Inama Nashicepa Amapesenti 73 nga Kulinganya ku fyo Shali Imyaka 50 Iyapita—Finshi Baibo Yalandapo?

Pa 9 October 2024, ba World Wildlife Fund balifumishe lipoti iyasakamike abantu iyalelanda pa fyo inama sha mpanga shicepele pa mulandu ne fyo abantu bacita. Muli iyi lipoti balandile ukuti “ukucila pa myaka 50 iyapita (1970-2020), inama sha mpanga shalicepa sana pali ino nshita ukufika fye na ku ma pesenti 73 nga ku shilinganya ku fyo shali kale.” Muli lipoti balandile no kuti: “tatulekukumya ukulanda ukuti ifili no kucitika mu myaka 5 iileisa e fikapima ifyo ifintu fikaba ku ntanshi pano isonde.”

Aya malipoti yalalenga abantu abengi ukuba sana no mwenso. Twalitemwa sana isonde lyesu ilisuma kabili tulomfwa ububi ukumona inama shilecula. Icilenga tuleumfwa ububi nico Lesa atupangile ukuti tulesakamana inama.—Ukutendeka 1:27, 28; Amapinda 12:10.

Kanshi nalimo kuti mwalaipusha ukuti, ‘Bushe tukakumanisha ukucingilila inama sha mpanga? Finshi Baibo yalandapo?’

Isubilo lya nshita ya ku ntanshi

Te mulandu ne fyo twingesha ukucingilila inama sha mpanga, ni Lesa fye e wingashicingilila umupwilapo. Baibo pa Ukusokolola 11:18 yasobele ukuti, Lesa “akonaula abaleonaula isonde.” Ici cikomo cilatusambilisha ifintu fibili:

1. 1. Lesa takasuminishe abantu ukonaula isonde umupwilapo.

2. 2. Lesa ali no kucitapo cimo nomba line. Twaishiba shani? Pantu ino nshita kwaliba ifingi ifilanga ukuti abantu bali no konaula inama ukucila ifyo cali kale.

Finshi Lesa akacita pa kupwisha ubu bwafya? Akabomfya Ubufumu bwakwe ubwa ku muulu, nelyo ubuteko, ukuteka isonde lyonse. (Mateo 6:10) Ubu Bufumu bukasambilisha abantu ba cumfwila ifyo bakalacita pa kuti ba kalesakamana bwino inama sha mpanga.—Esaya 11:9.