UBULONDOLOSHI BWA FIKOMO FYA MU BAIBOLO
Amapinda 17:17—“Icibusa Cena Citemwa fye Lyonse”
“Cibusa wa cine alaba no kutemwa inshita yonse, kabili ni munyina uwingakwafwa mu nshita ya macushi.”—Amapinda 17:17, Amalembo ya Calo Cipya
“Icibusa cena citemwa fye lyonse, ne co munyina abelako kwafwilisha mu nshita sha bwafya.”—Amapinda 17:17, Baibo ya Ishiwi Lya kwa Lesa.
Umwalola amashiwi yaba pa Amapinda 17:17
Ifibusa fya cine fyalicetekelwa. Nga filya fine munyina uo twafyalwa nankwe aba, cibusa wa cine na o aliba ne cishinka kabili alasakamana ifibusa fyakwe, maka-maka mu nshita isha-afya.
“Cibusa wa cine alaba no kutemwa inshita yonse.” Aya mashiwi kuti yalola na mu kuti “ifibusa lyonse filalanga ukutemwa.” Ishiwi lya ciHebere ilyo bapilibula ukuti “ukutemwa” pali ili lembo, talilanda fye pa fyo tumfwa pa muntu umo. Lelo lilanda pa kutemwa uko tulanga nga twacitilako abanensu fimo. (1 Abena Korinti 13:4-7) Ifibusa abatemwana muli iyi nshila, balatwalilila ukuba ifibusa na lintu kwacitika ifingalenga baleka ukuba ifibusa. Ku ca kumwenako kuti bafilwa ukusuminishanya pali fimo nelyo kuti bakwata amafya. Na kabili ifibusa abatemwana balaitemenwa ukwelela. (Amapinda 10:12) Cibusa wa cine tafimbila umunankwe nga ca kuti ifintu filemwendela bwino, lelo alasekelela pamo nankwe.—Abena Roma 12:15.
“Cibusa wa cine . . . ni munyina uwingakwafwa mu nshita ya macushi.” Icishinka ili lembo lilandapo sana ca kuti, bamunyina aba mu lupwa lumo lwine balaba abaikatana. Kanshi nga ca kuti tule-esha apo twingapesha ukwafwa cibusa wesu uuli na mafya, ninshi tulecita ifyo lupwa lwakwe engacita. Abantu abatemwana sana balatwalilila ukuba ifibusa na lintu bali na mafya. Nga ca kuti abantu nabatemwana sana, amafya tayalenga baleka ukuba ifibusa, lelo yalalenga batemwana sana.
Umwalola Amashiwi Yaba pa Amapinda 17:17
Mwi buuku lya Amapinda mwaliba ukupanda amano ukusuma pa fyo umuntu engacita pa fintu fimo, kabili ifyebo fyabamo bafilemba mu nshila ya kuti umuntu onse aletontonkanyapo pa fyo alebelenga. Imfumu Solomone eyalembele ifingi ifyaba muli ili ibuuku. Yalembele ili ibuuku mu nshila imo ine iyo bakalemba ba mishikakulo ya ciHebere balebomfya pa kulemba. Inshita shimo Solomone alebomfya amashiwi ayapalana pa kulenga icishinka alelandapo cumfwike, e lyo inshita shimbi alelinganya ifintu fibili ifyapusana. Ku ca kumwenako, amashiwi yaba pa Amapinda 17:17b na yaba pa cikomo 17a, yalanda fye pa cintu cimo cine. Lyena amashiwi yaba pa Amapinda 18:24 yalinganya ifintu fibili ifyapusana. Patila: “Abantu bamo ababa ifibusa balaicitila ifyabipa, lelo kwaliba cibusa uwingakutemwa ukucila ne fyo uo mwafyalwa nankwe akutemwa.”
Ilyo Solomone alelemba Amapinda 17:17, nalimo aletontonkanya pa fyo wishi Davidi na Yonatani umwana wa Mfumu Shauli bali sana ifibusa. (Amapinda 17:17; 1 Samwele 13:16; 18:1; 19:1-3; 20:30-34, 41, 42; 23:16-18) Nangu ca kuti Davidi na Yonatani tabali ni bamunyina, balitemwanene sana ica kuti balifye kwati bafyelwe mu lupwa lumo lwine. Yonatani ali-ipeleshe fye no kufwila pali cibusa wakwe pa kuti amucingilile.a
Ifyo Amashiwi Yaba pa Amapinda 17:17 Bayapilibula mu ma Baibo Yambi
“Icibusa citemwa mu nshita yonse, kabili munyina afyalilwo [ubucushi].”—Baibele wa Mushilo.
“Cibusa [alatemwa] inshita yonse; munyina afyalilwa inshita ya bwafya.”—Baibo ya Diocese of Mbala.
“Cibusa lyonse alacita ifilanga ukuti ni cibusa—mu nshita ya macushi emo uyu cibusa afyalwa.”—Baibo ya The Complete Jewish Study Bible.
Tambeni iyi vidio iipi pa kuti mumone ifyaba mwi buuku lya Amapinda.
a Belengeni icipande citila “Baishileba Ifibusa Sana.”