UBULONDOLOSHI BWA FIKOMO FYA MU BAIBOLO
Amalumbo 37:4—“Sekelela nga Nshi Muli SHIKULU”
“Kabili sekelela nga nshi muli Yehova, na o akakupeela ififwaya umutima obe.”—Amalumbo 37:4, Amalembo ya Calo Cipya.
“Ulesekelela nga nshi muli SHIKULU, na o akakupeela ififwaya umutima obe.”—Amalumbo 37:4, Baibo ya English Standard Version.
Umwalola Amashiwi Yaba pa Amalumbo 37:4
Kemba wa malumbo akoseleshe bakapepa ba kwa Lesa ukulasekelela pa kuba ifibusa na Yehova. Bonse ababa ifibusa na ena kuti bacetekela ukuti Yehovaa Lesa akabapeela ifyo bafwaya.
“Kabili sekelela nga nshi muli Yehova.” Aya amashiwi kuti yapilibula no kuti “mulesansamukila nga nshi muli Yehova,” “mulesekelela mu kubombela SHIKULU,” nelyo “mulesekelela mu fyo SHIKULU amulaya.” Mu mashiwi yambi kuti twatila fye, “tulingile ukulasekelela nga nshi” ilyo tulebombela Lesa wa cine. (Amalumbo 37:4) Mulandu nshi twalandila ifyo?
Baibo ilondolola ukuti bakapepa ba kwa Yehova bamona ifintu nge fyo afimona. Tabaishiba fye Lesa, lelo balikwata na mano ayalenga balemumfwila. Ici cilenga balekwata kampingu iisuma kabili balepingula bwino na pa fintu. (Amapinda 3:5, 6) Ku ca kumwenako, tabakalipa nelyo ukuba no mufimbila nga bamona ukuti abafunushi nelyo abashaba ne cishinka balemoneka kwati balakwata fyonse ifyo bakabila. (Amalumbo 37:1, 7-9) Abantu ba kwa Lesa baliba ne nsansa pantu balishiba ukuti nomba line fye akafumyapo ulufyengo kabili akabalambula pa fyo baba ne cishinka na pa mibele yabo iisuma. (Amalumbo 37:34) Na kabili baliba ne nsansa pantu balishiba ukuti Shibo wa mu muulu alibatemwa.—Amalumbo 5:12; Amapinda 27:11.
“Akakupeela ififwaya umutima obe.” Aya amashiwi kuti yapilibulwa no kuti “akaasuka amapepo yenu” nelyo “akamupeela ifyo mufwaisha.” Na lyo line, Yehova tapeela fye umuntu fyonse ifyo alomba. Nga filya fine umufyashi umusuma aba, Yehova alishiba ifingawamina abana Bakwe. Lelo ifyo tulomba ne fyo tucita mu mikalile fifwile ukulingana na mafunde yakwe no kufwaya kwakwe. (Amapinda 28:9; Yakobo 4:3; 1 Yohane 5:14) Nga caba ifyo, kuti twapepa ku ‘umfwa ipepo’ no kucetekela ukuti alakutika kuli ifwe.—Amalumbo 65:2; Mateo 21:22.
Amashiwi Yambi Ayaba pa Fikomo Fimbi pa Amalumbo 37:4
Imfumu Davidi iya bena Israele eyaimbile Ilumbo 37. Yalembele ili Ilumbo ukulingana na alufabeti.b
Davidi balemufyenga. Imfumu Shauli e lyo na bambi balefwaisha ukumwipaya. (2 Samwele 22:1) Na lyo line, Davidi lyonse alecetekela Lesa wakwe. Davidi alishibe ukuti mu kuya kwa nshita Yehova ali no kupingula abantu ababipa. (Amalumbo 37:10, 11) Nangu ca kuti bamoneka kwati ifintu filabendela bwino “nge cani iciteku,” bushiku bumo bakaloba.—Amalumbo 37:2, 20, 35, 36.
Ilumbo 37 lilapusanya ificitika ku bantu abakonka amafunde ya kwa Lesa ku ficitikila abashikonka amafunde yakwe. (Amalumbo 37, 16, 17, 21, 22, 27, 28) Ili Ilumbo lilatwafwa ukuba na mano kabili lilalenga twaba abantu abo Lesa atemwa.
Tambeni iyi vidio iipi pa kuti mumone fimo ifyaba mwi buuku lya Amalumbo.
a Yehova e shina lya kwa Lesa mu Cibemba ilyo bapilibula ukufuma ku lulimi lwa ciHebere. Pa kuti mumone umulandu mu ma Baibo ayengi babomfesha ilumbo lya kuti Shikulu mu cifulo ca kubomfya ishina lya kwa Lesa, moneni icipande citila “Bushe Yehova Nani?”
b Inshila balembelamo ili ilumbo, icikomo ca kubalilapo nelyo ifikomo fitendeka ne cilembo ca kubalilapo muli alufabeti ya ciHebere, e lyo ifikomo fyakonkapo fyakwata icilembo calenga bubili. Iyi inshila balembelamo ilaafwa abantu ukwibukisha amashiwi yaba mwi lumbo.