Tabalekele Ukulongana Pamo

Ilyo ubuteko bwabindile umulimo wa Nte sha kwa Yehova, aba bwananyina balitwalilile ukulonganina mu mayanda mu bumfisolo. Lelo ilyo balelongana, tabaleimba inyimbo sha Bufumu pa kuti abantu beiluka ukuti balelongana. Aba mu buteko baleya ku fifulo fimo ifya kulonganinamo, lelo tabalepumfyanya aba bwananyina.

Pa kuti aba bwananyina bakwate ukulongana kukalamba, baleshukila inshita ilyo kuli ifiila nelyo amenga. Ba Tagor Hutasoit batile, “Abaleupana balelembesha icupo cabo kabili balepoka ulusa kuli bakapokola pa kuti bakwate umutebeto wa bwinga uukalamba. Pa mutebeto wa bwinga, shibwinga na nabwinga baleikala pa cisebele e lyo bamunyinefwe balelanda amalyashi ya mu Baibolo pa cisebele pene.”

Bushiku bumo ilyo kwali ukulongana kukalamba, kapokola alitile ba Tagor pa mbali.

Abepwishe ati, “Cinshi mukwatila amenga ukufuma ulucelo ukufika icungulo? Abantu bambi bakwata fye amenga yabo pa maawala yabili nelyo yatatu.”

Bamwaswike abati, “Abaleupana balakwata amafya ayengi sana, e ico balafwaikwa baishiba ifyo Icebo ca kwa Lesa cilanda.”

Uyu kapokola akuntile fye umutwe no kulanda ati, “Ca cine sana.”

Lintu kwali abaleupana abengi mu cibansa ca mupila mu Jakarta, aba bwananyina balishukiile iyi nshita kabili balilongene ulubali lumo ulwa kulongana kwa citungu ukwaliko mu 1983 ukwakwete umutwe uwaleti, “Kingdom Unity.” Aba bwananyina ukufika kuli 4,000 ukubikako na bantu abalesambilila Baibolo balilongene kabili abantu 125 balibatishiwe mu bumfisolo ilyo ukulongana kushilatendeka. Aba bwananyina balipangile amabungano ayengi kabili ayakalamba lintu aba mu buteko balekele ukulabasopa sana ukubikako fye no kulongana ukwasangilwe abantu 15,000.

Ukukuula Umusambo Ninshi Balibinda Inte sha kwa Yehova

Muli ba 1980 na ba 1990, iofeshi lya Nte sha kwa Yehova balelomba ubuteko ukuti busuminishe ba Nte ukulabomba imilimo yabo ukwabula ukubabinda. Aba bwananyina mu fyalo fimbi nabo balilembeele ubuteko bwa ku Indonesia na beminishi ba ici calo no kubepusha ico bashasuminishishe ba Nte ukulabomba umulimo wabo mu Indonesia. Abakalamba ba buteko abengi balefwaya ukusuminisha, lelo abali mu kabungwe kalolekesha pa macalici mu Indonesia aka Directorate General of Christian Community Guidance balecilikila.

Mu 1990, aba bwananyina balilanshenye ukuti bakuule iofeshi lya musambo uupya ku ncende iyafiseme uko ubuteko bushingeshiba. Muli ulya wine mwaka, Ibumba Litungulula lyalisumunishe bamunyina ukushita incende mupepi no musumba uunono uwa Bogor kabili ukufuma kuli uyu musumba ukufika ku Jakarta paba amakilomita nalimo 40. Umusumba wa Bogor wabela ku kapinda ka ku kulyo aka Jakarta. Apo aba bwananyina abaishibe ifya makuule baali fye abanono, bushe baali no kukuula shani iofeshi lya musambo?

Aba bwananyina ba mwi sonde lyonse baali no kubafwa. Aba mwi Ofeshi Lilolekesha pa Makuule ku Brooklyn ne Ofeshi Lilolekesha pa Makuule ku Australia, balipangile amapulani ya maofeshi ya musambo. Aba bwananyina 100 abafumine ku fyalo fimbi balyafwilishe muli aya makuule ayasendele imyaka ibili.

Munyinefwe Hosea Mansur umwina Indonesia uo aba kwi ofeshi lya musambo baletuma ukubalandilako ku ba mu buteko atile: “Lyonse ilyo aba mu buteko abaShilamu bamona pa kasote kandi apalembelwe ifilembo fya H.M., balemona kwati icilembo ca H caleimininako ishiwi lya kuti ‘Hājjī.’ Ili ishiwi balilicindika sana pantu betilako abaShilamu abaya mu kupepa ku musumba uo bacindika nga nshi uwa Mecca. Kanshi balencindika sana. E ico filya baletontonkanya pali ici icilembo fyalengele ndebomba bwino uyu mulimo nabo.”

Pa 19 July 1996, e lyo bapeele amaofeshi ya musambo kuli Yehova. Munyinefwe John Barr uwali mwi Bumba Litungulula e walandile ilyashi lya kupeela iofeshi kuli Yehova. Pa bantu 285 abalongene pa kupeela iofeshi lya musambo kuli Yehova pali na bantu 118 abafumine ku misambo imbi na bamishonari abafumine mu fyalo ifingi ababombeleko mu Indonesia ukubikako na bantu 59 abalebombela pe ofeshi lya musambo mu Indonesia. Pa numa ya nshiku shibili, abantu 8,793 balilongene ukulongana kwa citungu ukwali mu Jakarta ukwakwete umutwe uwaleti, “Inkombe sha Mutende wa Bukapepa.”

Yehova Alubula Abantu Bakwe

Mu 1998, Soeharto (Suharto) uwatekele icalo ca Indonesia pa myaka iingi, alilekele ukuteka kabili kwali no kuba ubuteko ubupya. Kanshi aba bwananyina balibombeshe pa kuti ubuteko bufumyepo icibindo.

Ilyo Kalemba wa Buteko bwa ku Indonesia Djohan Effendi aile ku New York mu 2001, alitandalile iofeshi lya musambo ilya ku Brooklyn kabili alilanshenye na bamunyinefwe batatu abali mwi Bumba Litungulula. Alitemenwe sana ifyo amwene kabili alishininkishe no kuti ba Nte balishibikwa mwi sonde fye lyonse pa milimo iisuma iyo babomba. Ba Effendi nabo batile, kuti batemwa nga ca kuti ubuteko bwasuminisha ba Nte ukulabomba umulimo wabo, lelo balandile abati uwakwete amaka ya kusuminisha ni loya wa buteko bwa Indonesia Marzuki Darusman.

Uyu loya wa buteko na o alisumine ukufumyapo icibindo, lelo abo alebomba nabo balelalikisha ukubombelapo pantu balishibe ukuti uyu muntu ali fye mupepi no kuleka incito. Pa 1 June 2001, uyu loya wa buteko alitile ba Tagor Hutasoit kwi ofeshi lyakwe. Ba Tagor batile, “Imyaka 25 ku numa, naingile muli ili iofeshi kabili bantambike icipepala ca kubinda Inte sha kwa Yehova mu Indonesia. Lelo pali ubu bushiku uyu loya antambike icipepala ca kutusuminisha ukulabomba umulimo wesu mu Indonesia. Ubu bwine bushiku e lyo uyu loya alekelesheko ukubomba.”

Pa 22 March 2002, ubuteko bwa Indonesia bwalilembeshe akabungwe ka mwi funde aka Nte sha kwa Yehova mu Indonesia kuli Dipartimenti Iilolekesha pa Mipepele mu calo. Umukalamba wa iyi dipartimenti aebele abaleimininako iofeshi lya musambo ati: “Ici icipepala tacilemupeela insambu sha kupepa pantu na kuba, Lesa e upeela insambu sha kupepa. Ici cipepala cilelangilila ukuti ubuteko nabusuminisha imipepele yenu ukulingana ne funde. Nomba kuti mulepepa nga filya fine imipepele yonse muli cino calo bapepa kabili ubuteko tabwakulamulesha.”