Amapinda 16:3—“Ulelekela [Shikulu] Fyonse Ifyo Ulecita”

“Bika mu maboko ya kwa Yehova fyonse ifyo ucita, e lyo fyonse ifyo upanga ukucita fikenda bwino.”—Amapinda 16:3, Amalembo ya Calo Cipya.

“Ulelekela [Shikulu] fyonse ifyo ulecita, na mapange yobe yakafikilishiwa.”—Amapinda 16:3, Baibo ya Ishiwi lya kwa Lesa.

Umwalola Amashiwi Yaba pa Amapinda 16:3

Ili lembo lilalenga bonse abapepa Lesa wa cine bashininkisha ukuti ifintu fikalabendela bwino, nga ca kuti bamucetekela kabili nga balecita ifyo atusambilisha.

“Bika mu maboko ya kwa Yehova fyonse ifyo ucita.” Ilyo bashilasalapo ifya kucita, ababomfi ba kwa Yehovaa balalomba ukuti Yehova abatungulule. (Yakobo 1:5) Mulandu nshi bacitila ifyo? Ni co ilingi line abantunse tabakwata amaka pa fibacitikila. (Lukala Milandu 9:11; Yakobo 4:13-15) Na kabili, inshita shimo tabeshiba ifya kucita pa kuti bafikilishe ifyo balefwaya ukucita. Pa mulandu ne fi twalandapo, abengi balasalapo ukubika fyonse ifyo balecita mu minwe kwa Lesa. Bacita ifyo ilyo balepepa kuli Yehova pa kuti abatungulule ilyo balesalapo ifya kucita, e lyo na lintu balecita ifintu ukulingana ne fyo Icebo cakwe Baibo cilanda.—Amapinda 3:5, 6; 2 Timote 3:16, 17.

Amashiwi ya kuti “Ulelekela [Shikulu] fyonse ifyo ulecita” yapilibula ukuti “tuulila Shikulu imilimo yobe.” Icitabo cimo cilanda ukuti ukutuulila Shikulu imilimo kuti twakupashanya ku “muntu uusendele icipe icafina sana e lyo alomba umuntu uukwete amaka ya kucisenda ukuti amwafweko.” Bonse fye abacetekela Lesa balashininkisha ukuti akulabafwa kabili akulabapeela ne fyo bakabila.—Amalumbo 37:5; 55:22.

Amashiwi ya kuti “fyonse ifyo ucita” tayapilibula ukuti Lesa akulapaala fyonse ifyo abantu balefwaya ukucita. Kanshi pa kuti Yehova alepaala ifyo balecita, kano fyonse ifyo balecita filelingana ne fyo afwaya. (Amalumbo 127:1; 1 Yohane 5:14) Lesa tapaala abantu abashaba ne cumfwila. Na kuba, “alafulunganya amapange ya babifi.” (Amalumbo 146:9) Lelo alatungilila bonse abamunakila kabili abakonka amafunde yakwe ayaba mu Baibo.—Amalumbo 37:23.

“E lyo fyonse ifyo upanga ukucita fikenda bwino.” Mu ma Baibo yamo, aya amashiwi bayapilibula ukuti “e lyo yakapampamikwa amapange yobe.” Mu malembo ya ciHebere nelyo mu Icipingo ca Kale, ishiwi ilyo bapilibula mu Cibemba ukuti “ukupampamikwa” lilanda pa kupanga umufula, kabili ilingi line lilanda pa fyo ifyo Lesa abumba fitwalilila ukubako. (Amapinda 3:19; Yeremia 10:12) Ifi fine efyo na Yehova acitila abacita ifyo afwaya. Alalenga belasakamikwa kabili baleba ne nsansa.—Amalumbo 20:4; Amapinda 12:3.

Amashiwi Ayaba pa Amapinda 16:3

Imfumu Solomone e yalembele amashiwi yaba pali ili lembo, kabili e yalembele ifingi ifyaba mwi buuku lya Amapinda. Solomone alilembele amapinda ayengi nga nshi pa mulandu na mano ayo Lesa amupeele.—1 Ishamfumu 4:29, 32; 10:23, 24.

Mu cipandwa 16, Solomone atendekela no kulumbanya Lesa pa fyo aba sana na mano, kabili alilandile na pa fyo apatile abantu ababa ne cilumba. (Amapinda 16:1-5) Ici icipandwa kuti ca-afwa uulebelenga ukumfwikisha icishinka icacindama ico balandapo sana mwi buuku lya Amapinda ica kuti: Abantunse kuti baba na mano kabili ifintu kuti filebendela bwino nga ca kuti na baicefya kabili baleleka Lesa aletungulula intampulo shabo. (Amapinda 16:3, 6-8, 18-23) Ici cishinka icacindama balicilandapo sana mu Baibo.—Amalumbo 1:1-3; Esaya 26:3; Yeremia 17:7, 8; 1 Yohane 3:22.

Tambeni iyi vidio iipi pa kuti mumone fimo ifyaba mwi buuku lya Amapinda.