Bushe Mukaanya Kristu Nani?

Icasuko ca mu Baibo

Te kuti tulande ukuti mukaanya Kristu muntu umo nelyo akabungwe, pantu Baibo ilanda ukuti kwaba “bamukaanya Kristu abengi.” (1 Yohane 2:18) Kanshi ishiwi lya kuti “mukaanya Kristu,” ilyafuma kwi shiwi lya ciGriki ilipilibula ukuti “ukukaanya Kristu,” lilosha ku muntu uuli onse uucita ifyakonkapo:

• Uukaana ukuti Yesu e Kristu (Mesia) nelyo uukaana ukuti Mwana wa kwa Lesa.—1 Yohane 2:22.

• Uulwisha Kristu, Uwasubwa uwa kwa Lesa.— Amalumbo 2:1, 2; Luka 11:23.

• Uuifungushanya ukuti ni Kristu.—Mateo 24:24.

• Uucusha abakonka Kristu, pantu Yesu amona umuntu uulecusha abamukonka ukuti e o balecusha.—Imilimo 9:5.

• Uulanda ukuti Mwina Kristu, lelo uutoba amafunde ya kwa Lesa nelyo uwa bufi.—Mateo 7:22, 23; 2 Abena Korinti 11:13.

Baibo nga yabomfya ishiwi lya kuti “mukaanya Kristu,” limo ilanda pa muntu uucita ifi twalandapo e lyo inshita shimbi ilanda pali bonse bamukaanya Kristu. (2 Yohane 7) Mu nshita ya batumwa emo bamukaanya Kristu batendeke ukubako, kabili balitwalilila ukubako ukufika na lelo. Ubusesemo bwa mu Baibo e bwasobele ukuti bamukaanya Kristu bakatwalilila ukubako ukufika na pali ino nshita.—1 Yohane 4:3.

Ifyo twingeshibilako bamukaanya Kristu

• Balalanda ifya bufi pali Yesu. (Mateo 24:9, 11) Ku ca kumwenako, bonse abasambilisha ukuti muli lesa umo mwaba abene batatu nelyo ukuti Yesu e Lesa wa maka Yonse, balakaana ifyo Yesu alesambilisha, uwalandile ukuti: “Tata mukalamba pali ine.”—Yohane 14:28.

• Bamukaanya Kristu balakaana ifyo Yesu alandile ukuti e fyo Ubufumu bwa kwa Lesa bucita ifintu. Ku ca kumwenako, intungulushi shimo isha mapepo shilanda ukuti Kristu abomfya amabuteko ya bantunse pa kucita ifyo alefwaya. Nomba ifi balanda fyalipusana ne fyo Yesu alesambilisha, uwalandile ukuti: “Ubufumu bwandi te bwa pano calo.”—Yohane 18:36.

• Balanda ukuti Yesu ni Shikulu wabo, lelo tabacita ifyo alesambilisha, ukubikako fye no kubila imbila nsuma iya Bufumu.—Mateo 28:19, 20; Luka 6:46; Imilimo 10:42.