Ifi mwatwalilila ukubombela Yehova ne cishinka, filanga fye ukuti mwalimutemwa kabili mulatasha pa cilubula ico atupeela.—Heb. 12:​2, 3.

9. Cinshi Abena Kristu ababatishiwa balingile ukucenjelako?

⁹ Nga ca kuti napapita inshita ukutula apo twabatishiwilwa, tufwile ukuba abacenjele pantu nalimo mu kupita kwa nshita kuti twaleka ukutasha pa cilubula. Kuti twaleka shani ukutasha? Natulande pa fyo cali ku Bena Kristu abali mu Efese mu nshita ya batumwa. Yesu alibatashishe pa fyo baleshipikisha. Na lyo line abebele ati: “Kuli cimo ico nshatemwa pali iwe, ica kuti pali ino nshita tawantemwa nga filya wantemenwe pa kutendeka.” (Ukus. 2:​3, 4) Ifi Yesu alandile filanga ukuti Umwina Kristu kuti aleka ukubombela Yehova no mweo onse. Kwena Umwina Kristu wa musango uyu kuti alepepa kuli Yehova, kuti aleya mu kulongana, kabili kuti alebila imbila nsuma. Nomba ico engalacitila fyonse ifi ni co e fyo alingile fye ukulacita te pa mulandu wa kuti alitemwa Yehova. Kuti mwacita shani nga ca kuti mulemona ukuti ifyo mwatemwa Yehova pali ino nshita te fyo mwamutemenwe kale?

10. Kuti mwacita shani pa kuti mulecita ifyo Paulo aebele Timote? (1 Timote 4:​13, 15)

¹⁰ Umutumwa Paulo aebele Timote ati “uletontonkanya sana” pa fyo upepa Lesa, kabili “ulebikako sana amano.” (Belengeni 1 Timote 4:​13, 15.) Na imwe bene mulingile ukulatontonkanyako pa fyo mulingile ukulapepa Lesa pa kuti muleleka umupashi “ulelenga muleba abacincila.” (Rom. 12:11) Ku ca kumwenako, kuti cawama nga mulekwatako inshita iikalamba iyakupekanya ifyo mukaya mu kusambililapo nga mwaya mu kulongana. Nga mulecita ifi, mukalabikako sana amano ilyo mulelongana. Nelyo kuti mwaya ku ncende uko mwingaba fye mweka ilyo muleisambilisha Baibo pa kuti muletontonkanya sana pa fyo muleisambilisha. Nga mulecita ifi, mukalanonkelamo sana ilyo muleisambilisha Baibo. Nga filya fine mufwile ukulabika inkuni pa mulilo pa kuti utwalilile ukwaka, e fyo mufwile no kutwalilila ukucita ifi fintu pa kuti mulelanga ukuti mulatasha pa cilubula e lyo na pa fintu fimbi ifisuma ifyo Yehova amupeela. Na kabili nga kwashala imilungu iinono ukuti kube icibukisho, bushe te kuti ciwame mwalatantontonkanya sana pa nshila ishalekanalekana isho Yehova atupaalilamo fwe Nte shakwe? Nga mulecita ifi, ukwabula no kutwishika mukalatasha sana pa cilubula icalenga mube ifibusa na Yehova.

11-12. Nga ca kuti inshita shimo tamuba abacincila pa kubomba umulimo wa kwa Lesa, bushe ninshi cilepilibula ukuti Yehova alileka ukumupeela umupashi wakwe uwa mushilo? Londololeni. (Moneni ne cikope.)

¹¹ Nga ca kuti inshita shimo tamuba abacincila mu kupepa Yehova nga fintu mwingafwaya ukuba abacincila, tamufwile ukufuupuka nelyo ukulamona ukuti Lesa naleka ukumupeela umupashi wakwe uwa mushilo. Ibukisheni ifyo umutumwa Paulo alembeele Abena Korinti pa mulimo wakwe uwa kubila imbila nsuma. Abalembeele ati: “Na lintu nabomba uyu mulimo pa mulandu wa kuti mfwile fye ukuubomba, Lesa alimpeela umulimo uwacindama.” (1 Kor. 9:17) Ni mwi Paulo aloseshe?

¹² Inshita shimo Paulo talefwaya ukubila imbila nsuma. Lelo alitwalilile ukubila imbila nsuma nangu ca kuti inshita shimo talefwaya. Na imwe bene kuti mwatwalilila ukubila imbila nsuma. Mulefwaisha ukucita icisuma nangu ca kuti inshita shimo cilamukosela. E ico mulepepa kuli Yehova pa kuti ‘alelenga mulefwaya ukucita ifyo afwaya kabili alemupeela na maka ya kuficita.’ (Fil. 2:13) Mulecita ifintu ifingalenga mwatwalilila ukuba ifibusa na Yehova. Nga mulecita ifi, mu kuya kwa nshita mukatemwa sana Yehova nga fintu mwamutemenwe kale, kabili mukaba abacincila pa kumubombela.

13. Kuti twacita shani pa kuti tuleyesha ‘pa kuti tumone nga tuli mu citetekelo’?

¹³ Kuti cawama mu nshita mu nshita tuleiceceta nga fintu Paulo alandile pali 2 Abena Korinti 13:5 apatila: “Muleyesha mwe bene pa kuti mulemona nga muli mu citetekelo, muleilinga mwe bene pa kuti muleishiba ifyo mwaba.” Ilyo tuleiceceta tufwile ukulayipusha amepusho pamo nga: ‘Bushe ndabika Ubufumu pa ntanshi mu mikalile yandi?’ (Mat. 6:33) ‘Bushe ifyo nsalapo ukuleseshamo icitendwe filanga ukuti nalipata ifyabipa?’ (Amalu. 97:10) ‘Bushe ifyo ncita ne fyo nanda filalenga aba mu cilonganino balaumfwana kabili baba baikatana?’ (Efes. 4:​2, 3) Inshita ya Cibukisho e nshita iisuma iya kutontonkanya pali ifi fintu. Nga tuletontonkanya pa fyo Yehova na Yesu batucitila, tukalatasha Yehova kabili tukalalanga ukuti tulacita ifya kusekesha Kristu, te fya kuisekesha fwe bene.c

ABALEKA UKUBOMBELA YEHOVA

14. Finshi fyalenga Abena Kristu bamo baleke ukulongana?

¹⁴ Abena Kristu bamo balileka ukulongana nangu ca kuti balibombela Yehova pa myaka iingi. Cinshi calenga baleke ukulongana? Bamo icalenga baleke, “masakamika ya mikalile.” (Luka 21:34) Bambi balikalipa pa mulandu ne fyo uwa bwananyina umo alandile nelyo ifyo acitile. (Yako. 3:2) Bambi nabo balicitile ulubembu ulukalamba kabili tabafwaya ukweba baeluda pa kuti babafwe. Te mulandu ne fyalenga muleke ukulongana, finshi mufwile ukucita pa kuti mubwelele mu lupwa lwa kwa Yehova? Bushe icilubula e lyo ne fyo Yehova na Yesu bamutemwa kuti fyalenga mwalafwaisha ukucita cinshi?

15. Bushe Yehova alanga shani ukuti alibika amano kuti bantu aba kuti balileka ukulongana? (Esekiele 34:​11, 12, 16)

¹⁵ Tontonkanyeni pa fyo Yehova omfwa pa bantu aba kuti balileka ukulongana. Taabafulilwa kabili tabalabako. Lelo acili alabafwaya, nga abasanga, alabafwa pa kuti babwelele kuli ena kabili alabasakamana. (Belengeni Esekiele 34:​11, 12, 16.) Bushe ifi fine e fyo Yehova na imwe amucitila? Ee! Ifi mulebelenga cino cipande cishibilo ca kuti mucili mulafwaya ukulacita ifyo Yehova afwaya. Yehova alimwene imibele iisuma iyo mwakwata, e calengele amwafwe pa kuti mumwishibe kabili mube mu cilonganino cakwe. Na pali ino ine nshita alamona imibele yenu iisuma kabili afwaya mwabwelela mu cilonganino cakwe.

16. Finshi abaleka ukubombela Yehova bengacita pa kuti babwelele kuli ena? (Moneni ne cikope.)

¹⁶ Muli broshuwa itila Bweleleni kuli Yehova mwaliba amashiwi ya kukoselesha aya kuti: “Mulingile ukwishiba ukuti Yehova akulamwafwa nga ca kuti mwabwelela kuli ena. Akamwafwa pa kuti mwaleka ukusakamikwa no kumfwa ububi nga kuli abamukalifye, kabili akalenga mwaba no mutende wine wine uo umuntu akwata nga alebombela Lesa na kampingu iisuma. Yehova nga amwafwa, mukafwaya ukulamubombela capamo na bakapepa bakwe.” Muleibukisha no kuti baeluda balafwaya sana ukumwafwa. Kuti baba ‘ngo mwa kufisama ku mwela, kabili nge cifulo ca kuubamo imfula iikalamba.’ (Esa. 32:2) Pa kulanga ukuti mulatasha pa cilubula, kuti mwayipusha amuti, ‘Finshi mfwile ukucita pali ino nshita pa kuti ningabwelela kuli Yehova?’ (Esa. 1:18; 1 Pet. 2:25) Ku ca kumwenako, bushe te kuti ciwame mwaya mu kulongana pa Ng’anda ya Bufumu? Bushe te kuti ciwame mwaeba eluda umo ukuti amwafwe? Eluda kuti aeba uwa bwananyina ukuti amusambilisheko Baibo pa nshita imo. Nga mwacita ifi twalandapo, Yehova akamupaala pantu ninshi mwalanga ukuti mulefwaya ukubwelela kuli ena, kabili ninshi mwalanga ukuti muletasha pa cilubula.

FINSHI MUFWILE UKUCITAPO?

17-18. Finshi tufwile ukucita nga kwashala inshita iinono ukuti kube Icibukisho?

¹⁷ Yesu alandile ukuti ico Yehova apeelele icilubula ni pa kuti “onse [uutetekela Yesu] ekonaika, lelo akabe no mweo wa muyayaya.” (Yoh. 3:16) Icilubula e nshila iyo Yehova atulubwilamo ku lubembu ne mfwa. Bonse fye tufwile ukulatasha pa cilubula. (Rom. 3:​23, 24; 2 Kor. 6:1) Nga kwashala inshiku ishinono ukuti kube Icibukisho tufwile ukulatontonkanya sana pa fyo Yehova na Yesu bacitile ifilanga ukuti balitutemwa. Nga tulecita ifi, tukalatasha sana pa fyo batutemwa.

¹⁸ Kuti mwalanga shani ukuti mulatasha pa cilubula? Ifyo mwingasuka ici cipusho kuti fyapusana ne fyo bambi bengasuka. Nomba kuti mwacetekela ukuti Yehova akamupaala nga muleibikilisha pa kuti mube nga aba bwananyina abengi abashicita fye ‘ifya kuisekesha, lelo abacita ifya kusekesha uwabafwilile.’—2 Kor. 5:15.