Balibakaka pa Mulandu wa Citetekelo Cabo—mu Singapore

Ubuteko bwa Singapore bwalibikako ifunde lya kuti bonse balingile ukwingila ubushilika kabili tabusuminisha abantu ukukaana ukwingila ubushilika pa mulandu wa kampingu yabo. Ba Nte abalumendo abakaana ukwingila ubushilika pa mulandu wa kampingu yabo balabakaka pa myeshi 39.

Nga Nte umulumendo afisha imyaka 18 alingile ukwingila ubushilika ukulingana ne fyo ifunde lyalanda. Nga akaana, balamukaka mu nkambi ya bashilika pa myeshi 15. Pa numa ya myeshi 15, balamukakula no kumweba ukufwala ifya kufwala fya bushilika no kutendeka ukusambilila ubushilika. Na kabili nga akaana, balamutwala ku cilye ca bashilika no kumukaka pa myeshi 24.

Ubuteko bwa Singapore Bwalikaana Ukukonka Ifyo Akabungwe ka UN Kalanda

Kale akabungwe ka United Nations kaeba ifyalo ifyaba muli aka kabungwe ukuti “umuntu onse alikwata insambu sha kusumina nelyo ukukaana ukwingila ubushilika pa mulandu wa kampingu yakwe, ifyo atontonkanya, e lyo ne fyo asuminamo, ukulingana na mafunde yaba mu lupapulo lwa Universal Declaration of Human Rights.” Nangu ca kuti icalo ca Singapore calembeshe ukuba mu kabungwe ka United Nations mu 1965, calikaana ukukonka amafunde ayalanda pa kwingila ubushilika aya aka kabungwe. Muli kalata iyo umulashi wa buteko bwa Singapore alembeele icipani ca UN icilolekesha pa nsambu sha bantu (UN Commission on Human Rights) pa 24 April mu 2002, atile, ‘nga ca kuti ifyo umuntu asuminamo nelyo ifyo acita fyapusana na mafunde ayo icalo cikonka pa kuicingilila, icalo ca Singapore tacilingile ukukonka amafunde ya UN.’ Na kabili alembele ukwabula no kupita mu mbali ati: “Ifunde lya kupeela ubuntungwa umuntu uwakaana ukwingila ubushilika pa mulandu wa kampingu yabo, te kuti tulikonke mu calo cesu.”

Charti

1. August 18, 2023

   Inte sha kwa Yehova 11 balibakaka pantu balikeene ukwingila ubushilika.

   

2. Pa 24 April mu 2002

   Umulashi wa buteko alandile ukuti icalo ca Singapore tacisuminisha umuntu ukukaana ukwingila ubushilika pa mulandu wa kampingu yakwe.

3. Mu February mu 1995

   Ubuteko mu Singapore bwalicilemo ukucusha no kwikata Inte sha kwa Yehova.

4. Pa 8 August mu 1994

   Icilye Icikalamba ica High Court mu Singapore cakaana ukubombela pa mulandu Inte sha kwa Yehova shatwele kuli ici cilye.

5. Pa 12 January mu 1972

   Ubuteko bwa Singapore bwafuuta ukulembeshiwa kwa mwi funde ukwa Inte sha kwa Yehova.