Bushe Baibolo Yalilandapo pa Fyupo fya Banakashi Beka Beka Nelyo Abaume Beka Beka?

Icasuko ca mu Baibolo

Kabumba wesu atupeele amafunde ya kukonka pa cupo kale sana ninshi aba buteko tabalapanga amafunde yalanda pa cupo. Ibuuku lya kubalilapo ilya mu Baibolo litila: ‘Umwaume akasha wishi na nyina no kulambatila ku mukashi wakwe, na bo bakaba umubili umo.’ (Ukutendeka 2:24) Nga fintu icitabo ca Vine’s Expository Dictionary of Biblical Words cilanda, ishiwi lya ciHebere ukwafuma ishiwi lya kuti “umukashi, lipilibula umwanakashi.” Yesu alisumine ici cishinka ilyo atile, abafwile ukuupana “mwaume no mwanakashi.”—Mateo 19:4.

Kanshi Lesa afwaya umwaume no mwanakashi ukutwalilila ukwikala pamo nga baupana e lyo no kutemwana sana. Abaume na banakashi bapangwa mu musango wa kuti baleafwana mu cupo no kupanga icupo pa kuti baleisansamusha no kukwata abana.